1 Iehova na e tomu, Mamoe ireḡudia taudia, egu rei gabudia mamoedia e habuadia tarimu bona e hakarohodiamu taudia, madi, ihabaidia! 2 Taunabunai, Iehova, Israel Diravana, ese egu bese e reḡuamu taudia na ini e herevalaidia tomamu: Egu seri vada o hakarohodia rohoroho, vada o luludia oho, asio regudia. Iehova na e tomu, A itaia, lau ese emui kara dika davadia do baina henimui. 3 Bena egu seri mamoedia kwabukwabudia na na luludia lao tanodia iboudiai amo ma baina haboudia, edh magu ai ma baina hakaudia vareai; bena natudia bae havaradia, vada bae hutuma. 4 Lau ese mamoe ireḡudia taudia na daediai baina atodia, bena idia ese bae regudia; bena basie gari lou bona kudoudia basie hetaha lou, bona ta basine boio. Iehova na e herevamu.
5 Iehova na e tomu, A itaia, negana vada e maimu, lau ese kara maoromaoro Rigina ta baina haginia David ena; ia na baine pavapava, bona baine kara aonega; ia ese hahemaoro ḡoevaḡoeva bona kara maoromaoro na ina tano ai baine kara. 6 lena nega ai Iuda na baine roho mawi, bona Israel na baine noho namonamo. ia ladana bae hatoa “Iehova na eda kara maoromaoro”.
7 Iehova na e tomu, Taunabunai, negana vada e maimu, taunimanima na basie hereva lou, basieto “Iehova, Israel taudia na Aigupto tanona amo e hakaudia lasi Diravana, e maurimu heḡereḡerena”, 8 a baeto “Iehova, Israel garana na mirigini kahana tanona bona e luludia lao tanodia iboudiai lalodia amo e hakaudia lou mai Diravana, e maurimu heḡereḡerena”. Bena idia na edia tano korikori ai bae noho.
Peroveta koikoidia
9 Peroveta taudia herevadia:
Daragu vada e doko,
turiagu iboudiai na e heude-heudemu;
lau na kekero tauna na heto,
vine ranuna ese vada e hakekeroa tauna na heto,
Iehova dainai,
bona ena hereva helagadia daidiai.
10 Badina be tano na heuda-hanai taudia ai eme honu;
heuduguirai dainai tano na e taimu,
bona tano ḡaḡaena reidia vada e kakoro.
Edia dala na dika,
bona edia goada na dia maoro.
11 Peroveta tauna bona hahelaḡa tauna,
raruosi ese Dirava se matauraiamu;
egu dubu ai danu edia kara dika vada na davaria.
Iehova na e herevamu.
12 Taunabunai, edia dala na ediai
dala dedika-dedikadia dibwa ai heḡereḡeredia ai baela;
lalodiai bae luludia vareai, bena bae keto;
taunabunai lau ese dika na latadiai baina hadihoa,
edia mata-hakani laḡanina lalonai.
Iehova na e herevamu.
13 Samaria ena peroveta taudia ediai
mamina dika karana ta na itaia:
idia na Baal ladana ai e perovetava,
bona egu bese Israel e hakaua kerereva.
14 A Ierusalem ena peroveta taudia ediai
ḡau dika-rohorohona ta vada na itaia:
idia na e heuda hanaimu,
bona koikoi daladia ai e rakamu;
kara dika taudia umadia na e ha-aukadiamu,
taunabunai ta na ena kara dika amo se raka ohomu;
iboudiai na egu ai vada e hekara Sodoma na heto,
bona inoholaina taudia na Gomora na heto.
15 Taunabunai, Iehova Sabaota ese peroveta taudia na ini e herevalaidia tomamu:
A itaia, ava iditana baina ubulaidia,
bona e imoraia ranuna baina ha-inulaidia;
badina be Ierusalem ena peroveta taudia edia amo,
Dirava idadaraina karadia na tano idoinai vada e piua lao.
16 Iehova Sabaota na ini e gwau tomamu: Peroveta taudia edia hereva basio abi dae. Idia ese e peroveta henimuimu, helaro asi anidia ai e hahonumuimu; idia ese sibodia lalodia ai e mata hanaimu ḡaudia mo e gwauraimu, dia Iehova uduna herevadia. 17 Idia ese Iehova ena hereva e dadaraiamu taudia na e hamaorodia louloumu, e tomu “Umui na do ba namo”; bona sibodia edia lalo-auka daladia ai e rakamu taudia na e hamaorodiamu, e tomu “Dika ta na latamui ai basine kau”.
18 Badina be idia bogaragidia amo
daika na Iehova ena henega ai vada e gini,
ena hereva baine dibaia bona baine kamonaia totona?
Eiava daika ese ena hereva vada e hakala henia
bona vada e abia dae?
19 A itaia, Iehova ena lai gubana!
Badu vada e lasi, koe-hirihiri bada-hereana na heto,
kara dika tauna kwarana ai baine kau.
20 Iehova ena badu na basine lou,
ela bona ia lalona ena ura iboudiai
baine kara bona baine haguguru.
Dina gabedia ai
ba lalo-pararalaia ḡoevaḡoeva.
21 Peroveta taudia na asina siaidia,
to idia na e heau;
lau ese asiua hereva henidia,
to idia na e perovetava.
22 A lauegu henega ai bema gini,
idia ese egu bese taudia na egu hereva bema gwaurai henidia,
bona edia dala dikana amo bema hakaudia oho,
bona edia kara dikadia amo danu.
23 Iehova na e tomu, Lau na gabu kahikahidia Diravana a dia gabu daudaudia Diravana a? 24 Iehova na e tomu, Tau ta na gabu hehunidia ai baine komu diba bena basina itaia a? Iehova na e tomu, Lau ese guba bona tanobada asina hahonudiamu a? 25 Peroveta taudia, hari lau ladagu ai e peroveta koikoimu taudia, edia hereva vada na kamonai; idia na e tomu “Vada na nihi, vada na nihi”. 26 Hari e peroveta koikoimu bona sibodia lalodia ai e hekoimu taudia lalodia ai koikoi baine mia ela bona edena nega ai? 27 Idia na e laloamu edia nihi, e hesivarailai hehenimu ḡaudia, daidiai lau ladagu ilalo-taona na egu bese taudia lalodia amo bae abia oho, tamadia ese Baal dainai lau ladagu e laloa boio heḡereḡerena. 28 Peroveta tauna mai ena nihi ese ena nihi baine gwauraia, a egu hereva na enai e miamu tauna ese egu hereva baine gwauraia balaheni. Iehova na e tomu, Uit momona ena namo bona uit mai anina ena namo ede bae heḡereḡere toma? 29 Iehova na e tomu, Lauegu hereva na dia lahi heḡereḡerena a? Ia na dia nadi e hamakohidia sisisisimu aurina heḡereḡerena a? 30 Iehova na e tomu, Taunabunai, a itaia, lau ese peroveta taudia na inai henidiamu; idia ese egu hereva na bamodia edia amo e henaomu. 31 Iehova na e tomu, A itaia, lau ese peroveta taudia na inai henidiamu; idia na ududia amo e herevamu, e tomu “Iehova na e herevamu”. 32 Iehova na e tomu, Nihi koikoidia e perovetalaidiamu taudia na inai henidiamu, idia ese e gwauraidiamu, bona edia koikoi bona edia kavakava amo egu bese taudia e hakaudia kereremu, a lau ese asina siaidia bona asina haduadia. Taunabunai idia ese ina bese taudia edia namo sisina taina asie havaraia. Iehova na e herevamu.
33 Ina bese taudia ta, eiava peroveta tauna ta, eiava hahelaḡa tauna ta, ese baine nanadaimu, baineto “Iehova ena maduna be dahaka?”, negana ai oi na ba haere henia, baoto “Iehova na e tomu, Maduna na umui, bona baina negemui daure”. 34 Bona peroveta tauna eiava hahelaḡa tauna eiava bese taudia ta, “Iehova ena maduna” e herevalaiamu tauna, lau ese una tau mai ena ruma taudia ida na matadia baina hakanidia. 35 Umui na ini ba hereva toma, ta ta dekena tauna dekena tauna ediai, bona ta ta tadikakana tadikakana ediai, baoto “Iehova ena haere be dahaka?” eiava “Iehova ena hereva be dahaka?” 36 A “Iehova ena maduna”, basio herevalaia lou, badina be maduna be taunimanima iboudiai ta ta ena hereva ena hereva; bona umui ese Mauri Diravana, Iehova Sabaota, iseda Dirava, ena hereva o hagagevadiamu. 37 Taunabunai, peroveta tauna ba nanadaia, baoto “Iehova ese ede e haere henimu toma?” eiava “Iehova na ede e hereva toma?” 38 A boma toma “Iehova ena maduna”, Iehova na ini e gwau tomamu: Badina be ini hereva “Iehova ena maduna” vada o gwaurai, a lau ese hereva na emui ai na siaia vasi, nato, Basioto “Iehova ena maduna”, 39 taunabunai, a itaia, momokani lau ese baina abimui isi bona vairagu amo baina negemui daure, umui, bona umui mai senemui ida na henimui hanuana danu. 40 Bona lau ese gwau-tora bona hemarai na latamui ai baina hadiho hanaihanai, basie boio.
