50
1 Iehova ini e gwau tomamu:
Sinamu ena hekoho revarevana,
na hadihoa negana ai na henia ḡauna,
be edeseni ai?
Eiava e henigu torehai bena enai na hoimu
tauna be daika?
A itaia, emu kara havara daidiai na hoimu,
bona emu kerere daidiai sinamu na hadihoa.
2 Badina be dahaka nama negana ai tau ta se noho?
Badina be dahaka na boiboi negana ai tau ta se haere?
Imagu e tunamu bena basine hamaurimu diba a?
Eiava asi siahugu baina harohomu mauri a?
A itaia, egu gwaugwau amo davara na hakororoamu,
bona sinavai na tano kaukauna ai na halaoamu;
edia gwarume na e bodagamu,
ranu ai e dabumu dainai e masemu.
3 Guba na korema-korema ai na hadabualaiamu,
bona puse dabuadia ai na ḡovalaiamu.
Iehova ena hesiai tauna ena kamonai
4 E hadibadia taudia maladia na Ḡaubada Iehova ese e henigu,
tau-boera tauna na egu hereva amo baina hagoadaia diba helaoreana.
Daba ta ta amo e haogumu, taiagu e hakiraradiamu,
e hadibadia taudia heḡereḡeredia ai baina kamonai helaoreana.
5 Ḡaubada Iehova ese taiagu vada e hakiraradia,
bena asina gwau edeede, asina raka muri.
6 Dorugu na hebota taudia na henidia,
bona vahagu na auki-huidia ibutudia taudia na mede henidia;
vairagu na hemarai bona hekanudi amo asina hunia.
7 Badina be Ḡaubada Iehova ese e durugumu,
una dainai asina baia;
una dainai vairagu vada na ha-aukaia nadi-vasiga na heto,
bona dibagu ta ese basine hahemaraigu;
8 igwaurai-maorogu tauna na eme kahikahi.
Daika ese baine heai henigu? Baita tore isi hebou.
Lau inaigu be daika? Baine raka kahi mai.
9 A itaia, Ḡaubada Iehova ese e durugumu;
daika ese kereregu baine gwaurai?
A itaia, iboudiai na bae mouka-mouka, dabua na heto;
pitopito ese bae anidia ore.
10 Umui bogaragimui ai daika ese Iehova garina e garimu,
bona ena hesiai tauna erena e kamonaimu?
Daika na dibura ai e rakamu, asi ena diari,
to Iehova ladana e abidadama heniamu,
bona ena Dirava enai e tabe kaumu?
11 A itaia, umui lahi o ha-araiamu
bona lahi tutudia o ha-aramu taumui!
Emui lahi diarina ai ba raka,
bona lahi tutudia diaridia ai danu.
Lau imagu amo bavabia ḡauna binai: