10 Parasa bona Lud bona Put taudia na emu tuari taudia, emu tuari oreana lalonai; kesi bona auri kwara ḡauna na oi lalomu ai e taudia dae; idia edia amo hairaimu o abia. 11 Aravada bona Heleke taudia na maḡumu latadiai e gini heḡeḡe, bona Gamada taudia na kohoromu ai; idia ese oi maḡumu heḡege-madai ai edia kesi e taudia dae; oi hairaimu na vada e haḡuḡurua.

12 Tarasisi taudia na emui ai e hoihoiva, emui kohu idau-idau momo herea daidiai; silver bona auri bona auri haraga-haragana bona auri metauna na e henimui, emui hoihoi ḡaudia davadia. 13 Iavan bona Tubal bona Mesek taudia na emui ai e hoihoiva taunimanima bona auri labora-labora ḡaudia na e henimui, emui hoihoi ḡaudia davadia. 14 Bete-togarama taudia ese hosi bona tuari hosidia bona doniki na e henimui, emui hoihoi ḡaudia davadia.

15 Rodo taudia na emui ai e hoihoiva; kone tanodia momo lalodiai emui hoihoi gabudia e miava; idia ese elefant doadia bona eboni audia e matlai, emui ḡau davadia.‡Eboni be au aukana namo hereana ta. 16 Edom na emui ai e hoihoiva, emui kohu momo herea daidiai; idia ese samarago§Samarago bona ramoto bona kadakodo na herahera nadidia haida ladadia. nadidia bona dabua kakakakadia bona dabua mai heraheradia bona dabua aukadia namo-hereadia bona ramoto bona kadokodo nadidia e henimui, emui hoihoi ḡaudia davadia. 17 Iuda bona Israel tanona taudia na emui ai e hoihoiva; idia ese uit, olive, suke huahuadia matamatadia, bada-ranuna, dehoro bona muramura mai bonana e henimui, emui hoihoi ḡaudia davadia.

18 Damasko taudia na emui ai e hoihoiva, emui kohu momo herea bona emui taḡa bada-herea ḡau idau-idau ai daidiai; idia ese Helebono ena vine ranuna, bona mamoe huina kurokurona 19 bona vine ranuna Usala amo e henimui, emui hoihoi ḡaudia davadia; o hoihoilai ḡaudia haida na auri hururu-hururuna bona kida bona kane.*Kida bona kane na Heberu taudia edia muramura ladadia. 20 Dedan taudia na emui ai e hoihoiva, edia hoihoi ḡaudia na hosi dorudia dabuadia. 21 Arabia bona Kedara lohiadia Iboudiai edia hoihoi ḡaudia na o uralai bada: ḡaudia na mamoe natudia bona mamoe mamaruanedia bona nani; ini ḡau na emui ai e hoihoilaiva.

22 Sieba bona Raama edia hoihoi taudia na emui ai e hoihoiva; idia ese aniani mamidia ihanamolaidia muramuradia namo-hereadia idau-idau bona herahera nadidia idau-idau iboudiai bona gold e henimui, emui hoihoi ḡaudia davadia. 23 Haran bona Kane bona Eden bona Asuru bona Kilimada taudia na emui ai e hoihoiva. 24 Idia ese hahedoki namo-hereadia, bona dabua vaiuridia, bona dabua mai heraheradia, bona dabua gedadia, oromadia idau-idau ḡaudia, e loku ḡoevaḡoeva ḡaudia, na emui ai e hoihoilai. 25 Tarasisi lagatoidia na o vatudia, emui hoihoi ḡaudia bae loalai totona.