1 Bena Iehova ese Mose e hamaoroa, eto, Hahehisi ta ma Farao latanai bona Aigupto latanai aina siaia, maurinai ia ese baine kahumui nege; baine kahumui nege negana ai danu baine lulumui vaitani. 2 Harihari Israel taudia ba haduadia, ta ta ese dekena tauna dekena tauna bae noidia, hahine danu unu bae kara toma, herahera ḡaudia, silver bona gold amo e karamu, bae noilai. 3 Bena Iehova ese Aigupto taudia lalodia e hakerudia Israel taudia ediai; Mose danu ladana na bada Aigupto ai, Farao ena hesiai taudia ediai bona hanua taudia ediai.

4 Bena Mose eto, Iehova na ini e gwau tomamu: Malokihi ai Aigupto tanona baina rakaia hanai; 5 bena Aigupto taudia natudia roboadia iboudiai bae mase, Farao, terono ai e helaimu tauna, natuna roboana, ela bona hesiai hahinena, uit iririlaina nadina e giroamu hahinena, natuna roboana, ela bona boromakau iboudiai natudia roboadia danu. 6 Aigupto tanona idoinai tai badana baine vara; nega ta unu asie tai toma ema bona hari, bona ina murinai danu unu basie tai toma. 7 A Israel taudia mai edia boromakau ida sisia ta ese basine kwaru henidia: taunabunai, vada ba diba Iehova ese Aigupto taudia bona Israel taudia vada e hididia. 8 Bena ini emu hesiai taudia iboudiai lau dekegu baema, vairagu ai bae goru diho, baeto “A raka lasi, emu orea taudia iboudiai ida”; una murinai baina raka lasi. Bena ia na Farao vairana amo e raka lasi ma badu ḡaraḡarana ida.

9 Bena Iehova ese Mose e hamaoroa, eto Farao basine kamonai henimu, egu hoa karadia Aigupto tanona ai bae momo helaoreana. 10 Mose bona Aaron ese unu hoa karadia iboudiai Farao vairanai e kara; a Iehova ese Farao lalona e ha-aukaia, taunabunai ia ese Israel taudia na ena tano amo se kahudia nege.

<- ESODO 10ESODO 12 ->