1 Darauese Ahasuero, tau Mede, ese Kaldea basileiana e pavapavaia laḡanina gini-gunana ai, 2 ena lohia laḡanina gini-gunana lalonai lau Daniel buka lalodia amo na diba laḡani hida baela ela bona Ierusalem ihavahuna baine guguru, Iehova ena hereva peroveta tauna Ieremia enai e kau heḡereḡerena; unu laḡanidia be hitu-ahui.

3 Bena Ḡaubada Dirava na haḡerea, ḡuriḡuri ai bona noinoi ai na tahua, mai anivagagu bona mai puse-dabuagu bona mai kahugu ida. 4 Iehova, egu Dirava, na guria, egu dika na gwaurai hedinarai, nato:

Ḡaubada e, Dirava badana bona mai garina, oi ese emu gwauhamata bona emu hebogahisi o hahesiriudiamu, e ura henimumu bona emu haheḡani e badinadiamu taudia ediai. 5 Ai na vada a kara dika, vada a kara kerere, kara havara bona daḡedaḡe karadia vada a kara, emu haheḡani bona emu taravatu daladia amo vada a raka siri; 6 emu hesiai taudia, peroveta taudia, oi ladamu ai emai pavapava, emai lohia, senemai bona tano taudia iboudiai e hereva henidia taudia na asia kamonai henidia.

7 Ḡaubada e, kara maoromaoro na oiemu ai, a ai emai ai na hemarai, ina dina ai heḡereḡerena, Iuda taudia ediai, bona Ierusalem inoholaina taudia ediai, bona Israel idoinai enai, gabu kahikahi taudia bona gabu daudau taudia, vada o luludia lao tanodia iboudiai lalodiai; badina be idia ese oi ihadikamu karadia vada e kara.

8 Ḡaubada e, hemarai na ai emai ai, bona emai pavapava bona emai lohia bona senemai ediai, badina be ai ese vada a kara dika henimu. 9 Ḡaubada, emai Dirava, na mal hebogahisina bona mai dika igwau-taona; badina be ai ese vada a daḡedaḡe henia 10 bona Iehova, emai Dirava, gadona asia kamonai henia, ena taravatu, ena hesiai peroveta taudla eaia amo vairamai ai e atodia taravatudia, asia badinadia. 11 Israel idoinai ese emu taravatu vada e tataia utu; vada a raka siri, oi eremu ikamonaina asia ura. Heuduguirai bona gwauhamata helaḡana Dirava ena hesiai tauna Mose ena taravatu ai e hetore gaudia, na ai latamai ai vada eme hebubu dobi, badina be ai ese vada a kara dika henia. 12 Ia ese ena hereva vada e hamomokanidia. ai latamai ai bona ikwaramai taudia latadiai e gwaurai gaudia, hahehisi karana badana na ai latamai ai vada e mailaia; badina be guba idoinai henunai kara ta nega ta ai se karaia, Ierusalem vada e kara henia heḡereḡerena. 13 Mose ena taravatu ai e torea heḡereḡerena ai, ina hahehisi karana idoinai na ai latamai ai vada e kau, ḡau tamona Iehova, emai Dirava, asia noi henimu ba lalo namo henimai, emai kara havara amo ba mede kerehai bona emu hereva momokanidia nahuadia baia toho helaoreana. 14 Taunabunai Iehova ese hahehisi karana vada e haheḡaeḡaea bona latamai ai vada e mailaia; badina be Iehova, emai Dirava, na maoromaoro, vada e kara karadia iboudiai lalodiai, bona ai ese ia erena asia kamonaia.

15 Ḡaubada e, emai Dirava e, oi ese emu bese taudia na Aigupto tanona amo o hakaudia Lasi, mai imamu goadana ida, bona ladamu vada o habadaia, ina dina ai heḡereḡerena; a harihari ai ese vada a kara dika, vada a kara havara.

16 Ḡaubada e, emu kara maoromaorodia iboudiai heḡereḡeredia ai, emu badu bona emu lalo-dika na emu hanua Ierusalem, emu ororo helaḡana, amo baine siri; badina be emai kara dika bona senemai edia kara havara daidiai, Ierusalem bona oiemu bese na gwaurai-gwaurai herevana ai vada e hahelao, e ḡeḡemai dae taudia iboudiai bogaragidiai. 17 Taunabunai, emai Dirava e, emu hesiai tauna ena ḡuriḡuri bona ena noinoi ba hakala henidia, bona oi sibomu daimu ai, Ḡaubada e, oi vairamu ese emu gabu helaḡana, vada eme vahu gabuna, baine hadiaria.

18 Egu Dirava e, laiamu a hakala, a kamonai, matamu a hapapa, ḡaḡaemai ai ba itamai, bona oi ladamu e nemailaia hanuana ba itaia. Badina be emai noinoi na oi vairamu ai e daemu, dia ai emai kara maoromaoro daidiai, a oiemu hebogahisi badana dainai. 19 Ḡaubada e, a kamonai; Ḡaubada e, emai dika ba gwau tao; Ḡaubada e, ba lalomai, ba kara; egu Dirava e, basio halahe, oi sibomu daimu ai, badina be emu hanua bona emu bese na oi ladamu e hahenemailaia.

20 Egu hereva bona egu ḡuriḡuri lalodiai egu kara dika bona egu bese Israel edia kara dika na gwaurai hedinaraiva, bona Iehova, egu Dirava, na noinoi heniava, egu Dirava ena ororo helaḡana dainai; 21 bena, ḡuriḡuri dounu na gwauraiava ai, hari tau Gabriel, mata-hanai ai na itaia guna tauna, na dekegu e roho mai haraga, adorahi boubouna negana ai. 22 Ia na ema, e hereva henigu, eto, Daniel e, aonega bona lalo-parara batna henimu totona vada na hedinaraimu. 23 Emu noinoi matamana ai hereva ta e lasi, bena ihamaorolaimu totona vada nama, badina be oi na e lalokau henimu badamu; taunabunai, hereva ba haeroa, bona mata-hanai anina ba diba.

24 Laḡani hitu nega hahitu-ahui be vada e gwauraidia, emu bese bona emu hanua helaḡana latadiai, kerere iha-orena, kara dika ihadokona, kara havara irohodia, baine mia hanaihanai kara-maoromaorona imailaina, matahanai bona peroveta tauna ihamomokanina bona helaga-herea gabuna ihorona totodia. 25 Taunabunai ba diba, lalomu danu baine parara, Ierusalem ihanamo-louna bona ihaginina herevana baine hedinarai negana ela bona lohia ta, e horoa tauna, bainema na pura hitu. Bena pura tauratoi-ahui rua lalodiai bae haginia lou, mai ariarana bona mai iḡeḡe-ahuna koupana, a hekwakwanai momo negana ai. 26 Bena unu pura tauratoi-ahui rua muridiai, e horoa tauna na bae negea daure, ḡau ta ienai basine mia; bona bainen-a lohiana ena orea taudia ese hanua bona gabu helaḡana bae habuadia tari. Utu-utu ese baine ha-orea, bona tuari do baine hesiriu ela bona dokona. Hahevahu karadia vada e gwaurai hata. 27 Bena ia ese hutuma ida bae hegwau hamata heheni, gwauhamata aukana ta, ela bona pura ta baine ore. Pura kahana ai ia ese boubou bona herahia karadia baine hadokodia, bona ḡau dika-rohorohona hanina latadiai hahevahu tauna ta bainema, ela bona vada e gwauraia hata dokona negana na hahevahu tauna latanai baine hebubu dobi.

<- DANIEL 8DANIEL 10 ->