1 Una negana ai King Herod ese ekalesia taudia haida e dabaidia tao, baine hadikadia eto. 2 Iakobo, Ioane kakana, na ia ese dare amo e alaia mase. 3 Bena ia ese Iuda taudia e itadia, idia ese una kara e moalelaia; bena Petro danu ma e dabaia tao. Una na Flaoa-asie-hatubua Ariana dinadia ai. 4 E dabaia tao, dibura rumana ai e koua; bona tuari taudia gwauta-tauratoi e gwauraidia hidi, hahani hahani amo bae gimaia. Ena lalo-hadai be Lagau-hanai Ariana murinai hanua taudia vairadiai baine hakaua lasi eto. 5 Taunabunai, Petro be dibura rumana ai e gimaiava; a ekalesia taudia ese Dirava e noia goadagoada Petro ena.

6 Herod ese baine hakaua lasi eto; bena una hanuaboi ai Petro na tuari taudia rarua ihuadiai e mahutava, mai iḡuina gadeadia danu rua. Hegima taudia danu dibura rumana iduarana vairanai e gima. 7 Bena Lohiabada ena aneru ta badibadinai e gini, diari ese danu daiutu e hadiaria. Aneru ese Petro ohena e pataia, e haoa, eto, A tore isi haraḡa-haraḡa. Bena gadea na imana ruaosi amo e moru. 8 Hari aneru ese ma e haduaia, eto, Emu rami a rioa, emu tamaka a ḡui. Bena unu e kara toma. Aneru ma eto, Emu dabua a hetarulaia, murigu ai ba raka. 9 Petro e raka lasi, hari aneru e ḡavaia; to e daradara, hari aneru ena kara na momokani eiava; ia banava e mata hanai eto. 10 Hegima taudia gini-gunana bona iharuana raruosi ese vada e rakadia hanai, bena auri ikoukouna amo e lasi, hanua ilasi-henina ikoukouna. Hari ikoukou na sibona idia vairadiai vada e hekeho hata, bona raruosi e raka lasi, ariara ta amo e raka hanai. Bena hari aneru ese e rakatania.

11 Bena Petro lalona e parara, eto, Harihari name diba momokani, Lohiabada ese ena aneru vada e siaia, Herod imana amo bona Iuda taudia e larova karadia iboudiai amo vada eme hamaurigu. 12 Lalona e hadaia, bena Maria ena ruma ela: una Maria na Ioane Mareko sinana. Unuseni ai taunimanima hutuma e hebouva, e ḡuriḡuriva. 13 Bena Petro na iduara ai vada e pidipidi. Bena kekeni ta, ladana Roda, na ikehona ela; 14 a Petro gadona dibana, bena ena moale bada dainai iduara se kehoa, to e heau vareai, e hamaorodia, Petro na iduara murinai gini. 15 Idia ese ia e gwau henia, eto, Oi na e kavamu a? A ia na e hereva goadagoada, eto, Lasi, na gwau momokanimu. Idia eto, Una na readia ia laulauna. 16 A Petro na e pidipidi loulou, ela bona idia ese iduara e kehoa, e itaia, vada e hoa bou. 17 Bena ia ese imana amo e taodia ahu, asi reḡerḡedia bae noho; bena Lohiabada ese dibura rumana amo e hakaua lasi sivaraina e hamaorolaidia. Bena ma eto, Iakobo bona varavarada na ba hamaorodia. Bena e rakatanidia, idau gabu ela.

18 Daba e rere, heloḡo-heloḡo dia maraḡi tuari taudia bogaragidiai e vara, Petro na ede ela heloḡo-heloḡona. 19 Herod ese e tahua, to se davaria. Bena hegima taudia e nanadaidia murinai e gwau isi, bae hakaudia lasi, bae aladia mase. Bena Iudea e rakatania, e diho, Kaisarea ela, unuseni ai eha noho.

20 Herod ese Turo mai Sidono taudia e badu henidia dikadika; una dainai idia iboudiai lalodia e hatamonaia, bena dekena ela. Idia ese Ḡaubada ena mahuta daiutuna ita-taona tauna, ladana Blasto, e hamarumarua guna; murinai herohemaino e gwauraia, badina be Ḡaubada ena tano amo edia tano taudia ese aniani e abiva. 21 Bena e gwauraia hidi dinana ai, Herod ese pavapava dabuadia e doki, hahemaoro teronona ai e helai kau, e haroro henidia matama. 22 Bena hanua taudia e lolo, eto, Ena na dirava ta gadona, dia taunimanima gadona.

23 Una negana ai Lohiabada ena aneru ta ese e huaria, badina be ia ese Dirava se heatolaia. Bena gaigai-gaigai ese tau-anina e ania, vada e mase vaitani.

24 A Dirava ena hereva vada e tubu badabada.

25 Bena Banaba bona Saulo ese edia ḡaukara e ha-orea, bena Ierusalem e rakatania, e lou ela; Ioane Mareko danu e hakaua lao, idia ida vada ela.

<- APOSETOLO EDIA KARA 11APOSETOLO EDIA KARA 13 ->