1 Iehova ese Natan na David dekena e siaia lao. Ia na dekenai e kau, bena e hereva henia, eto, Hanua ta lalonai tatau rarua e nohova, ta be taga tauna, ma ta ogoḡami tauna. 2 Taḡa tauna ena mamoe bona nani seridia na momo herea; 3 a ogoḡami tauna ena mauri ḡauna na tamona mo, mamoe natuna hahinena ta, e hoia ḡauna. Ia ese e ubua; ia natuna ida ia badibadinai e bada oho bada oho; ana aniani bahudia e ani, bona ena kebere amo ranu e inu, bona kopana ai e hekure, ia natuna kekenina na heto. 4 Nega ta laolao tauna ta ema, una taga tauna dekenai; bena una taḡa tauna na lalona se ura iena mamoe ta eiava nani ta ena seri amo baine abia, baine nadua, laolao tauna ana. A ia be ogoḡami tauna ena mamoe natuna e abia, e nadua, ena vadivadi tauna ana.

5 Bena David ena badu e ḡaraḡara una tau enai. Ia ese Natan e hamaoroa, eto, Iehova e maurimu hegereḡerena, una kara e karaia tauna na bema mase hari namo. 6 Ia ese mamoe natuna davana do baine heni hahani, unu e kara toma dainai; badina be asi ena hebogahisi.

7 Bena Natan ese David ma e hereva henia, eto, Tauna na oi. Iehova, Israel Diravana, ini e gwau tomamu: Lau ese na horomu, Israel pavapavana, bona Saulo imana amo na hamaurimu. 8 Biagumu ena ruma na henimu, bona biagumu adavana na henimu, bavadavadia; bona Israel bona Iuda iduhudia na henimu. Una bema maraḡi, ma bama habadaia harua emu. 9 Dahaka dainai Iehova ena hereva vada o dadaraia? Dahaka dainai ia vairanai vada o kara havara? Uria, tau Hiti, na dare amo vada o alaia, ia adavana vada o abia, oi adavamu ai vada o halaoa; bona Amono taudia edia dare amo vada o alaia mase. 10 Benaini, dare na emu ruma amo basine heabi oho ela bona hanaihanai; badina be lau vada o dadaraigu, bona Uria tau Hiti adavana vada o abia, oi adavamu ai vada o halaoa. 11 Iehova na ini e gwau tomamu; Oi sibomu emu ruma lalona amo dika baina havaraia latamu ai; adavamu na oi vairamu ai baina abidia oho, dekemu tauna baina henia, bena ia na ina dina diarina ai oi adavamu ida bae eno bou. 12 Badina be una kara o karaia hehuni; a lau ese ina kara baina karaia hedinarai, Israel taudia iboudiai vairadiai, bona dina ai.

13 Bena David ese Natan e hamaoroa, eto, Iehova vairanai vada na kara dika. Natan ese David e hamaoroa, eto, Iehova ese emu dika vada e gwau tao, basio mase; 14 ḡau tamona, una kara ai Iehova vada o dadaraia vaitani dainai, hari vada e vara merona na do baine mase.

15 Natan na ena ruma ela. Bena Iehova ese David natuna, Bataseba ena amo e havaraia merona, na e daua toho; bena mero na e gorerea. 16 Bena David ese Dirava e noia, natuna dainai. David na e ani vaga danu, bona ruma ai e raka vareai, tano ai e hekure rani. 17 Ena ruma tau-badadia na badibadinai e gini, tano amo bae hatorea isi eto; to ia na se ura. Aniani idia ida se aniva danu.

18 Dina ihahituna ai mero na e mase. Bena David ena hesiai taudia na ena mase herevana ihamaorolaina garina e gariva; badina be idia eto, A itaia, mero maurina ai ta hereva henia, to se kamonai henida; matona, ede baita hamaoroa toma mero na vada e mase? Sibona baine heala dahaka. 19 David ese ena hesiai taudia e itadia, e hemaunu heheni, bena lalona e parara, mero na vada e mase. Bena David ese ena hesiai taudia e nanadaidia, eto, Mero na e mase a? Idia eto, Vada e mase. 20 Bena David na tano amo e tore isi, e digu, tauna na dehoro amo e dahua, dabua ḡoevadia e doki; bena Iehova ena dubu ai e raka vareai, e toma diho. Una murinai ia na ena ruma ela; bena e hereva negana ai idia ese aniani ia vairanai e atoa, bena e aniani. 21 Bena ena hesiai taudia ese e hereva henia, eto, Ede vada o kara toma? Mero maurina ai o ani vaga bona o taitai; a mero na e mase, bena o tore isi, o aniani. 22 Ia eto, Mero na dounu mauri negana ai, na ani vaga bona na taitai, badina be lau nato “Daika dibana, Iehova baine bogagu hisi bena mero na baine mauri eiava?” 23 A harihari vada e mase; baina ani vaga anina be dahaka? Baina hamauria lou diba a? Lau na ia dekena bainala, a ia na lau dekegu basine lou mai.

24 Bena David ese adavana Bataseba lalona e hamarumarua; bena dekenai e raka vareai, raruosi na e eno bou. Bena hahine ese mero ta e abia; ladana na e hatoa Solomon. Iehova ese e lalokau henia, 25 bona gwaukau ta peroveta tauna Natan uduna amo e siaia. Taunabunai, mero ladana ma e hatoa ledidia,[a] Iehova dainai.

26 Ioab ese Raba, Amono taudia edia hanua ta, e tuari henia, bena hanua pavapavana ena hanua e abia. 27 Bena Ioab ese gwaukau taudia na David dekena e siaidia, eto, Raba vada na tuari henia, bona ranu hanuana vada na abia. 28 Taunabunai, taunimanima oredia ba haboudia, hanua na ba koua heḡeḡe, bavabia, lau ese hanua baina abia bena ladagu bae nemailaia na garina. 29 Taunabunai, David ese orea taudia iboudiai e haboudia, Raba ela, e tuari henia ela bona e abia. 30 Bena edia hanua pavapavana ena havava ḡauna na kwarana amo e abia oho: metauna be gold talent ta; bona lalonal na mai herahera nadina herea-daena ta. Bena David kwarana ai e atoa kau. Bena kohu momo herea na hanua ai e dadi, e laohai. 31 Hanua taudia danu e hakaudia lasi, ḡaukara e henidia, iri bona aun isivadia bona auri iradia amo bae ḡaukara; bona e siaidia danu, raro amo e kara nadidia igabudia ai bae ḡaukara. Amono hanuadia iboudiai na unu e karadia toma. Bena David bona ena orea taudia iboudiai na Ierusalem e lou lao.

<- 2 SAMUEL 112 SAMUEL 13 ->