1 Lau na uramu egu kavakava sina ba haheaukalaia. Mani emui kara ba haheauka henigu. 2 Badina be Dirava ena vaḡeḡe heḡereḡerena ai daimui na vaḡeḡemu; e kara Keriso enai maohenimui vada na kara, haneulato rami-hebouna na heto. 3 To lau na garimu, gaigai ese Heva e koia heḡereḡerena ai, helalo idau-idau ese bae koimui, bena emui lalokau momokanina bona ḡoeva-daena Keriso enai na ba rakatania. 4 Ta ese Iesu idauna bema harorolaia, dia ai ese a harorolaiava heḡereḡerena eiava Lauma idauna boma abia dae, dia o abia dae guna laumana heḡereḡerena eiava sivarai namo idauna boma kamonai, dia o kamonai guna ḡauna heḡereḡerena o abi dae haraḡamu ani? 5 Lau na tomamu, ene aposetolo hereadia na ḡau ta ai asie hereagumu. 6 Ena be hereva igwauraidia ai lau na dia heḡereḡere, to lalogu ena diari na dia unuheto: ḡau iboudiai emui ai vada a hahedinaraiva.

7 Sibogu na hahemanau, umui bae imodaimui totona; Dirava sivaraina namona na harorolai henimuiva asi davagu. Na kerere a? 8 Ekalesia oreadia idaudia edia kohu na henao na heto, davagu ai na halao, umui isiaimui ilao-henina totona. 9 Dekemui ai na nohova negana ai nega haida na dabuva, to umui asina hahekwarahimuiva; badina varavarada, Makedonia amo ema taudia, ese egu gabu ḡaudia e heniguva. Ḡau ta ai asina hahekwarahimuiva, bona basina hahekwarahimui.

10 Keriso ena hereva momokani lalogu ai e miamu dainai, tau ta ese ina egu heaḡi badina na egu amo basine abia oho, Akaia kahana idoinai. 11 Badina be dahaka? Asina Ialokau henimuimu a! Dirava dibana na lalokau henimuimu. 12 A na karamu karadia do baina kara; bena edia dala e tahuamu bae heaḡi, baeto ḡaukara ai idia na ai heḡereḡeremai, taudia na dala ta basie davaria. 13 Badina be idia na aposetolo koikoidia, ḡaukara koikoi taudia, sibodia Keriso ena aposetolo ai e hahelao. 14 Unu na basita hoalaidia. Badina be Satana sibona diari aneruna ai e hahelao; 15 unuhetomana ena hesiai taudia ese kara maoromaoro taudia ai e hahelaomu; a dokodia ai be edia kara ihaheḡereḡeredia bae abi.

16 Na gwau loumu, ta basineto lau na kavakava. A unu boma laloa toma, boma haheauka henigu, kavakava tauna boma haheauka henia na heto; bena taina bama heaḡi. 17 Hari na hamaorolaimuimu herevadia na dia Lohiabada ena amo, to sibogu na hereva kavamu, na heaḡi kavamu. 18 Hutuma ese tau-anina ḡaudia e heaḡilaimu; benaini, lau danu unu baina kara toma. 19 Badina be umui, aonega taumui, na kavakava taudia ihaheaukahenidia mai dibamui. 20 Hesiai ai e ḡuimuimu tauna o haheauka heniamu; amui e ani oremu tauna o haheauka heniamu; e hahekwarahimuimu tauna o haheauka heniamu; e dadaraimuimu tauna o haheauka heniamu; vairamui e huaridiamu tauna o haheauka heniamu. 21 Ai na a hemaraimu, badina ai na mamanoka-mamanoka. A ta baine heaḡi, lau danu baina heaḡi. Na hereva kavamu, ani? 22 Idia na Heberu taudia a? Lau danu. ldia na Israel besena a? Lau danu. Idia na Abraham garana a? Lau danu. 23 Idia na Keriso ena hesiai taudia a? Lau ese na hereadiamu. Na hereva kavamu, ani? Na hekwarahi bada; dibura rumadia ai e kougu loulou; e dadabagu dikadikava; nega hoho masegu danu e kahira-kahirava. 24 Nega ima Iuda taudia ese hekwadi toi-ahui taurahani-ta amo e kwadigu. 25 Nega toi au amo e dadabagu. Nega ta nadi amo e hodogu. Nega toi na ḡui kau lagatoidia e hure kau; hanuaboi ta dina ta gadobada ai na hure. 26 Egu laolao na momo: sinavai ai na hekwarahi; dadidadi taudia imadia ai na hekwarahi; egu bese taudia imadia ai na hekwarahi; idau bese taudia imadia ai na hekwarahi; hanua lalodiai na hekwarahi; tano ḡaḡaedia ai na hekwarahi; gadobada ai na hekwarahi, varavara koikoi imadia ai na hekwarahi. 27 Na hekwarahimu; taugu e boeramu; na noga rani louloumu; e hitologumu, na ranu masemu, asi agu; keru ese e hamasegumu; dabua ai na dabumu. 28 Dia ini tau-anina ḡaudia mo; to lalogu danu dina iboudiai e hekwarahimu, ekalesia oreadia ireḡudia ai. 29 Daika e manokamu, bena lau asina manokamu? Daika e hekwakwanaimu, bena lau lalogu se siahumu? 30 Lau bama heaḡi, bena egu manoka-manoka baina heaḡilaia. 31 Dirava, eda Lohiabada Iesu Keriso Tamana, bae imodaia hanaihanai Diravana, ia hari dibana lau na asina koikoimu. 32 Damasko ai, Areta Ḡaubada ena gavana tauna ese Damasko hanuana e gimaia, lau idabai-taogu totuna. 33 To bosea lalonai e udagu, maḡu gaba-mauruna amo e tugu dobi; bena na heau mauri, ia imana lalona amo.

<- 2 KORINTO 102 KORINTO 12 ->