1 Iehosafat na mai ena taḡa bada, bona imatauraina danu na bada. Iena iduhu bona Ahaba ena iduhu na e headava heheni. 2 Laḡani haida vada ela, bena ia na Samaria e diho ela, Ahaba dekenai. Bena Ahaba ese mamoe bona boromakau momo herea e aladia mase, ia bona ia ida ela taudia adia, bona e ha-uraia ia na Ramoto-gilead baine tuari henia. 3 Ahaba, Israel pavapavana, ese Iehosafat, Iuda pavapavana, e nanadaia, eto, Oi na lau ida Ramoto-gilead aitala eiava? Ia na e haere henia, eto, Lau oi na tamona, lauegu orea bona oiemu orea danu tamona. Tuari ai baia bamomu.

4 Bena Iehosafat ese Israel pavapavana e hamaoroa, eto, Iehova ena hereva do ba tahua guna. 5 Bena Israel pavapavana ese peroveta taudia e haboudia, tatau sinahu-hani; bena e nanadaidia, eto, Ramoto-gilead baia tuari henia eiava basina tuari henia? Idia na e haere, eto, Vada aola; badina be Dirava ese hanua pavapavana imana ai baine atoa. 6 A Iehosafat eto, Iehova ena peroveta tauna ma ta dia noho iniseni ai, bena ia ma baitama nanadaia a? 7 Israel pavapavana ese Iehosafat e haere henia, eto, Tau ta do noho, iena amo Iehova ena hereva baitama tahua; ladana na Mikaia, Imla natuna. A lau ese na inai heniamu, badina be ia na nega ta ḡau namodia egu ai se perovetalai, a nega iboudiai ḡau dikadia mo. A Iehosafat eto, Hanua pavapavana na unu basine gwau toma. 8 Bena Israel pavapavana ese ena heitatao tauna ta e boiria, eto, Mikaia Imla ba hakaua mai haraḡa. 9 Una negana ai Israel pavapavana bona Iehosafat, Iuda pavapavana, na edia terono ai hehelai, edia pavapava dabuadia e kara, uit ikwadina gabuna ai, Samaria hanua ikoukouna ai; bona peroveta taudia iboudiai na idia vairadiai e perovetava. 10 Bena Sedekia Kenana ese ena auri doadia e kara, bona e hereva, eto, Iehova na ini e gwau tomamu: Ini ḡau amo Suria taudia ba doridia lao, ela bona ba habuadia tari. 11 Bena peroveta taudia iboudiai danu unu e peroveta toma; ma eto, Ramoto-gilead baola, ba kwalimu; Iehova ese hanua pavapavana imana ai baine atoa.

12 Gwaukau tauna na Mikaia iboirina ela, bena e hamaoroa, eto, A kamonai: peroveta taudia edia hereva na vada e hatamonaia, hanua pavapavana ihanamona; oiemu hereva danu idia ta ena hereva ida baine heḡereḡere, hereva namona ba gwauraia. 13 A Mikaia eto, Iehova e maurimu heḡereḡerena, egu Mrava ese ede baine hereva henigu toma, una mo baina gwauraia.

14 Ia na hanua pavapavana dekenai e kau; bena hanua pavapavana ese e nanadaia, eto, Mikaia e, Ramoto-gilead na baia tuari henia eiava basina tuari henia? Bena Mikaia ese e haere henia, eto, Aola, ba kwalimu; imamu ai bae heato kau. 15 A hanua pavapavana ese ma e hamaoroa, eto, Nega hida baina sisiba henimu, Iehova ladana ai hereva ta basio gwaurai henigu, a hereva momokani mo? 16 Bena Mikaia eto, Lau ese Israel idoinai na itadia, ororo ai e heau karoho, mamoe asi ireḡudia na heheto; bena Iehova eto, Ini na asi biagudia, ta ta ena ruma ena ruma aela, mai mainodia ida. 17 Bena Israel pavapavana ese Iehosafat e hamaoroa, eto, Na hamaoromu ani, ia na hereva namodia latagu ai basine gwaurai, a hereva dikadia mo?

18 Mikaia ma eto, Taunabunai, Iehova ena hereva ba kamonai. Iehova na ena terono ai helaina ai na itaia, bona guba oreana idoinai ia badinai gigini, haida idibana kahana ai bona haida laurina kahana ai. 19 Bena Iehova eto, Daika ese Ahaba, Issel pavapavana, baine koia, bena bainela, Ramoto-gilead ai baine mase. Bena ta ese hereva ta e gwauraia, ma ta hereva ta. 20 Bena lauma ta e raka lasi, Iehova vairanai e gini, eto, Lau ese baina koia. Iehova ese e nanadaia, eto, Edena dala amo? 21 Ia eto, Bainala, koikoi laumana ai baina hahelao, ena peroveta taudia iboudiai ududia ai. Iehova eto, Ba koia, emu koikoi baine kwalimu; aola, unu ba kara toma. 22 Taunabunai o kamonaimu, Iehova ese koikoi laumana na emu peroveta taudia ududia ai vada e atoa; Iehova ese hereva dikana oi latamu ai vada e gwauraia.

23 Sekedia Kenana na e raka kahira, bena ia ese Mikaia na vahana ai e pataia, eto, Iehova Laumana na ede e rakatanigu toma oi ihereva-henimu totona a? 24 Mikaia eto, Laloma daiutuna ai ba heau vareai, komu totona, dinana ai vada ba itaia. 25 Bena Israel pavapavana eto, Mikaia ba dabaia tao, Amon, hanua lohiana, bona Ioasa, hanua pavapavana natuna, dekedia ba loulaia; 26 baoto, Hanua pavapavana na ini e gwau tomarnu: Ina tau na dibura rumana ai ba koua, flaoa kavakava bona ranu taidia mo ba henia, ela bona maino ai baina lou mai. 27 Bena Mikaia eto, Bema oi na maino ai ba lou mai, bena Iehova na lauegu amo vada se hereva. Ma eto, Taunimanima ibouboumui ai, a kamonai.

28 Taunabunai, Israel pavapavana bona Iehosafat, Iuda pavapavana, na Ramoto-gilead ela. 29 Bena Israel pavapavana ese Iehosafat e hereva henia, eto, Lau na ita-itagu baina ha-idaua, bainala tuari lalonai, a oi be emu pavapava dabuadia ba doki. Bena Israel pavapavana na sibona ita-itana e ha-idaua; bena idia na ela tuari lalonai. 30 Suria pavapavana ese ena kariota biagudia vada e haḡanidia, eto, Taunimanima maraḡidia eiava badadia basio tuari henidia, a Israel pavapavana mo. 31 Kariota biagudia ese Iehosafat e itaia, bena idia eto, Una na Israel pavapavana; taunabunai, idia na e heau kerehai, ia bae heatu henia eto. A Iehosafat na e lolo, bena Iehova ese e durua. Dirava ese iena amo e veridia oho, 32 badina be kariota biagudia ese e itaia, ia na dia Israel pavapavana, bena iḡavana amo e lou. 33 A tau ta ese diba ta e kinoa kava, Israel pavapavana ena auri dabuana bona ena keme aurina padadiai e taraki. Taunabunai, ia ese ena kariota e heaulaiava tauna na e hamaoroa, eto, A haheaua hegiro, tuari murimurinai ba laohaigu, badina be vada na bero. 34 Una dina ai tuari na auka herea. Israel pavapavana na sibona e hedori tao, ena kariota ai, Suria taudia e vaira henidia ela bona ado e rahi. Bena dina e diho ai e mase.

<- 2 SISIGA 172 SISIGA 19 ->