1 SAMUEL 29

Filistia lohiadia ese David e dadaraia

1 Filistia taudia ese edia tuari oreadia e haboudia Afek ai; bona Israel taudia na Iesrele ranu gurina badibadinai e taruha. 2 Filistia lohiadia na edia sinahu sinahu ida bona edia daha daha ida e raka lao; bona idia muridiai David bona ena orea taudia na Akisi ida e raka. 3 Bena Filistia edia tuari biagudia eto, Ini Heberu taudia na dahaka e karamu iniseni ai? Akisi ese Filistia edia tuari biagudia e haere henidia, eto, Ina na David, ani, Israel pavapavana Saulo ena hesiai tauna; ia na dina momo bona laḡani haida lau dekegu ai vada e noho, bona ena kerere ta asina davaria, egu ai e hanai negana ema bona hari ina dina. 4 A Filistia edia tuari biagudia ese e badu henia, bena e gwau henia, eto, Ena tau a siaia lou, o henia gabuna baine lou lao; ia na ita ida basine diho tuari gabuna, tuari lalonai baine inai henida na garina. Badina be ina tau na ena lohia ida ede baine herohemaino toma? Ini tatau kwaradia amo ani? 5 Ina na David, ani, edia mavaru ai e anelaia, eto,

Saulo ese ena daha daha e aladia,

A David ese ena gerebu gerebu e aladia.

6 Bena Akisi ese David e boiria, eto, Iehova e maurimu heḡereḡerena, oi na mai momokanimu ida, bona lau na tomamu oi na lau ida baita raka hebou tuari lalonai be namo; badina be lau ese emu kerere ta asina davaria, lau dekegu ai o kau dinana amo ema bona hari dina. Ḡau tamona, hari lohia na asie ura henimumu. 7 Taunabunai, harihari a lou, mai mainomu ida aola, Filistia taudia lohiadia ba habadudia na garina.

8 Bena David ese Akisi e hamaoroa, eto, Lau be dahaka vada na karaia? Emu hesiai tauna enai dahaka kerere vada o davaria, oi isiaimu na lao heni matama dinana amo ema bona hari, bena una dainai lau na basinala, egu lohia bona egu pavapava inaina ituari-henidia a?

9 Bena Akisi ese David e haere henia, eto, Lau dibagu oi na asi emu kerere lau vairagu ai, Dirava ena aneru heḡereḡerena; ḡau tamona Filistia edia tuari biagudia vada e hereva, eto “Ia na ita ida tuari basinela”. 10 Taunabunai, daba matana ai ba tore isi, emu lohia ena hesiai taudia, oi oma negana ai e bamomuva taudia, ida; daba matana ai ba tore isi, gabu baine diari-diari vada ba raka. 11 Taunabunai David na daba matana aie raka, mai ena orea taudia ida, Filistia tanona bae lou henia totona. A Filistia taudia na Iesrele e dae lao.

<- 1 SAMUEL 28 1 SAMUEL 30 ->