1 HANUA PAVAPAVADIA 14

Ahia ena peroveta Ieroboam latanai

1 Una negana ai Ieroboam natuna Abia na e gorerea. 2 Bena Ieroboam ese adavana e hamaoroa, eto, A tore isi, oromamu ba ha-idaua, taunimanima basie diba oi na Ieroboam adavana; bena Silo baola. A itaia, peroveta tauna Ahia, e herevalaigu ina bese ena pavapava ai bainala eto tauna, na unuseni ai. 3 Flaoa igabudia gwauta bona dikea haida bona bada-ranuna kavabu ta bavabi kau, ia dekena baola; ia ese baine hamaoromu dahaka baine vara ina mero enai.

4 Ieroboam adavana na unu e kara toma; e tore isi, Silo ela, Ahia ena ruma ai e kau. Hari Ahia na ḡau ta se ita, badina be matana e valahu-valahu, e buruka dainai. 5 Bena Iehova ese Ahia e hamaoroa, eto, A itaia, Ieroboam adavana na e maimu, baine nanadaimu natuna dainai; badina be ia na e gorereamu. Unu ini ba hereva henia toma.

Hahine na e kau negana ai, ia na e koikoi, eto ia na hahine idauna ta. 6 A ia na iduara amo e raka vareai negana ai Ahia na ia aena reḡedia e kamonai; bena ia na eto, Ieroboam adavana e, a raka vareai. Dahaka dainai o koikoimu, o tomu oi na hahine idauna ta? Badina be hereva metauna vada e henigu oiemu. 7 Aola, Ieroboam ba hamaoroa, baoto “Iehova, Israel Diravana, na ini e gwau tomamu: Taunimanima bogaragidia amo na abimu dae, egu bese Israel ihakauna ai na halaomu, 8 basileia na David ena iduhu amo na dadia oho, oi na henimu, ḡau tamona oi na dia egu hesiai tauna David heḡereḡerena; ia ese egu haheḡani e badinadiava, bona murigu amo e rakava mai lalona idoinai, bona kara maoromaoro mo lau vairagu ai e karava. 9 A oi ese e gunalaimu taudia iboudiai na kara dika ai vada o hereadiamu, vada ola, dirava idaudia bona e haveve auridia amo e kara kaivakukudia vada o kara emu; unu amo vada o habadugu, bona vada o negegu murimu kahana ai. 10 Una dainai lau ese dika baina havaraia, Ieroboam ena ruma latanai, bona mamaruane iboudiai Israel ai, e ḡuidia taudia bona asie ḡuidia taudia, na Ieroboam ena amo baina utudia oho, bona Ieroboam ena iduhu baina habuaia tari vaitani, tau ta ese boromakau taḡedia e gabumu bona e haḡole ohomu na heto. 11 Ieroboam ena orea tauna ta hanua ai bema mase, sisia ese bae ania; eiava ta tano paka ai bema mase, atai manudia ese bae ania, badina be Iehova ese unu vada e gwauraia toma”. 12 Taunabunai, a tore isi, emu ruma aola. Aemu na hanua lalonai bae raka vareai negana ai, mero na baine mase. 13 Bena Israel idoinai na ia taina bae tai, bona bae guria; badina be Ieroboam ena orea amo ia mo sibona gara ai bae guria, badina be ia enai Iehova, Israel Diravana, ese ḡau ta ai e lalo namo heniamu, Ieroboam ena iduhu ai. 14 Ina danu, Iehova ese Israel pavapavana ta baine haginia; una dina ai ina tau ese Ieroboam ena iduhu baine negea daure. Bona ina negana amo 15 Iehova ese Israel baine hamarerea, siriho na ranu ai e marere-mareremu na heto; bona Israel taudia na ina tano namona, ia ese senedia e henidia tanona, amo baine raḡadia oho, Eufrate sinavaina unukahana ai baine hakarohodia rohoroho. Badina be idia ese edia au-tubua helaḡadia e karadia amo Iehova e habadua. 16 Ia ese Israel baine negea daure, Ieroboam ena kara dikadia, sibona e karadikalai ḡaudia bona Israel taudia e hakaradia dikalai gaudia daidiai.

17 Bena Ieroboam adavana e tore isi, e raka lav, Tirisa ai e kau; bena ruma iduarana ai e kau negana ai, mero vada e mase. 18 Israel idoinai ese e guria, bona taina e tai, Iehova ena hereva, ena hesiai tauna, peroveta tauna Ahia, uduna amo e gwauraia heḡereḡerena.

Ieroboam e mase

19 Ieroboam ena kara oredia, ena tuari bona ena lohia karadia, sivaraidia na Israel Pavapavadia Sisigadia Bukana lalonai eme hetore. 20 Ieroboam ena lohia negana na laḡani ruahui-rua. Bena ia na tubu tama dekediai e mahuta; bona ia natuna Nadab ese ia gabuna ai e lohia.

King Rehoboam

21 Rehoboam, Solomon natuna, na Iuda ai e lohia. E lohia matama negana ai ena vara laḡanidia na hari-ahui ta, bena laḡani gwauta-hitu ia na Ierusalem ai e lohia, una na Iehova ese Israel iduhudia iboudiai bogaragidia amo e abia hidi hanuana, ia ladana unuseni ai baine atoa totona. Ia sinana ladana na Naamaha, hane Amono. 22 Bena Iuda taudia na Iehova vairanai e kara havara, edia kara dika amo e havaḡeḡea. Una kara ai idia ese tamadia e hereadiava. 23 Badina be idia ese atai gabudia bona au-tubua helaḡadia e karadia, bona ororo badadia iboudiai doridia ai bona au mauridia henudiai au-tubua helaḡadia e haginidia; 24 bona lebulebu karadia e karava edia gabu helaḡadia ai. Iehova ese Israel taudia vairadiai e luludia lasi besedia edia kara bodagadia iboudiai na idia ese ma e karadia.

25 King Rehoboam ena lohia laḡanina iha-imana ai, Sisaka, Aigupto pavapavana, na ema, Ierusalem e tuari henia. 26 Ia ese Iehova ena dubu kohudia ḡoeva-daedia bona pavapava ena ruma kohudia goeva-daedia e abidia oho, ḡau iboudiai e laohaidia. Gold kesidia danu, Solomon ese e kara gaudia, na iboudiai e abidia oho. 27 Bena King Rehoboam ese auri labora-labora kesidia e kara, idia ibolodia; bona hegima oreana biagudia, pavapava ena ruma iduarana e gimaiava taudia, imadia ai e atodia, bae naridia. 28 Bena hanua pavapavana na Iehova ena dubu ai e raka vareaiva negadia iboudiai, hegima taudia ese unu kesi e abidia kauva, ma e loulaidiava, edia hegima rumana ai e atodiava.

Rehoboam e mase

29 Rehoboam ena kara oredia, e kara karadia iboudiai, sivaraidia na Iuda Pavapavadia Sisigadia Bukana ai e hetore, ani? 30 Rehoboam bona Ieroboam e hetuari heheni hanaihanaiva. 31 Bena Rehoboam na tubu tama dekediai e mahuta; David ena hanua lalonai e guria, tubu tama ida. Ia sinana ladana na Naamaha, hane Amono. Ia gabuna ai natuna Abiama e lohia.

<- 1 HANUA PAVAPAVADIA 13 1 HANUA PAVAPAVADIA 15 ->