3 E nanadaigumu taudia na ini na haere henidia tomamu; 4 asi siahumai baia aniani bona baia inuinu a? 5 Asi siahumai ekalesia hahinedia edia amo adavamai baia abidia, bena baia hakaudia eva-eva, aposetolo oredia bona Lohiabada tadina bona Kefa heḡereḡeredia a? 6 Lau Banaba ida asi siahumai imamai ḡaukaradia baia ato diho a? 7 Daika baine ha tuari, bena ena tuari dokona ai sibona davana baine kara? Daika vine baine hado, bena ena hadohado anina basine ani? Daika ese mamoe baine naridia, bena rata na basine inua? 8 Lau na herevamu kavakava tauna na heto a? Taravatu unu se gwau tomamu a? 9 Badina be Mose ena taravatu ai vada e torea, eto, Uit e moimoilaiamu boromakauna na uduna basio ḡuia. O, Dirava ese boromakau e lalodiamu, 10 eiava ita daidai unu e gwau tomamu, a? Readia ita daidai vada e torea: badina be ruarua tauna na baine ruarua mai helarona ida, bona uit e kwadiamu tauna danu ahuna iabina baine laroa.
11 Ai ese lauma ḡaudia baiama hado umui emui, tanobada ḡaudia emui ai baiama abi na ḡau metauna a? 12 Haida ese bema biagumui, ai ese basiama biagumui badabada a? To asia biagumui. Ḡau idoidiai a haheaukalai, Keriso ena sivarai namo baia laoa ahu na garina. 13 Asi dibamui a, hahelaḡa ḡaukaradia e karamu taudia ese Dubu Helaḡa ḡaudia e animu; bona boubou patana e nariamu taudia ese boubou patana amo ahudia e abimu? 14 Unuhetomana, Lohiabada na vada e hahedua, sivarai namo e harorolaiamu taudia na sivarai namo amo adia bae abi. 15 A lau ese ḡau ta asina abia. Ini hereva asina tore umui ese unu ba karagu toma helaoreana. Bama mase bema namo; tau ta ese egu heaḡi badina bema abia oho bema dika. 16 Ḡau tamona, sivarai namo na harorolaiamu be asina heaḡilaiamu, badina be vada e haduagu unu baina kara toma: sivarai namo basinama harorolaia madi ihabaigu. 17 Badina be sibogu egu ura dainai bama karaia, ahugu bama abia; to dia sibogu egu ura dainai, hahedua dainai na karaia. 18 Benaini, ahugu be dahaka? Ahugu binai: sivarai namo iharorolaina ai hari sivarai namo baina heni asi davana; egu siahu sivarai namo lalonai basina ḡaukaralaia kava.
19 Ena be lau na ura kwalimu taugu taunimanima iboudiai vairadiai, to iboudiai edia hesiai tauna ai nala, hutuma baina veridia mauri helaoreana. 20 Iuda taudia ediai Iuda tauna ai nala, Iuda taudia baina veridia mauri totona. Ena be lau na dia taravatu henunai, to taravatu henunai e nohomu taudia ediai taravatu henuna tauna ai nala, taravatu henunai e nohomu taudia baina veridia mauri totona. 21 Ena be lau ese Dirava ena taravatu asina tataia utu a Keriso ena taravatu na badinaia, to, asi taravatudia taudia ediai asi taravatuna tauna ai nala, asi taravatudia taudia baina veridia mauri totona. 22 Lalo-manoka taudia ediai lalo-manoka tauna ai nala, lalo-manoka taudia baina veridia mauri totona. Taunimanima idau-idau iboudiai edia ḡau idau-idau iboudiai nala, dala idau-idau iboudiai amo haida baina veridia mauri totona.
23 Ḡau iboudiai na sivarai namo dainai na karamu, ia lalonai ahugu baina abia helaoreana. 24 Dibamui, ani, heau-helulu ai heau taudia iboudiai e heaumu, a tau tamona ese davana e abiamu. Unu ba heau toma, bena davamui bavabia. 25 Gadara-helulu taudia na e boga aukamu, kwara iḡeḡena e maraimu ḡauna iabina totona. Ita danu ta boga aukamu, kwara iḡeḡena baine mia hanaihanai ḡauna iabina. 26 Unu na heau tomamu; asina daradaramu. Unu na tuari tomamu; dia hodahoda asina tutuamu, 27 to sibogu tau-anigu na tutuamu, na ḡuiamu; haida baina haroro henidia to sibogu mauri baina reaia na garina.
<- 1 KORINTO 81 KORINTO 10 ->