1 Varavaragu e, sivarai namo na harorolai henimuiva, o abi daeva, bona lalonai o gini tutuka-tutukamu, ma na hadibalaimuimu. 2 Unu amo danu mauri vada o abia; ḡau tamona sivarai namo na harorolai henimuiva boma laloa tao, basioma abia dae kava. 3 Badina be na davaria herevana na henimui gunava: Keriso na eda kara dika daidiai e mase, Buka Helaḡa ai e torea heḡereḡerena; 4 vada e ḡuria danu; dina ihatoina ai e hatorea isi, Buka Helaḡa ai e torea heḡereḡerena; 5 Kefa*“Kefa” be Petro ladana ta. enai e hedinarai, bona gwautararuosi ediai danu; 6 gabeamo nega tamona ai varavarada sinahu-ima mai dikoana ediai e hedinarai. Idia hutuma vada e nohomu ema harihari; a haida na vada e mahuta. 7 Muridiai Iakobo enai e hedinarai; bona aposetolo iboudiai ediai danu. 8 Ibouboudiai muridiai, e vara dika merona ta na heto, lau ese vada na itaia. 9 Badina be aposetolo iboudiai ese lau e hereagumu; lau na dia namo aposetolo bae gwauraigu, badina be Dirava ena ekalesia oreana na daḡedaḡe heniava. 10 To Dirava ena harihari-bada dainai lau ini name heto; bona e henigu hariharina danu se henigu kava, badina be ḡaukara lalonai idia iboudiai vada na hereadia; a dia lau mo, to Dirava ena harihari-bada lau ida. 11 Taunabunai, lau na haroro, eiava idia e haroro, herevana be tamona mo, a harorolaiamu bona o abia daemu ḡauna mo.

12 A bema Keriso na mase amo e hatorea isi a harorolaiamu, edeheto umui haida na o tomamu mase taudia na basie tore isi lou? 13 Mase taudia na basiema tore isi lou, Keriso danu basinema hatorea isi; 14 bona Keriso basinema hatorea isi, emai haroro bema asi anina, umui emui abidadama danu bema asi anina. 15 Oibe, ai danu Dirava idiba-koikoina taumai bema gwauraimai, badina be Dirava ese Keriso e hatorea isi sivaraina a harorolaia; a ḡau be mase taudia basinema hatoredia isi negana ai Keriso danu basinema hatorea isi. 16 Momokani; mase taudia basinema hatoredia isi, Keriso danu basinema hatorea isi. 17 Bena Keriso na basinema hatorea isi, umui danu boma abidadama kava, bena emui kara dikadia lalodiai doene boma noho; 18 bona Keriso lalonai vada e mahutamu tauda na bema baia. 19 Eda helaro Keriso lalonai bema ina mauri mo, taunimanima iboudiai bogaragidiai ita mo madi ihabaida.

20 Momokani, Keriso na mase amo vada e tore isi, mahuta taudia edia tore-isi-lou roboana. 21 Badina be taunimanima ena amo mase vada e vara; ma taunimanima ena amo mase taudia ihatore-isidia vada e vara. 22 Badina be taunimanima iboudiai Adam bagunai vada e mase na heto, Keriso bagunai iboudiai do bae mauri. 23 A ta ta ena nega ena nega ai mauri bae abia; guna Keriso, tore-isi-lou roboana; murinai, iena lou mai negana ai, Keriso ibadinana taudia. 24 Bena dokona baine kau: una negana ai ia ese basileia na Tamana Dirava baine henia; una negana ai danu gaubada iboudiai bona lohia iboudiai bona siahu taudia iboudiai na ia ese baine haoredia. 25 Badina be ia na do baine lohia, ela bona ana inai iboudiai na ia aena henudiai do baine atodia. 26 Ana inai gini-gabena be mase: ia danu baine ha-orea. 27 Badina be ia ese ḡau iboudiai aena henudiai vada e ato. A hereva e tomu “ḡau iboudiai ia henunai vada e ato”, dibada anina be dia ḡau iboudiai, badina be ia henunai vada e atodia Diravana na unu se heato toma. 28 A ḡau iboudiai ia henunai bae heato vaitani negana ai, Natuna danu ḡau iboudiai ia henunai vada e atodia Diravana henunai bainela; taunabunai Dirava baine herea, baine herea dae.

29 Unu basinema heto, mase daidiai vada e bapatisodia taudia na ede bema heto? Mase taudia basiema tore isi lou, badina be dahaka idia daidiai e bapatisodiamu? 30 Bona badina be dahaka lau na nega idoidiai hahedika bogaragidiai na nohomu? 31 Varavaragu e, Keriso Iesu eda Lohiabada lalonai na heaḡilaimuimu dainai, na hamaoromui momokanimu, lau na daba daba iboudiai na masemu. 32 Taunimanima edia kara heḡereḡerena Efeso ai uda boromadia ida na heatu, namona be dahaka egu ai? Mase taudia basiema tore isi lou, baitama aniani baitama inuinu hari namo, badina be kerukeru vada baita mase. 33 Basio hekoi: kara dika taudia edia hebamo ese kara namo taudia e hahekwakwanaidiamu. 34 Kara namo enai ba noga; basio kara dika; badina be haida na Dirava asi dibadia. Unu na gwau tomamu, umui ihahemaraimui totona.

35 A tau ta baineto “Mase taudia na ede bae tore isi toma? Tau-anidia edehetomadia ma bae torelai?” 36 Kava taumu e, o hadoamu ḡauna na basinema mase guna, ia na basinema mauri. 37 O hadoamu ḡauna na dia gabeai baine vara anina, to uhe mo, readia uit uhena eiava idau uhe ta. 38 A Dirava ese anina e heniamu, ena ura heḡereḡerena uhe ta ta anidia korikori e henidiamu. 39 Hidio danu iboudiai na dia heḡereḡere: ta be taunimanina hidiodia; ma ta be boroma hidiodia; ma ta be manu hidiodia; ma ta be gwarume hidiodia. 40 Guba tau-anidia bona tanobada tau-anidia danu mimia; a guba ḡaudia hairaidia be ta, tanobada ḡaudia hairaidia be ma idau. 41 Dina hairaina be ta, hua hairaina be ma ta, hisiu hairaidia danu idau; bona hisiu ta ta hairaidia be idau-idau.

42 Mase taudia edia tore-isi-lou na unuheto. Mase ai e hadoamu; mauri hanaihanai ai e hatorea isimu. 43 Hemarai ai e hadoamu; hairai ai e hatorea isimu. Manoka-manoka ai e hadoamu; goada ai e hatorea isimu. 44 E hadoamu, tau-anina; e hatorea isimu, lauma-anina ai. Badina be tau-anina e miamu, bona lauma-anina danu e miamu. 45 Buka Helaḡa ai ini e torea toma: Tau gini gunana Adam na lauma maurina ai e halaoa. A Adam gini-gabena be hahemauri laumana ai vada e halaoa. 46 Lauma-anina na se guna; tau-anina e gunava, gabe amo lauma-anina. 47 Tau gini-gunana na tano amo ema, ḡahu ai e karaia; tau iharuana na guba amo ema. 48 Tanobada taudia be tano amo ema tauna heḡereḡerena; guba taudia be guba amo ema tauna heḡereḡerena. 49 Tano amo ema tauna oromana vada ta abia na heto, guba amo ema tauna oromana do baita abia. 50 To, varavaragu e, lau na tomamu hidio bona rara ese Dirava ena basileia basie abia diba; mase tauna ese danu se masemu ḡauna ahuna basine abia diba.

51 A kamonai; hereva hehuni aina hamaorolaimui. Ita iboudai basita mahuta; to iboudai do baine ha-idauda; 52 asi kaimana, mata-hekunumai tamona ai, kibi gabena bae hiriria negana ai. Badina be kibi do bae hiriria, bena mase taudia baine hatoredia isi, basie mase lou; bona ita na do baine ha-idauda. 53 Badina be ina baine pata ḡauna ese basine pata ḡauna haine hadokilaia, bona ina baine mase ḡauna ese basine mase ḡauna baine hadokilaia. 54 Taunabunai, baine pata ḡauna na basine pata ḡauna baine hadokilaia bona baine mase ḡauna na basine mase ḡauna baine hadokilaia negana ai, e torea herevana baine momokani, eto, Kwalimu ese mase vada e hadonoa. 55 Mase e, emu kwalimu be edeseni ai? Mase e, emu hekori be edeseni ai? 56 Mase ena hekori na kara dika; bona kara dika ena siahu na taravatu. 57 A Dirava aita hanamoa: ia ese vada e hakwalimuda, eda Lohiabada Iesu Keriso bagunai.

58 Taunabunai, varavaragu e, egu lalokau, ba gini tutuka-tutuka, basio marere. Lohiabada ena ḡaukara lalonai ba goada balaheni nega idoinai; badina be dibamui emui hekwarahi Lohiabada lalonai na asio hekwarahilaia kavamu.

<- 1 KORINTO 141 KORINTO 16 ->