1 Satana ese Israel e inai henia, bena David e dibaḡania, Israel taudia baine hagaudia. 2 Taunabunai, David ese Ioab bona tuari biagudia e hamaorodia, eto, Aola, Israel taudia ba hagaudia, Bere-sieba amo ela bona Dan; bena hereva ba mailaia, baina diba idia be hahida. 3 A Ioab eto, Iehova ese ena bese na nega sinahu-ta amo baine habadaia. Egu lohia bona egu pavapava e, idia iboudiai na egu lohia ena hesiai taudia, ani? Dahaka dainai egu lohia ese ina ḡau e ura heniamu? Dahaka dainai ia ese Israel baine hakererea? 4 A hanua pavapavana ena hereva ese Ioab e laoa ahu. Taunabunai, Ioab na e raka lasi, Israel tanona idoinai e rakaia hanai, bena Ierusalem ma e lou lao. 5 Bena Ioab ese taunimanima ihagaudia herevana na David e henia. Israel idoinai lalonai dare taudia na domaga gwauta-ta,[a] bona Iuda lalonai dare taudia na domaga-hani gerebu-hitu. 6 A ia ese Levi taudia bona Beniamina taudia na se duahidia, badina be hanua pavapavana ena haheḡani na Ioab lalona ese e dadaraia.

7 A Dirava ese una kara na e badulaia, bena ia ese Israel e hahisia. 8 Bena David ese Dirava e hamaoroa, eto, Vada na kerere dikadika ina kara ikarana ai; a harihari lau na noimumu emu hesiai tauna ena dika bavabia oho; badina be vada na kara kava herea. 9 Bena Iehova ese Gad, David ena mata-hanai tauna, e hereva henia, eto, 10 Aola, David ba hamaoroa, baoto, Iehova na ini e gwau tomamu: ḡau toi na dudui henimumu, tamona bavabia hidi, bena unu baina kara henimu toma. 11 Taunabunai, Gad na David dekena ela, e hamaoroa, eto, Iehova na ini e gwau tomamu. Edena o uramu bavabia: 12 doe laḡani toi lalodiai; eiava inaimu edia hahebua-tari, hua toi lalodiai idia edia dare ese bae lasimu tao; eiava Iehova ena dare, dina toi lalodiai dai-hanai gorerena na tano ai baine kau, bona Iehova ena aneru na Israel tanona idoinai lalonai baine hahebua tari. Lalomu a hadaia, edena haere na e siaigu Diravana baina henia. 13 Bena David ese Gad e haere henia, eto, Daragu eme doko dikadika; Iehova imana ai baina moru be namo, badina be ena hebogahisi na bada herea, a taunimanima imadia ai basina moru.

14 Taunabunai, Iehova ese dai-hanai gorerena ta Israel latanai e siaia; bena Israel taudia gerebu-hitu[b] e mase. 15 Bena Dirava ese aneru na Ierusalem ihabua-tarina e siaia lao, a baine habuaia tari eto negana ai Iehova ese e itaia, bena ia na una dika amo e helalo kerehai; bena ia ese taunimanima ihabua-taridia aneruna e hamaoroa, eto, Vadaeni, imamu a haloua.

Iehova ena aneru na Oronana, tau Iebusu, ena uit ikwadina gabuna badibadinai gini. 16 Bena David na e gaga isi, Iehova ena aneru e itaia, tanobada bona guba padadiai gini, imana amo dare e veria lasi bona Ierusalem daenai e toia roro. Bena David bona hanua tau-badadia na puse dabuadia e hahedokilai bona tano ai e goru parapara. 17 Bena David ese Dirava e hereva henia, eto, Lau na haheḡani, taunimanima bae hagaudia nato, ani? Lau na vada na kara dika bona na kara havara; a ini mamoe na dahaka e karaia? Iehova egu Dirava e, na noimumu, oi imamu ese lau bona tamagu ena iduhu baine hadikamai, a dai-hanai gorerena na emu bese taudia latadiai basine mia.

18 Bena Iehova ena aneru ese Gad e haḡania, ia ese David baine hamaoroa, David na bainela, Iehova ena ihaboulaina patana ta baine larebaia, Oronana tau Iebusu ena uit ikwadina gabuna ai. 19 Taunabunai David na ela, Gad ena hereva, Iehova ladana ai e gwauraia, ḡauna dainai.

20 Una negana ai Oronana na uit e kwadiva; bena e roha kerehai, aneru e itaia. Bena natuna mamaruanedia hahaniosi ia dekenai na e komu. 21 David na Oronana dekena ela negana ai, Oronana na e roha lao, David e itaia; bena uit ikwadina gabuna amo e raka lasi, tano ai e goru diho, David e toma henia diho. 22 David ese Oronana e hamaoroa, eto, Uit ikwadina gabuna tanona a henigu, Iehova ena ihaboulaina patana na ia latanai baina larebaia totona. A henigu, bena davana korikori baina henimu, dai-hanai gorerena na taunimanima edia amo baine heabi oho helaoreana. 23 Bena Oronana ese David e haere henia, eto, Avabia; egu lohia bona egu pavapava na ena lalo-hadai namona heḡereḡerena baine karaia. A itaia, boromakau mamaruanedia na henimumu, ḡole-oho boubou ḡaudia ai baela, bona uit ikwadilaina audia na rakuraku audia ai baela, bona uit na flaoa boubou ḡauna ai bainela; idoinai na henimumu. 24 A King David ese Oronana e hamaoroa, eto, Lasi, a davana korikori ai baina hoia; oiemu ḡau na basina abia Iehova ena, bona davadia asina kara ḡaudia na basina hahelaḡadia. 25 Taunabunai, David ese gold sekele sinahu-tauratoi[c] e hahetohodia, Oronana e henia, una tano davana.

26 Bena David ese Iehova ena ihaboulaina patana ta unuseni ai e larebaia, bona ḡole-oho boubou ḡaudia bona maino bouboudia ḡaudia e hahelaḡadia, bona Iehova e hahanea. Bena ia ese guba lahina amo e haere henia, ḡole-oho bouboudia patana latanai. 27 Bena Iehova ese hari aneru e haḡania; bena aneru ese ena dare na iudalaina ḡauna ai ma e toia vareai.

28 Una negana ai David ese e itaia, Oronana tau Iebusu ena uit ikwadina gabuna ai Iehova ese vada e haere henia; bena ena boubou ḡaudia na e hahelaḡadia unuseni ai. 29 Badina be una negana ai Iehova ena kalaga helaḡana, Mose ese tano ḡaḡaena ai e karaia ḡauna, bona ḡole-oho bouboudia patana, na Gibeon ai, atai gabuna ai; 30 a David na asi ena dala unu bainela, Dirava inanadaina totona, badina be ia ese Iehova ena aneru ena dare garina e gariva.

<- 1 SISIGA 201 SISIGA 22 ->