18
Long Sabangga Babilon Doa Ba
1 Sup baing ngabagu Urana uleginam tela muli ri long xaiya mari. Haringing sibuna xaung yaya sabanga, saing titia ralang sabanga mana saxaxanganoa. 2 Iti waxungtuanoa saing wagi sabanga ba:
“Sup ba! Long sabangga Babilon Yang Sabanga sup ba!
Sok long xaungam
saing aningoningo diang longgalo duwasa mana,
mang sigixingang teguamdi xaung mang longgalo lipudi hauxading sibuna manadi, ding xauna duwasa mana.
3 Namua na numanuma longgalo dilibu kubolung miaxuamdi rangua,
bila wain haringina dinung iti murungadinga ba dilibu xumana muli.
Xaitamoxi titiam dilibulibu kubolu miaxuamdi rangua,
saing lipudi dituxu siang oxatanoa mana titia li disok lipu xalaxalamdi, namua na haingga ba haxi buk ba gim xalingiding siang sabanggamdi.”
4 Baing ngalungu waxutu tela muli mana long xaiya harua ba:
“Lipuxigudi, ayunga long sabangga ba asok sangua
bu agabu alibu kubolung diandi te,
bu mauxangang sabangadi daxapkang te,
5 namua na kubolung diandi haxurudi mahaing long xaiya,
saing Urana hatumia kubolung maringing teguamdi muli.
6 Ahaxuya bila sina,
ahaxuya kubolundi bila ba, saking ahaxuya muli.
Axaningxaning kubolung diandi duwa ing sibuna xubania, saking axibuadi asinadi na.
7 Haingga ba sina yaya sabanga xaung xalaxala siang sabanggamdi naina,
binabu bila balau asina salaga xaung mauxangang maxang taininau na.
Hatumingania itina sabanga saing harua ba,
‘Ngawa xaitamoxi haing ngarung kabukabu yayamia.
Nga tap te,
saing bagula ayangagu bila tapdi ayangading te.’
8 Binabu mana xaidap taininau mauxangandi bagula didali:
matia, usinganga xaung gesak sabanga.
Bagula yaba tau masup,
namua na Toxoratamona Urana suxuya ba bing haringing sibuna.
9 “Xaitamoxi titiamdi dilibu kubolu miaxuamdi rangua xaung dulia mana xalingindi ba, bungina dibagu bunuxuyanoa, bagula ditang dusinga mana. 10 Bagula dili hasoya namua na dimaxuwa sibuna mana salakka xap ba. Bagula daxaba ba,
“ ‘Laku! Laku, O long sabangga yayam, mauxanganoa xapkung ba,
O Babilon, long sabanga haringingam!
Mongaita bila auwa tela kubolum diandi salagidinga xapkung!’
11 “Lipudi dituxu siang oxatanoa mana titia li bagula ditang dusinga mana, namua na lipu tela bagula gim xalingidingdi muli te. 12 Xalaxala bila gol, silba, siang xai sibundi xaung yauyaunga ditongtongia mana saluwa guang lunama, imang xai sibundi, imang sikokopdi, imang disaxapsaxabiak, xaung imang dimutuxu monga, xai saminam xai sibung xangxana, xalaxala xangxana ditongtongiadi mana asaxa gautandi, xai giminak sabanggamdi, bras, ain xaung siang mugixinam duxu ba mabal. 13 Xalaxaladi bila sinaman xaung axadi bila ba dilibu anginga didau, xai susung saminam, baxi duxu ba ‘mer’ xaung guxenga saminam, wain xaung olip guxenganoa, wit xaung gagabindi, kaudi xaung sipsipdi, hosidi xaung wilkadingdi, xaung lipu oxata olanggamdi, lipuadi naga.
14 “Axamang xaidi uhaxi ba oxopdi ba disup!
Xalingim siang sabanggamdi xaung axamang gumanging longgalo ungiadi dahanggalang!
Bagula oxopdi muli te!
15 “Lipudi dituxu siang oxatanoa disina xalaxaladi ba saing daxap siang sabanga mana ba bagula dili hasoya, namua na dimaxuwa sibuna mana kubolung diandi salagidinga bagula xapdi xauna. Bagula ditang, dusinga mana, 16 saing bagula daxaba ba,
“ ‘Laku! Laku, O long sabanga yayam, mauxanganoa xapkung,
ung bila xaitamoxi haingdi disau imang xai sibundi sikokop xaung sabuxana,
ung bila uyauyau mana axamang siniandi—gol, siang xai sibundi xaung yauyaunga ditongtongia mana saluwa guang lunama!
17 Mongaita bila auwa tela xalingim longgalo disup ba!’
“Waga yanaming longgalo, xaung lipu longgalo diluki wagia, lipu wagamdi, xaung lipu longgalo daxap sianga mana tek oxatanoa, bagula dili hasoya. 18 Bungina dibagu yabing bunuxuyanoa, bagula duwagi ba, ‘Long sabanga baruamta bila long sabanga yayamga li? Tegu!’ 19 Bagula diting gagaba toxolodingia bu dahatanga ayangading, saing bagula duwagi, ditang xaung dusinga. Bagula daxaba ba:
“ ‘Laku! Laku, O long sabanga yayam, mauxanganoa xapkung,
la ba waga moxong longgalo wagading diluki dila dima
saing daxap siang sabanga mana xalingimdi!
Mongaita bila auwa tela usup ba!’
20 “Ang lipu long xaiyamdi, bing ayaha sibuna mana axadi disok mana!
Ang Urana lipuxing maringindi, aposeldi xaung Urana lipuxing suxunguxunguamdi ayaha sibuna!
Namua na Urana suxuya saing haxuya kubolunadi libudi mang.”
21 Baing Urana uleginam haringingam tela iti siang sabanga sibung tela mahaing tubunganoa bila sianga dahamunanggia witdi mana, saing ting mari tegia, saing harua ba:
“Long sabangga Babilon yayang sabanga,
bagula ditinggung haringina mari bila balau bungina atiding disala,
saing bagula uhanggalang masup sibuna.
22 Gitadi, wagudi, panggeriangdi xaung ronggingdi,
bagula alungu olaidingdi muli te.
Lipu tongtongiangamdi,
bagula abagudi muli te.
Siangdi dahamunanggia wit marandi mana,
bagula alungu bibingadinga muli te.
23 Nagung lulianamdi bagula dilu maung muli te.
Haing lup dibo ba diyau waxudingtuandi
bagula alungudi muli te.
Oxop doa namua na lipuxim dituxu siang oxatanoa maluxu maung bing disok lipu yayamdi mana titi longgalo,
saing mana kubolum tingungamdi ulanglangua numanuma longgalo.
24 Urana lipuxing suxunguxunguamdi xaung Urana lipuxing maringindi xaung lipu titiam longgalo dungdi mati ba,
ung sibum umatuxuya sibidingdi mari titia, binabu mauxangana li xapkung!”
<- HATANGA MASOK 17HATANGA MASOK 19 ->