YON 20

Yesu Mesa Muli Gobagobia

(Matyu 28:1-8; Mak 16:1-8; Luk 24:1-10)

1 Sande buraraging sibuna, labianauyu, baing Maria Magdalam ila guhia gobagobia saing bagu ba sianga wa xuania te. 2 Binabu luki ma rangua Saimon Pita gabu Yesu lipuxing tela naxu mana murung sibuna mana, saing harua nadi ba, “Daxap Toxoratamona sangganoa sangua guha gobagobia, saing am gaxabia longga dita mana te!”

3 Binabu Pita xaung Yesu lipuxing tela naxu mana tang dila guhia gobagobiauba. 4 Tang diluki xauna, ne lipuxing tela naxu mana luki dali Pita saing sok guhia gobagobia muga. 5 Nenia maluxu, saing bagu imang xaidi disaku mana ba ditabu la ba, ne luxu te. 6 Baing Saimon Pita luki kimuya ma, saing luxu guhia gobagobia. Bagu imang xaidi ditabu la ba, 7 xaung imang kimangingam disaku Yesu toxonoa. Ne imangga ba wa rangua imang teladi te. Lukinaʼm tabu halianga mana long tela. 8 Baing ina naga, Yesu lipuxing tela naxu mana, lipua sok guhia gobagobia muga ba, ina xauna luxu. Bagu saing hatum haringina. 9 (Urana Xuanoa harua ba Yesu bing mesa muli mana matianoa, ne daxabia rangrang teguyu.)

Yesu Owa Masok Mana Maria Magdalam

10 Baing lipuxindi dinaxu mana tang digoxoya mala numia, 11 ne Maria li guhia gobagobia sabasabia, tang. Tang mua, saing nenia maluxu guhia gobagobia 12 saing bagu Urana uleginam luwa imangiding dusa. Dirung mua mana longga Yesu sangganoa muga wa mana ba, tela wa toxong yabania, ne tela wa king yabania.

13 Tang duxusunga ba, “Haing, baruta utang?”

Harua nadi ba, “Daxap Toxoratamona ngayua sangganoa mala, saing ngaxabia longga dita mana te.” 14 Harua laing sup, baing xugia mala ubunia saing bagu Yesu li la ba, ne xabia ba Yesu te.

15 Baing Yesu xusunga ba, “Haing, baruta utang? Usai mana gaxarea?”

Hagaxa ba lipu umanga wasanganama, binabu harua na ba, “Lipu Sabanga, nabu oxop mala, bing ubaxanga longga uta mana ba, saing bagula ngala ngaxap.”

16 Yesu harua na ba, “Maria.”

Xugia ma rangua saing harua Aram xuania ba, “Raboni!” (Namuxinoa bing Lipu Tubatubaingam.)

17 Yesu harua na ba, “Labu utuxu ngau tai, namua na ngahaing mala rangua Tibugu teguyu. Ning ula rangua riagudi saing ubaladi ba, ‘Ngahaing ngagoxoya mala muli rangua Tibugu xaung Tibuim, rangua Urana ngayua xaung Urana angia.’ ”

18 Baing ina naga, Maria Magdalam ila rangua lipuxindi dinaxu mana saing baxanga nadi ba: “Ngabagu Toxoratamona ba!” Baing baladi mana axadi harua na manadi ba.

Yesu Owa Masok Mana Lipuxindi Dinaxu Mana

19 Sande yambong lipuxindi dinaxu mana digugunia. Diribauti xaludi namua na dimaxuwa mana Yudadi yanamidingdi. Duwa bila ba, baing Yesu ma li liwe manadi saing baladi ba, “Gamoimdi duwa mosiu!” 20 Harua laing sup, baing hatanga rimandi xaung ulenoa nadi. Lipuxindi dinaxu mana gamodingdi diyaha sibuna mana dibagu Toxoratamona.

21 Baing Yesu harua nadi muli ba, “Gamoimdi duwa mosiu! Tibugu soxi nga ma, saing bila balau ngasoxiang mala.” 22 Harua laing sup, baing yubua yanginoa manadi saing harua ba, “Axap Urana Aningonoa. 23 Lipu gaxarea ayunga kuboluding diandi, bing Urana yungadi. Nabu ayungadi te, bing Urana yungadi te.”

Yesu Owa Masok Mana Tomas

24 Tomas (yan tela Didimas), ina tela mana Lipu 12, wa rangua Yesu lipuxindi dinaxu mana bungina owa masok ranguadi ba te. 25 Binabu lipuxindi dinaxu mana dibala ba, “Am gabagu Toxoratamona baing!”

Ning harua nadi ba, “Nabu ngabagu waxu babundi wa mana rimandi xaung ngata rimagu uxuna maluxu mana longga duwa mana te, xaung ngata rimagu maluxu ulenia te, bing sanga ba ngahatum haringin te.”

26 Xaidap 7 disup, baing Yesu lipuxindi dinaxu mana duwa numia muli, saing Tomas wa ranguadi. Diribauti xaludi, ne Yesu ma li liwe manadi saing harua ba, “Gamoimdi duwa mosiu!” 27 Baing harua na Tomas ba, “Uta rimam uxuna la li. Ubagu rimagudi. Uraria rimama uta maluxu ulegia. Labu hatumingam luwau tai. Ning uhatum haringina.”

28 Baing Tomas harua na ba, “Ung Toxoratamona ngayua xaung Urana ngayua!”

29 Baing Yesu bala ba, “Ubagu nga saing uhatum haringina, bo? Ne lipudi dibagu nga te ning dahatum haringina, ding duwa xai sibuna.”

30 Yesu libu axamang haringing xumang teladi lipuxindi dinaxu mana maxadingia, ne ngabungdi mari mana xailongga li te. 31 Ning ngabung axadi li mari bu sanga ba ahatum haringina ba Yesu bing Urana Lipuxing Mogunganama, Urana Garanoa. Baing nabu ahatum haringina bila ba, bagula axap walinga subingang teguama yania.

<- YON 19 YON 21 ->