1 Axamang mugamugangama ngahaxi mana bing ubala lipudi ba asabu mana lipu longgalo. Axusunga Urana ba haulidi, asabu mana mauxangadingdi, saing aharua xai sibuna na mana axadi libudi. 2 Asabu bila li mana xaitamoxidi xaung lipu yayamdi, bu sanga ba tarung xai xaung tawa mosiu, xaung bu sanga ba tasu sibuna mana kubolu longgalo daxai Urana maxania. 3 Alali xai sibuna, saing libu Urana, kira Lipuxira Xabinga Muliama, gamona yaha sibuna. 4 Ina bo ba xap lipu longgalo muli. Xauna muruna mana daxabia rangrang mana uleging maxunama. 5 Kira taxabiau, Urana taininau ing ganina, saing lipu aningoxam taininau ing ganina li liwe mana Urana xaung lipudi. Lipua ba Kristo Yesu. 6 Yesu sina ing sibuna walinganoa bu gim lipu longgalo muli. Libu bila ba mana bungina Urana mogu ba, bu hatanga ba Urana murung sibuna ba xap lipu longgalo muli. 7 Baing mana namua ba Urana mogu nga bu ngahabingia uleginoa, xaung bu ngasok aposel tela, xaung bu ngatubatuba Yuda Teguamdi mana hatuminga haringing maxunama. Haruangagua li maxung sibuna. Ngalangua te!

8 Ngabo ba lupdi mana long longgalo diti rimadingdi ba disabu, doxola mana ati salianoa xaung kubolua dahakhaxi, dimaring Urana maxania bila ba.

9 Xauna ngabo ba haingdi diyauyau mana axamang xaidi lipudi maxadingia. Labu dibuxuya toxolodingdiu tai, diyauyau mana golidiu tai, siang xai sibundiu tai, xaung imang siang sabanggamgu tai. 10 Tegu. Bing disau kubolu xaidi, kuboluadi daxai mana haingdi daharua ba disabu mana Urana. 11 Haingdi bing dilungu tubatubaingua mosiu xaung duwa hawa mana lipu tubatubaikkama. 12 Ngabili haingdi ba labu ditubatuba lupdiu tai, saing ngabilidi ba labu duwa etua mana lupdiu tai. Tegu. Bing dirung dilungu mosiu. 13 Namua na Urana tongtongia Adam muga, saing kimuya tongtongia Ip.*Adam…Ip—Adam lipu mugamugangam wa titia. Urana tongtongia. Saking Urana tongtongia Ip ba wa Adam haininoa. Satan langlangua Ip bu dali Urana bilinganoa. 14 Saing Adam xung mari Satan muraginia te. Haingga baing. Ina dali Urana hanaunaunganoa. 15 Ning Urana bagula xap haingdi muli mana dahayau garadi, nabu dahatum haringina mana Kristo mua, xaung nabu muruding sibuna mana lipudi mua, xaung nabu dilibu kubolu sigixingandi mua, xaung nabu dilibu kuboludi daxai lipudi maxadingia mua.†Grik xuana mana maxixinga baguli sok rangrang te.

<- 1 TIMOTI 11 TIMOTI 3 ->