1 Ke agelo egaꞌina lau agapuge mauni epipeni auga feina epakinaisau. Ke fei egaꞌina auga kepo afa akaikiꞌa aka crystal koa iꞌopoga emalolo alogaina, ke Deo ke Sipi Gauga fou eꞌi aguagu afugai ekipolai elao. 2 Ke eake emai taoni keagaga ipuaina ipaumagai epiau. Ke agapuge egaꞌina apie apie auga au mauni kepipeni auꞌi keapa. Ke au egaꞌina auꞌi auga aniꞌi ouꞌaga kuagai gua keogeꞌi. Ke aua gafai auga aniꞌi agaꞌo agaꞌo keogeiꞌi. Ke au egaꞌina gagauꞌi auga ago fekepafeloꞌi auꞌi. 3 Ke kapa agaꞌo keifa apala penia auga egaꞌina taonina alogai afaeka. Ke Deo ke Sipi Gauga fou eꞌi aguagu afuꞌi auga taoni alogai akeka. Ke Isa ega pinauga auꞌi isa ega pinauga akekapa. 4 Ke pinauga auꞌi egaꞌina Deo kua maaga akeisa, ke aka isa pakuꞌiai ageka. 5 Ke egae afaegapigapi pugu. Ke isa lanepa eaea, o kina eaea fekeafia auga afaekaina. Gome Lopia Deo isa eaea agepeniꞌi. Ke isa kapa maꞌoai akeꞌimaꞌi aoniamo.

6 Ke agelo egaꞌina lau epainiau pugu einaka, “Lopia Deo ega Spiritu profeta epeniiꞌi auga, ega agelo eulaisa kapaꞌina afaꞌagamo fekemia auga, isa ega pinauga auꞌi epakinaꞌi. Ega kainai iꞌina iifaꞌi auꞌi koꞌaꞌi ipaumaꞌi, ke oi iꞌina iifaꞌi fopakoꞌaniꞌi auga ekainia,” eoma.

7 Ke Iesu lau epainiau einaka, “Moisa, lau afaꞌagamo alafai! Kaisau iꞌina pukagai Deo ega iifa profeta koa iꞌopoga iifafouga emia, kepapuaꞌi auꞌi muniꞌiai epea auga, Deo eegai kapa feloꞌi eafiꞌi,” eoma.

8 Lau Ioane, egaꞌina kapaꞌi aꞌoꞌi lalogonia, ke laisaꞌi. Ke lau egaꞌina kapaꞌi auꞌoniai auꞌi maꞌoai aꞌoꞌi lalogonia aisama, agelo egaꞌina kapa egaꞌina maꞌoai lau epakinaisau auga ife foꞌinai laomukipo maau afagaina laoma. 9 Kai isa lau epainiau einaka, “Egaꞌina folokapa! Lau isafa oi, ke oi aamu akimu profeta auꞌi, ke iꞌina pukagai iifa maꞌoai kekae auꞌi muniꞌiai kepea auꞌi maꞌoai koa iꞌopoꞌi, Deo ega pinauga ikapa au. Ega kainai Deo moau afagaina!” eoma.

10 Ke epainiau pugu einaka, “Iꞌina pukagai Deo ega iifa profeta koa iifafouga emia auga, puka ipaafiapina kapagai folopaafiapia, gome kina emai kainagai. 11 Kaisau laomai apala ekapa auga puaꞌafuga gakapa. Ke kaisau alo feofu kapaꞌi ekapaꞌi auga, mopuaꞌafuga gakapaꞌi. Ke kaisau Deo maagai alo opai laoꞌi maiꞌi ekapaꞌi auga, mopuaꞌafuga gakapaꞌi. Ke kaisau alo elolofa auga, mopuaꞌafuga alo galolofa,” eoma.

12 Ke Iesu eifa pugu einaka, “Moisa, lau afaꞌagamo alafai! Ke afa fapipeni auga kapaꞌi lau eeuai kekae. Ke lau papiau agaꞌo agaꞌo kapaꞌina kekapaisa auga kainai mo afa alapeniꞌi. 13 Lau Alfa, ke Omeka. Ufaimaaga, ke Laꞌina au, ke Muniai Ipauma, ke Fua au.

14 Ke kaisau eꞌi tiapu keikua koa iꞌopoga eꞌi laomai felo auꞌi, Deo eegai kapa feloꞌi akeafiꞌi. Ega koa isa au mauni epipeni auga anina fekeania isapuga akeafia. Ke isa Ierusaleme taonina mamaga auga paꞌafinai fekekoko auga isapuga fekeafia laoma. 15 Kai papiau ugauga kekapa auꞌi, amage koa laoꞌi maiꞌi kekapaꞌi auꞌi, auau auꞌi, deo pifogeꞌi keau afagainiꞌi auꞌi, ke pifoge anina keani ke kekapaꞌi auꞌi maꞌoai auga taoni egaꞌina afegai keague. Egaꞌina papiauꞌi auga amuꞌe koa iꞌopoꞌi. 16 Lau, Iesu eꞌu agelo laulaisa, iifi eꞌa fauꞌiai egaꞌina iifaga koꞌa ipauma auga feifafoua laoma. Ke lau auga Mesaia, Davide okogai lamai au akaikiꞌau au, ke Davide akagai lamai au. Ke lau auga amagai miꞌimiꞌina eeaea alogaina au,” eoma.

17 Ke Deo ega Spiritu, ke ifiao Sipi Gauga ageakafania auga fou keifa keinaka, “Mai,” keoma. Ke kaisau aina epaaua isa ainaꞌi elogo auga feifa, “Mai,” feoma. Ke kaisau aiso ekupu auga femai. Ke kaisau anina eani auga, femai fei mauni epipeni auga afa laaꞌi, feafi aagenia mo.

18 Lau papiau maꞌoai Deo ega iifa iꞌina pukagai profeta koa iꞌopoga iifafouga emia aꞌo kelogo auꞌi maꞌoai ainaꞌi iina lapalogo oma: Aufalao agaꞌo iꞌina iifaꞌi laagai iifa iꞌoina agaꞌo ageogeaua koa aisama, iꞌina pukagai kapa apalaꞌi fouꞌi kepapuaꞌi auꞌi, Deo egaꞌina kapaꞌi apalaꞌi laagai ageogeaua. 19 Ke aufalao agaꞌo iꞌina pukagai Deo ega iifa profeta koa iꞌopoga iifafouga emia auga agaꞌo ageafilaisa koa aisama, iꞌina pukagai kapaꞌina kepapuaꞌi auꞌi, Deo ega taoniai au mauni epipeni auga faagagai kapaꞌina isa apuga feafia eoma auga ageafania.

20 Ke egaꞌina kapaꞌi maꞌoai koꞌaꞌi mo auga eifafoua auga eifa einaka, “E, lau afaꞌagamo alafai,” eoma.

Amen. Lopia Iesu, mai.

21 Lau lamegamega ega koa Lopia Iesu ega gafegafe Deo ega papiau eeꞌiai feka laoma. Amen.

<- Revelation 21