1 Paulo, Banabas auniꞌi kelao Ikonium taoninai aisama, aufa kina kekapakapa koa iꞌopoga kekapaisa, kelao Iudea papiauꞌi eꞌi laꞌafou afugai kekoko. Egae Deo ega isapuai Deo ega iifa papiau maaꞌiai keifa kapulania. Ega puo Iudea papiauꞌi ke Iudea papiau laaꞌi auꞌi maꞌo paisa Iesu kepakoꞌania. 2 Kai Iudea papiauꞌi isaꞌi Iesu akepakoꞌania auꞌi kelao Iudea papiauꞌi laaꞌi auꞌi aloꞌi keaniia. Ega koa kekapaisa, Iudea papiau laaꞌi auꞌi opoꞌi kepalifu alogaina. Ega puo Ikonium taoninai Iudea papiauꞌi laaꞌi auꞌi Iesu kepakoꞌania papiauꞌi, ke Paulo, Banabas auniꞌi fou keumakalainiꞌi. 3 Ega puo Paulo Banabas auniꞌi kina maꞌo egaꞌina taoninai keagu. Ke egae keagu alogai aimaniꞌiꞌi mo Lopia Iesu fouga papiau maaꞌiai keifafoua. Ke Lopia isa epalagainiꞌi puo mirakulo ke isapu gouꞌi akaikiꞌaꞌi kekapaiꞌi. Ega koa kekapaisa, Deo ega gafegafe pipenina isa epeniiꞌi auga fouga koꞌa mo emia. 4 Kai Ikonium taoninai papiau ifoꞌi keꞌeaiꞌi, isaꞌi Iudea papiauꞌi afeꞌiai keaulao, ke isaꞌi auꞌi apostolo afeꞌiai keaulao. 5 Ega aisama Iudea papiauꞌi, Iudea papiau laaꞌi auꞌi, ke isa keꞌimaꞌi auꞌi fou epoꞌiai iifa kepaapa apostolo fekeafi apalaniꞌi kepoai fekefoupuguꞌi keoma. 6 Kai apostolo iꞌina iifaga fouga kelogo puo, kepiaukoko Likaonia ago akaikiꞌa kelao. Ke kelao egae aisama, Listra ke Derbe taoniꞌiai kekoko, ke egae kai kelao egaꞌina taoniꞌi afeꞌiai isafa aloꞌiai kekoko. 7 Ke egae papiau maaꞌiai iifa faunina Iesu fouga keinogonia.

8 Paulo Banabas auniꞌi Listra taoninai keagu, iifa faunina Iesu fouga keinogonia alogai, au agaꞌo mauniai ife emelo aepeapea auga isafa egae eagu. 9 Egaꞌina auga Paulo eniniꞌani auga aina elogonia. Ke Paulo maaga elao melo auga eisa, ke au egaꞌina epakoꞌania felo agemia auga eisa elogo. 10 Ega aisama eifa akaikiꞌa einaka, “Moꞌue ifemuai moapa opai,” eoma. Ke fiakoa mo melo auga egopoꞌuege eꞌina epea.

11 Pau laꞌafou papiauꞌi Paulo kapaꞌina ekapaisa auga keisa aisama, Likaonia malagai aisoꞌi gomegai keagaga keinaka, “Deo iꞌa papiau aumauni koa iꞌopoꞌa emia eake emai eeꞌaisai,” keoma. 12 Ke Banabas kepafaala, isa eꞌi deo akagai Seus keoma. Kai Paulo isa eꞌi deo akagai kepafaala, Hermes keoma. Gome isa niniꞌani auga. 13 Egae kai sakedote Seus keau afagaina eꞌa taoni afegai eapa auga eꞌagai epinauga auga agaꞌo ke kelaꞌafou papiauꞌi fou aꞌo keauniiꞌi, eꞌi deo fekepaꞌa peniꞌi keoma puo, polomakau ke salusalu fou eafiiꞌi emaiseiniꞌi taoni paꞌafina akegai.

14 Kai apostolo Banabas Paulo auniꞌi fou iꞌina aꞌoaꞌo kelogonia aisama, afeꞌi tiapuꞌi keꞌiꞌiokaꞌi, laꞌafou alogai kepiaukoko keagaga keinaka: 15 “Au, oi kapa puo iꞌina kapaꞌi okapaꞌi? Lai isafa papiau aumauni oi koa iꞌopomi. Kai lai oi maamiai ainogo ega koa oi iꞌina kapaꞌi kapa agaꞌo afakepagama auꞌi fomuniꞌi kai Deo eague aoniamo, ufa, aagoa, aꞌu, ke kapa maꞌoai aloꞌiai epagamaꞌi auga foaipenia aoma. 16 Ufainagai Deo agofaꞌa maꞌoai epuaꞌafuniꞌi ifoꞌi kapaꞌina anina keani auga mo kekapaiꞌi. 17 Ega mo ganinagai Isa koꞌa eague auga papiau epakinaꞌi aefuafua. Isa ega gafegafe iꞌa epakinaiꞌa, ufai imu epaꞌaua, ke foꞌama iꞌoiꞌi iꞌoiꞌi aufa eꞌi kinai epeniꞌa. Deo ega koa ekapa foꞌama maꞌo iꞌa epeniꞌa aloꞌa epagama,” eoma. 18 Isa egaꞌina iifaga keifania mo ganinagai, laꞌafou kegapaapakipoꞌi aꞌo isa fakepaꞌa peniꞌi keoma auga eꞌinoka alogaina. Kai fuagai kepaapakipoꞌi.

19 Egae kai Iudea papiauꞌi isaꞌi Antiok ke Ikonium taoniꞌiai kemai auꞌi, papiau laꞌafou alogai aloꞌi keaniia kelaꞌa pagainiꞌi isa fou kemia. Ke egaꞌina papiauꞌi Paulo kepoai kefounia. Ke kefounia afegai keopolaga emae keoma puo kelaꞌalaisa taoni afe kelaoaina. 20 Kai Iesu kepakoꞌania auꞌi kelao Paulo keapa lofe aisama, eꞌuegekae taoni alogai ekoko pugu. Ke egani aisama, Banabas auniꞌi Listra taonina kepuaꞌafuga Derbe taonina kelao.

21 Ke isa Derbe taoninai kekoko iifa faunina Iesu fouga keinogonia, ke egaꞌina papiauꞌi maꞌo paisa kelaꞌa pagainiꞌi Iesu kepakoꞌania afegai aisama, kemue Listra, Ikonium, ke Pisidia ago Antiok taonina kelao pugu. 22 Ke egaꞌina taoniꞌiai kekoko aisama, pakoꞌa papiauꞌi magogo kapula kepeniiꞌi, Deo fekepakoꞌania ega iifai fekeagu felo keoma. Ke kepainiꞌi keinaka, “Deo ega agofaꞌai amakoko aoma koa aisama, kina maꞌo Iesu faugai papiau akeafi apalaniꞌa, agakiekie kakaua kai, Deo ega agofaꞌai agakoko agekaina,” keoma. 23 Egae kai Paulo Banabas auniꞌi egaꞌina taoniꞌiai pakoꞌa papiauꞌi epoꞌiai iifi eꞌa au akaikiꞌaꞌi auꞌi kekinaniꞌi, pakoꞌa papiauꞌi fekeꞌimaꞌi keoma. Ke kekinaniꞌi aisama, keani gopegope, imaꞌi kaniaꞌiai keogeiꞌi ke Deo kepakoꞌania auga kemegamega penia isa fepalagainiꞌi egaꞌina pinauga fekekapa felo keoma. 24 Ke Pisidia ago kepeaisa efua afegai aisama, kepuaꞌafuga Pamfilia ago kelao. 25 Ke egae Perka taoninai iifa faunina Iesu fouga keinogonia afegai aisama, kekailai Atalia taonina kelao.

26 Atalia taoninai lontiai kemue, Siria ago Antiok taonina kelao pugu. Antiok taonina egaꞌina auga, ufainagai Deo anina eani Paulo, Banabas auniꞌi, Isa Ega pinauga fekekapa eoma. Ega puo pakoꞌa papiauꞌi, Paulo Banabas auniꞌi kekinaniꞌi Deo ega pinauga kepeniiꞌi, Deo ega gafegafe akaikiꞌagai fekekapa keoma. Pau egaꞌina pinauga kepeniiꞌi auga kepafua aisama, kemue kelao egaꞌina afugai pugu. 27 Ke kemai egaꞌina afugai kekoko aisama, pakoꞌa papiauꞌi keifa kaiguguꞌi. Ke maaꞌiai Deo isa auniꞌi faagaꞌiai kapaꞌina ekapaiꞌi, ke ala koa Deo paꞌafi epaagalaisa Iudea papiau laaꞌi auꞌi Lopia kepakoꞌania auga fouga keifafoua. 28 Ke egae Iesu kepakoꞌania papiauꞌi fou kina maꞌo keagu.

<- Acts 13Acts 15 ->