1 Ke pau oi malele oulaisa amage paꞌanina opaꞌani auga, afa alaoge. Oi emi agu kainai, au agaꞌo afaeamage auga felo. 2 Kai papiau maꞌo alogaina auꞌi, papiau agaꞌo fou akeamage kai fou kefeu amage koa laoga maina kekapa kainai, papiau keamage koa aisama, au agaꞌo akafa fepagome paisa, ke papie isafa akafa fepagome. 3 Ke au auga, isa akafa auniꞌi keamage auga laoga maina eegai fekapa auniꞌi fekefeu. Ke papie isafa, akafa au eegai iꞌopoga mo fekapa. 4 Papie imaauga auga, isa ifo mo apuga laaꞌi kai, akafa au isafa apuga. Ega koa iꞌopoga, au imaauga isafa, isa ifo mo apuga laaꞌi kai, papie isafa apuga. 5 Ke oi akafami fou feu foloumaka aage mo kai ifomi alomi koꞌagai fomegamega agooma koa aisama, fou kaimialao iifa fopaapa, kina pika koa mo alogai aunimi folofeu. Kai egaꞌina agokapa afegai aisama, fomai akafami fou fofeu pugu, ega koa oi alomi apokega kainai Satani faeꞌopoimi. 6 Lau iꞌina laifania auga oi fokapa alaoma kai, opola koa lapenimi, ega koa kapaꞌina felo auga mo fokapa laoma. 7 Lau auga alafai gaoma, papiau maꞌoai pau lau alaamage koa iꞌopoga isa fakeamage fai laoma. Kai Deo papiau agaꞌo agaꞌo aua eꞌi ipeni epeniiꞌi, agaꞌo auga feamage eoma, ke agaꞌo auga faeamage eoma.

8 Ke pau auga, akeamage auꞌi, ke afuafu, oaꞌoae fou fouꞌi alaifania. Isa auga pau lau alaamage koa iꞌopoga, isa isafa afakeamage auga felo. 9 Kai isa ifoꞌi aloꞌi afakepakapulania koa aisama, fekeamage. Gome akeamage auga felo kai, afakeamage kai amage laoꞌi maiꞌi aloꞌiai mo ageka, lo koa iꞌopoga imaauꞌi ageuma auga apala ipauma.

10 Ke pau keamage auꞌi eꞌi iifa kapula iꞌina lapeniꞌi. Iifa inaꞌina auga lau ifou ainau fouga alaifania kai, Lopia ega iifa oi maamiai laifania. Papie agaꞌo isa akafa faepuaꞌafuga. 11 Kai isa akafa agepuaꞌafuga koa aisama, isa faeamage pugu kai feagu mo. O ageagu mo afaekaina koa aisama, isa femue felao akafa auniꞌi fekegagao fekeagufou pugu. Ke au isafa isa akafa faepaake.

12 Ke epomiai papiau isaꞌi auꞌi, iꞌina iifaga lapeniꞌi. Iꞌina iifaga auga Lopia ega iifa laaꞌi kai, lau ifou eꞌu opola oi maamiai laifania. Oi epomiai aami akimi Kristiano auga agaꞌo akafa Kristiano papiega laaꞌi kai, papie egaꞌina elogo isa auniꞌi kegaagu eoma koa aisama, akafa egaꞌina faepaake. 13 Ega koa iꞌopoga, Kristiano papiega agaꞌo akafa Kristiano auga laaꞌi kai au egaꞌina elogo isa auniꞌi kegaagu eoma koa aisama, papie isa akafa egaꞌina faepaake. 14 Gome au egaꞌina Kristiano auga laaꞌi mo ganinagai, akafa papie Iesu epakoꞌania kainai, ega laomaisai isa Deo maagai alo lolofa auga agemia, ke fuagai Deo isa isafa kania ageagamauga agekaina. Ke ega koa iꞌopoga, Kristiano papiega laaꞌi auga, isa akafa au Iesu epakoꞌania kainai, isa Deo maagai alo lolofa papiega agemia, ke fuagai Deo isa isafa kania ageagamauga agekaina. Kai lau kapaꞌina laifania auga afolokapa koa aisama, oi gaumi Deo akelogonia auꞌi gauꞌi koa iꞌopoꞌi akemia. Kai lau kapaꞌina laifania auga agokapa koa aisama, oi ina ama aumi Deo maagai alomi opaina emia puo, oi gaumi isafa Deo maagai aloꞌi opaina agemia.

15 Ke Deo auga iꞌa eifaniꞌa gagaoai faagu eoma. Ega puo Kristiano auga laaꞌi, o Kristiano papiega laaꞌi auga akafa Kristiano auga, o papiega gapuaꞌafuga galao ageoma aisama, Kristiano auga o papiega isa akafa egaꞌina fepuaꞌafuga felao. Gome Kristiano auga, o Kristiano papiega akafa agepuaꞌafuga agelao auga laoga maina isa aegopeisa. 16 Lau ega laifa oma, gome oi papie aumi, ala ologo oma oi akafami fou agoagu aisama, kaniaꞌi agoagamauga ooma? Ke oi au aumi isafa, ala ologo oma oi akafami fou agoagu aisama, kaniaꞌi agoagamauga ooma?

17 Ke Kristiano auga, o papiega akafa agepuaꞌafuga agelao auga, laoga maina isa aegopeisa. Kai ega mo ganinagai, Deo oi agaꞌo agaꞌo ala foagu oma aguga epeniimi, ke eifanimi ega foagu oma eoma auga, agugai foagu. Lau inaꞌina iifaga, iifi eꞌa maꞌoai maaꞌiai laifaniꞌi fekekapa laoma. 18 Ega kainai oi epomiai Iudea auga agaꞌo maguaega faaga iifalaina emia efua kai, Deo isa eifaga koa aisama, isa maguaega faaga iifalaina afuꞌi faeogefakeꞌi. Ke ega koa iꞌopoga, Iudea auga laaꞌi auga agaꞌo maguaega faaga iifalaina aemia koa kai, Deo isa eifaga koa aisama, isa maguaega faaga iifalaina faemia. 19 Gome Deo eegai auga, au maguaeꞌi faagaꞌi iifalaina femia ma, faemia ma ganinagai, kapa agaꞌo laaꞌi. Kai Deo ega iifa foafiꞌi kaiꞌiai fopea auga kapa akaikiꞌa. 20 Ke lapainimi pugu, oi maꞌoai ala oagu oma emai Deo eifanimi kinagai auga, ega mo foagu oma, ke faagamiai kapa agaꞌo folokapa. 21 Ke oi kalaꞌafi omia alogai Deo eifanimi koa aisama, oi egaꞌina opopo folopaꞌaua. Kai kalaꞌafi pinaugaga egaꞌina oi egopeimi koa auga eegai agopealai agekaina koa aisama, fopealai. 22 Gome aufalao agaꞌo kalaꞌafi pinaugaga ekapa mo ganinagai, Lopia isa eifaga aisama, Lopia agogai auga, isa kalaꞌafi laaꞌi. Ega koa iꞌopoga aufalao agaꞌo kalaꞌafi pinaugaga aekapa eagu aage mo auga Lopia isa eifaga aisama, egaꞌina auga Kristo ega kalaꞌafi emia. 23 Ke oi auga, Iesu ifagai iꞌafami emia kainai, oi papiau aumauni eꞌi kalaꞌafi folomia. 24 Ega puo aau akiu Kristiano aumi, oi faagamiai kapa agaꞌo aemia alogai Lopia eifanimi aisama, faagamiai kapa agaꞌo folokapa kai, Lopia ega logoai ega mo foagu oma felao.

25 Ke pau auga, papiau akeamage auꞌi fouꞌi alaifania. Kai iꞌina iifaga auga Lopia eegai iifa kapula alaafia kai Lopia ega gafegafe kainai, epakoꞌaniau iꞌina opolaga faifania eoma puo, laifania. 26 Lau laopolaga auga, pau iꞌina kina auga kina apalaꞌiai aaguega puo, pau ala oagu oma auga, egaꞌina agugai mo foagu. 27 Oi oamage ma? Ke oamage koa aisama, akafami ipaakeꞌi auga keagaga folokapuga. Ke oi aloamage ma? Ke aloamage koa aisama, akafami agaꞌo folokapuga foloamage. 28 Kai oi afoamage koa aisama, laomai apala agaꞌo afolokapa. Ke kaisau au agaꞌo, o papie agaꞌo fou akefeufeu auga fou afekeamage koa aisama, isa isafa apala agaꞌo afaekapa. Kai kaisau keamage auꞌi eꞌi agu alogai kiekie maꞌo akeafiꞌi. Kai lau anina laani oi egaꞌina kiekieꞌi foloafiꞌi laoma puo, iꞌina kapaꞌi maamiai laifaniꞌi.

29 Aau akiu Kristiano aumi, lau kapaꞌina maifania laoma auga, iꞌa iꞌina kinaꞌi aloꞌiai aague auꞌa, aꞌa agu epo afaemaefa. Ega puo au kapaꞌi keamage auꞌi, akeamage koa iꞌopoga fekekagakaga akafaꞌi fakepakaukauꞌi kai, Deo fekepakaukaua. 30 Ke kaisau keapepe auꞌi, akeapepe koa fekekagakaga. Kaisau aloꞌi egama auꞌi, aloꞌi aegama koa fekekagakaga. Kaisau kapa agaꞌo moniai keꞌafa auꞌi, egaꞌina kapa isa apuꞌi laaꞌi koa fekekagakaga. 31 Ke kaisau iꞌina agofaꞌa amuꞌi kepapinauganiꞌi auꞌi, egaꞌina kapaꞌi minoꞌi faepogu maaꞌi faelaꞌa meꞌe. Gome iꞌina agofaꞌa kapaꞌi auga, pau laaꞌi kemia kelaoaina.

32 Ke lau anina laani oi kapa agaꞌo opopo folopaꞌaua laoma. Au agaꞌo aeamage auga, Lopia alo ala agepagama oma auga mo opopo epaꞌaua, ke isa mo ega pinauga ekapa. 33 Kai au kapa eamage auga, iꞌina agofaꞌa kapaꞌi mo, ke akafa alo ala agepagama oma auga mo opopo epaꞌaua. 34 Ega koa ekapa, isa opo agaꞌomo aemia kai, opogai kapa maꞌo mo eopolaniꞌi. Ke papie aeamage auga, o papie au agaꞌo fou akefeufeu auga Deo mo ega pinauga eopolaga puo, imaauga fofougai ke alo lolofagai Lopia mo ega pinauga opopo epaꞌaua. Kai amage papiega auga iꞌina agofaꞌa kapaꞌi mo, ke akafa alo ala fepagama oma auga mo opopo epaꞌaua. 35 Lau iꞌina laifania auga oi foamage, o foloamage alaoma. Kai iꞌina iifaga auga oi fepalagainimi Deo maagai foagu felo, opomi ke alomi fofouga Lopia mo eegai fooge, ke isa mo ega pinauga fokapa laoma puo laifania.

36 Kai oꞌoae agaꞌo ke ifiao agaꞌo au fou akefeufeu auga auniꞌi kepakoꞌania fekeamage keoma. Ke ifiao egaꞌina ega amage kina ekainia kai, oꞌoae egaꞌina ifiaoga aeakafania puo, afeopolaga eegai apala ekapa afeoma. Ke oꞌoae egaꞌina ifo faaga gamuga ageopo, anina ageani gaamage afeoma koa aisama, isa ifiao auniꞌi fekeamage. Gome egaꞌina ekapa auga Deo maagai laomai apala agaꞌo aekapa. 37 Kai oꞌoae agaꞌo auga, kai agaꞌo isa aepaafia gaamage aeoma kai, ifo opo epaapa agaꞌonia mo afaeamage eoma. Ke faaga gamuga eopo ifo ageꞌima agekaina, ke ifo mino epaapa agaꞌonia mo, ifiao au fou akefeufeu auga auniꞌi afakeamage ageoma koa aisama, isa isafa apala agaꞌo afaekapa. 38 Ega puo oꞌoae kapa ifiao au agaꞌo fou akefeufeu auga ageakafania auga laomai felo ekapa. Kai oꞌoae kapa ifiao agaꞌo au fou akefeufeu auga auniꞌi fekeamage keoma kai aeakafania auga, laomai felo ipauma ekapa, oꞌoae eamage auga ega felo ekaꞌegaina.

39 Kristiano papiauꞌi epoꞌiai auga, papie agaꞌo akafa auniꞌi kegopeiꞌi koa iꞌopoga. Isa akafa eaguega kai, ifo afaeꞌue au iꞌoina agaꞌo afaeakafania. Kai akafa agemae koa aisama, isa ifo kaisau gaakafania ageoma agekaina. Kai au egaꞌina auga Lopia Iesu ega papiau agaꞌo femia. 40 Isa ageamage koa aisama, alo agegama. Kai lau laopolaga isa afaeamage kai ala eagu oma koa mo ageagu koa aisama, alo agegama alogaina. Iꞌina auga lau opolau laifania. Kai lau laopolaga kapaꞌina laifania auga, Deo ega Spiritu epalagainiau laifania.

<- 1 Korinto 61 Korinto 8 ->