2 Korin 6

Nombuⱡa Rung Wu Kʉⱡ, Mbun Puⱡi Tʉk Mek Kongun Etʉng

1 Tʉn Got nga ronduⱡ ila kongun etpʉn kʉn, enim ik ronduⱡ kat kundpʉn ninmʉn. Enim Got nga wamp poⱡ ti uⱡ ei, tʉk pora ndurʉng. Uⱡ ei, enim ndi, nʉwa wak rui nʉrʉi, mon! 2 Got ndi, nimba mel,

“Na nga ui kai ila, na ndi, nim nga ik nitin ei, kum tep pit. Na nim etʉp timp ui ila, na ndi, nim tʉp rʉpʉndʉnt,” nʉtʉm.

Enim pilik kai itʉi! Akup nga ant ila, Got nga wamp poⱡ tʉmba ui ei, akup. Wote, wamp etpa tʉmba ui ei, akup ku.

3 Tʉn nga kongun enmʉn ei, wamp ti ndi, nʉk kit mundi nʉmʉndeing nimbun kʉn, wamp ti nga nombuⱡa mam ila uⱡ ti etpʉn, kit mundi nʉmʉndʉrmʉn, mon! 4 Wote ei kelpʉn, tʉn Got nga kongun wu kʉⱡ mormin nimbun kʉn, namba uⱡ etmin mbʉ, wamp mbʉ kʉn tʉpʉn, ora ndurmʉn. Mbun elpa elpa mat, tʉn kʉn orum ku. Wote, uⱡ kit mat ndi, tʉn etpa kit mondnʉm ku. Wote, tʉn ronduⱡ mundpʉn mormin mint. 5 Tʉn tʉmbʉⱡ ndi rok, kan nguk etmin. El puⱡa wamp mbʉ ndi, tʉn tʉk ruk nduk mondʉk, ik kit nguk etmin, kongun minal etpʉn, ur pi napʉtmʉn, kump kun pukʉ moⱡpʉn etmʉn. 6-7 Tʉn numan kun kai mbʉ pilpʉn, uⱡ eng nui kupa mbʉ mint etmʉn. Tʉn ik mura tʉkʉrpʉn iti natʉtmʉn. Tʉn ndi, Got nga kongun wamp mbʉ, etpʉn kai mint mondurmʉn. Muⱡnga Wingti nga ronduⱡ ei, tʉn kʉn tetʉm ila, tʉn ndi, wamp mbʉ numan ngurmʉn. Tʉn nga keta ila mint, ni nandʉtmʉn, mon! Wote, tʉn ik kupa ei mint nimbun, ekit ndurmʉn. Tʉn Got nga ronduⱡ ila mint kongun etmʉn. Tʉn numan kun kai kʉⱡ mint pilpʉn kʉn, rʉk rʉk uⱡ kit mbʉ, el ropʉn itmin mel mbʉ tʉpʉn, ki mbo orunga ambuⱡpʉn, wote ki rar orunga ambuⱡpʉn, el etmʉn. 8 Wamp mat tʉn nga kaip nʉndʉtmʉn, wote wamp mat ndi, tʉn nga orunga nʉk kit mondurmin. Wamp mat ndi, tʉn nga ik mbuldung nʉndʉtmʉn. Wote wamp mat ndi, mat kundʉk, tʉn uⱡ kai mbʉ etmʉn nʉtmin. Wamp mat ndi, tʉn ik kol ronmʉn nʉtmin. Wote ei mon! Tʉn ik kupa ei, mint nʉtmʉn. 9 Wamp mat ndi, tʉn pilik mbi ndui nandʉrmin. Wote, wamp mat ndi, tʉn pilik mbi ndurmin. Tʉn koⱡmina ei nga, wote kont mbun mormʉn. Got ndi, tʉn tʉmbʉⱡ ndi rorum ei nga, ropa tʉpa kun mundpa kʉn, tʉn tʉmbʉⱡ ndi ropa, kundi nakʉndrʉm. 10 Tʉn numan mbun kandʉp tʉtmin ku. Wote, rʉk rʉk numan kai pili uⱡ ei, tep mormʉn. Tʉn wamp kurpa na ni mel raⱡʉp moⱡpʉn, wote wamp minal etpʉn, nuim mondurmʉn. Tʉn mel mat, tepʉn muⱡi nambʉrmʉn, wote Got nga mel puⱡi, tʉn tep mormʉn.

11 Enim Korin wamp mbʉ ye! Tʉn ndi, enim numan minal ngumbun kʉn, tʉn nga ik rukʉr orunga pʉtmʉn mbʉ, enim kʉn nimbun piral ndupʉn ngunmʉn. 12 Tʉn ndi, enim kʉn, numan minal nguⱡmina. Wote, enim ndi, tʉn numan ngui nganggʉk kʉn, enim nga numan orunga tʉn kʉn, kumba rok mormin. 13 Akup na ndi, enim kundʉp nʉnt. Uⱡ ei, tipam ndi, kangambuⱡa mbʉ kʉn, nʉtʉm ni mel nʉnt. Tʉn ndi, enim numan ngunmʉn ei mel, enim ndi, tʉn numan minal ngʉi!

Uⱡ Kit Iti Wamp Mbʉ Kʉn, Rup Rui Nurmin

14 Mbo wamp kʉⱡ, wamp rʉⱡaip kat mormin. Enim wamp kʉⱡ kʉn rʉp rok andʉk, uⱡ mat eng mbʉ, tʉk rapʉndʉk iti nʉtʉi, mon! Uⱡ kun kai ei kʉn, uⱡ kit iti uⱡ ei kʉn, kapⱡa tʉp rak nduimʉn ei? Rʉⱡang ei kʉn, rumbʉⱡ ei kʉn, tʉkʉⱡ rak ndukʉⱡ kongun etmbil ei? Ei mon! 15 Kraist kʉn Seitan raⱡ numan tenda pʉtʉmbil ei? Mondpa pili wamp ei kʉn, mondpa pili nʉpili wamp ei kʉn, numan tenda pʉtʉmbil ei? Ei mon! 16 Kur kit atinga rundi uⱡ ei kʉn, Got nga manga wingti raⱡ, tʉk rak ndukʉⱡ kongun etmbil ei? Tʉn pʉtmʉn ni ka! Got rʉk rʉk kont morum. Ei nga, manga wingti ei, tʉn wamp mbʉ mormʉn. Got ndi, nimba mel,

“Na ndi wamp mbʉ nga ruk ting ila moⱡʉp, rʉp rop nombuⱡa andʉp itamba kʉn, wamp mbʉ, na kʉn muⱡangina, na wamp mbʉ nga Got ei muⱡimp,” nʉtʉm.

17 Wote Got ndi, nimba mel,

“Enim ndi, wamp uⱡ kit etmin mbʉ, wak rok puk, ronggʉt elpa muⱡʉi! Enim mel ⱡar morum mbʉ, ʉmbʉⱡi nʉmbʉⱡʉi! I tangina kʉn, na ndi, enim rukʉr timp. 18 Uⱡ i eng ndam, na enim nga Tipam ei muⱡamba kʉn, enim wamp mbʉ, na nga kangambuⱡa kʉⱡ muⱡing,

Got Wu Ronduⱡ Pi ei ndi,

ik mbʉ nʉtʉm.”

<- 2 Korin 5 2 Korin 7 ->