1 Angmʉn! Na enim kʉn unt omp ik nʉmp ngur ni, Muⱡnga tepa mul wamp mbʉ kʉn, ik nʉt ei mel, ni nʉndʉt mon! Enim kʉn ik nit ei, enim mbo wamp rʉⱡaip mbʉ mel molk, Kraist nga uⱡ tetʉm mbila, mondʉk pʉtmin uⱡ ei, kangambuⱡa kel mel moⱡʉngina, kandʉp nit. 2 Enim rʉng ronduⱡ mat ngui nganggʉp, aim mint ngur. Ei nambuⱡ emel, enim rʉng ronduⱡ mat nuing ei nga, kapⱡa mon itim ila, kandʉp it. Wote, akup ui ila kep, enim rʉng ronduⱡ nuing ei nga, tʉk kun etʉk, muⱡi nambʉrmʉn ku. 3 Ei nambuⱡ emel, enim mʉi kona wamp rʉⱡaip pek mormin ei mel ku mormin. Enim nga ruk ting ila, wamp ti kʉn, ik mura iti uⱡ na, wʉlʉk rui uⱡ mbʉ etʉk ku mormin. Uⱡ etmin mbʉ ndi, enim Got nga wamp mel mon, enim mʉi kona wamp mendpʉⱡ ralk mormin. 4 Ei nambuⱡ emel, enim nga ruk ting ila, wamp ti ndi, nimba mel, “Na Pol kʉn mor,” nitim. I nilinga, wote wamp ti ndi, nimba mel, “Na Apolus kʉn mor,” ninim. Uⱡ ei ndi, ora ndupa, enim mʉi kona wamp mendpʉⱡ kʉⱡ, mormin mel enim.

5 Ei kʉn, Apolus ei wu nam? Wote, Pol ei wu nam? Tʉl Got nga kongun kindmant wu mendpʉⱡ raⱡ. Got ndi, kongun elpa elpa, tʉl kʉmp tʉpa ngurum ei mel, enim kʉn elimbuⱡa enim. Got kʉn mondʉk pʉtʉng. 6 Na ndi, rʉng mbo mundʉr. Wote Apolus ndi, nu ngurum. Wote, Got elim ndi, rʉng kʉⱡ etpa ou endʉtʉm. 7 Rʉng rarum wu ei kep, nu mundrum wu ei kep, wu raⱡ nga kongun ei nga ronduⱡ ei, mana mel, Got ndi, rʉng elinga, ou etʉm uⱡ ei, uⱡ ingk. 8 Rʉng mbo mondrum wu ei kep, nu mundrum wu ei kep, wu raⱡ nga kongun etmbil raⱡ, kapⱡa mint. Got ndi, wu raⱡ nga elpa elpa kongun etmbil ei mel, kai mat nit ila, mel kai mat punt ropa ngumba. 9 Enim Got nga kongun kona moⱡina, tʉl Got nga kongun endinmbʉⱡ. Wu raⱡ enim wamp kʉⱡ, Got nga manga ei mormʉn.

10 Got ndi, na memp kai ti ngurum ila tep moⱡʉp, manga mam mbʉ, rakpa tʉpa, mindi wu ni mel, manga ronduⱡ mba moⱡmba, kongun kuimp tepa ku pol ei, na ndi tit. Wote, ku pol etʉp tit ila wu mat ndi, manga raknʉmʉn. Wu elpa elpa ok, manga ei, rakʉk oⱡa ting ei, unt wu ei, rakpa mondum ei mel ku, kandpa pilpa kongundpa rakʉpa oⱡa tangga! 11 Nambuⱡ emel, Got ndi, manga ronduⱡ mba moⱡmba kongun kuimp tepa ku pol iti uⱡ ei, Jisas Kraist etpa mundrum. Manga ku pol ronduⱡ ei, Kraist elim tenda waⱡʉm ei morum. Ei nga, nombuⱡa mam elpa tila ku pol ronduⱡ etʉk, Got nga manga ei rʉking mel mon. 12 Ei nga, wamp mat ndi, ku gol na, silpa na, ku eng nui kai mat tʉk ku pol ila rʉking. Wamp mat ndi, nde na, ʉngʉmp na, tʉmbʉⱡ na mel mbʉ, tʉk manga rʉking ei nga ku pol ila ku rʉking. 13 Wamp tenda tenda ei nga kongun em ei nga, eng nom nit ei, wakʉt Kraist nga Ui Ou ei kʉn, tʉpa mot ndangga kʉnmin. Ui Ou ila ndip ei ndi, wamp elpa elpa mbʉ nga kongun eng nit mbʉ, tʉpa mot ndumba. Ndip ei ndi nangga, kongun ei nga ronduⱡ ei nangga, ui ou ila kandʉp mbi nduimin. 14 Wamp ti nga manga ku pol ronduⱡ ila rakʉm ei, ndip ei ndi, nui nanʉm ndam, Got ndi, wamp ei mel kai ti, punt ropa wei gem ngumba. 15 Wote, wamp ti nga manga rakum ei, ndip ei ndi, nomba pora ndum ndam, wamp ei, elim mel wei gem ti natʉmba. Ei wote, wamp ei, elim kont moⱡmba. Moⱡpa kʉn, elim ndi, ndip anmbil mam ei ndi, nomba pora ndom ti ont, nimba pilmba.

16 Enim Got nga manga wingti, wote Got nga Muⱡnga ei, enim kʉn rukʉr orunga morum, ni pili napʉtmʉn ye! 17 Ei nga, wamp nam ti ndi, Got nga manga wingti ei, etpa kit mondum ndam, Got ndi, wamp ei etpa kit mondʉmba ku. Ei nambuⱡ emel, Got nga manga ei wingti, wote enim wamp kʉⱡ, elim nga manga wingti mbʉ.

18 Wamp ti ndi, el elim tʉpa wʉlʉ mundi nʉmʉndangga. Wote enim nga ruk ting ila wamp ti ndi, elim mʉi kona uⱡ mbʉ nga pilpa kungʉndi tep mor nimba pilim ndam, elim mʉi kona uⱡ mbʉ nga numan mbo kai pi nʉpi wamp rʉⱡangga! Wote wamp ni, pilpa kungʉndi kai pindi wamp raⱡmba. 19 Ei nga, ya mʉi kona wamp mbʉ ndi, pilpa kungʉndi ronduⱡ mat nʉk pʉnmin mbʉ, Got ndi tʉpa pei mundrum. Buk Wingti ei ndi, nimba mel,