ሃይሾ ታኣኒ ታኣኮ ዱማ ዱማ ባኮ ቱኮና ጎዦ ጋሮ ጌሌኔ፤

ዔኤዞ ፆሎሎ ሾፖና ዎላ ታኣኒ ሙዔኔ፤

ዎይኖ ዑዦንታ ዲኢቆንታ ታኣኒ ዑሽኬኔ።

ናሹሞ ዒንሢ ዒና ዓኣሣንዳያ ሄላንዳኣና

ሙይ፥ ዑሽኩዋቴ።

ታ ዒሼ ሂዚ ጌይ ዔኤሊንታንቴ ታ ዋይዜኔ፤

«ታኣኮ ናሽኪንታ ዑኡቴሌ!

ሃይማ ፓጬኔ ጌይሳ ባኣዚ ባኣ ዶኦሌሌ!

ሃዳራ ካሮ ታኣም ቡሌ፤

ቶኦካ ታኣኮ ዖልካዼኔ፤

ጋማኣ ታኣኮ ዋንታኣ ቃኣያሢና ዎዔኔ።»

ማይ ጊንሣ ታኣኒ ማኣዖንዶ?

ዓካሪ፥ ጊንሣ ዎዲ ፑርቲሶንዶይ?

ኩጮ ፔኤሲ ዳኬኔ፤

ዒና ታኣኮ ዒዛ ጋይቴ ዱጴኔ።

ካሮ ጎቺ ቡሎ ባኮ ታኣኒ ዓርቃዛ

ኩጫ ታኣኮ ኬርቤ ፆዺሴኔ፤

ኬኤላኣ ታኣኮ ዬያ ሌሊ ማዔኔ።

ጋዓንቴ ታ ዒሼ ባኣሴ፥ ዴንዴኔ፤

ሚርጌና ታ ኮዔኔ፥ ጋዓንቴ ዒዛ ዴንቃኒ ዳንዳዒባኣሴ፤

ታ ዒዛ ዔኤሌኔ፥ ጋዓንቴ ዒ ታኣም ዬሂባኣሴ።

ዔያታ ታና ጳርቂ ማኣሳንሤኔ፤

ዖዶዞ ማኣዓሢ ታኣኮ ጉሲ ዔኬኔ።

ታ ዒሾ ዒንሢ ዴንቄያ ማዔቴ

ዒንሢ ዒዛም ኬኤዛንዳጉዲ ታ ሺኢቃኔ።

ጎኔና ዒሼ ኔኤኮ ሃንጎ ዓሶይዳፓ ዱማዻ?

ዒዚ ሜሌ ዓሶይዳፓ ዱማዻሢ ዓይጎናዳይ?

ታጶ ሺያ ዓቲንቄ ባኣካፓ

ዒዛ ሄላያ ባኣሴ።

ጋሞ ዒዛኮ ጋምፒ ማዦናያ ቁራኬጉዲ ካርታያኬ።

ዑፆ ፔኤኮ ዲኢቂና ማስቴ ዶኦሌ ማላኔ።

ባቃሊ ዓኣ ጎሺጉዲኬ።

ፆዺሳ ሚዛጶ ቡኖጉዲኬ።

ዑፃ ዒዛኮ ሴንፔሬ ጌይንታ ሚዛጶ ሹዎና ሚዛጲሶና ዳርሲ ዓቺጉዲኬ።

ዒብኔቤሬዴ ጌይንታ ሹዎ ቱርቱሮ ማላኔ፤

ሊባኖኦሴ ዹኮጉዲኬ።

ጉቤና ዒዚ ኮሺ ሚዛጳኔ፤

ታኣኮ ዒሼ ያዺኬ፤ ታ ላጋሢያ ዒዛኬ።

<- ቢያፓ ባሼ ዓይኑሞ 4ቢያፓ ባሼ ዓይኑሞ 6 ->