97
ፆኦሲ ቢያፓ ዑሣ ማዒፆ
1 ናንጊና ናንጋ ጎዳ ካኣቲኬ!
ሳዔሌ ኔኤኒ ዎዛዼ፤
ዒንሢ ባዞ ሳዛ ዓኣ ዓጫ
ቢያ ዎዛዹዋቴ!
2 ዒዛኮ ኮሮ ሻኣሬንታ ዹሜ ቃኣዮንታ ካንቂ ዓኣኔ፤
ካኣቱሞ ዖይታ ፂሉሞና ፒዜ ዎጌና ጌሢንቴኔ።
3 ዒዛኮ ቤርታ ታሚ ዓኣዻኔ፤
ኮይሎ ዒዛኮ ማንጊ ዓኣ ሞርኮዋ ሚቻኔ።
4 ዜኤሊንፃ ዒዛኮ ዓጮ ፖዓኔ፤
ሳዓ ዬያ ዛጋዖ ጎጋይቃኔ።
5 ዹካ ናንጊና ናንጋ ጎዳ ቤርታ
ሳዓኣ ቢያ ዓዳ ሾፒጉዲ ዓልቄኔ።
6 ጫሪንጫ ፂሉሞ ዒዛሲ ኬኤዛኔ፤
ዴሬ ቢያ ቦንቾ ዒዛሲ ዛጋኔ።
7 ዓርሲ ኮሾና ማላቶም ዚጋዞንሢ
ሜሌ ካኣሽኮ ፆኦዞና ሄርሺንታዞንሢ
ቢያ ቦርሲንቶንጎ፤
ዒንሢ ሃይ ሜሌ ፆኦዛ ዒዛም ዚጉዋቴ።
8 ናንጊና ናንጋ ጎዳሢዮ!
ዎጋ ኔኤሲ ፒዜ ማዔሢሮ ፂዮኔ ዴራ ዋይዚ ዎዛዼኔ፤
ዪሁዳ ዓጮ ካታማኣ ሚርጌና ዎዛዼኔ።
9 ናንጊና ናንጋ ጎዳሢዮ! ኔኤኒ ሳዖይዳ ቢያ ዼኤፒኬ፤
ሜሌ ፆኦዞፓ ቢያ ኮሺ ኔኤኒ ዼጊ ጋዓያኬ። ዓይኑ. 29፡1-2።
10 ዒንሢ ናንጊና ናንጋ ጎዳ ናሽካ ዓሳ
ፑርታ ባኣዚ ሻኣኪንቱዋቴ፤
ጉሙርቂንታዞንሢኮ ዒዚ ሼምፓሢ ካፓሢሮ
ዋይዞ ዒፃ ዓሶ ኩጫፓ ሄሊ ዒ ዔያቶ ዓውሳንዳኔ።
11 ፖዓ ፂሎ ዓሶም
ዎዛኣ ዒና ፒዜ ማዔዞንሢም ኬስኪ ጴዻኔ።
12 ዒንሢ ፂሎ ዓሳ ናንጊና ናንጋ ጎዳና ዎዛዹዋቴ!