ታ ቃኣሎዋ ዒና ዔኩዋቴ።

ሚናፓ ዓኣቺ ዓማሎ ዓማሊና ታ ኬኤዛንዳኔ። ማቲ. 13፡35።

ኑ ዓዶንሢያ ኑኡም ኬኤዜሢኬ።

ናንጊና ናንጋ ጎዳኮ ዎልቆ ዛሎ

ዒዚ ማዼ ዼኤፖ ማዾና

ዒ ፔ ዎልቆና ማዼ ዲቃሢ ሄርሺሳ ባኮ

ሙካ ሾይንቶም ኑ ኬኤዛንዳኔ።

ዒስራዔኤሌይዳኣ ዎጌ ዒ ጌሤኔ፤

ኑ ዓዶንሢም ዓይሤኔ።

ዔያታ ፔ ዎዶና ዔያቶኮ ናኣቶም

ሃጊ ሾይንታዞንሢማኣ ኬኤዛንዳጉዲኬ።

ዒዛኮ ማዾዋ ዔያታ ዋላዓኬ፤

ዓይሢፆዋ ዔያታ ካፓንዳኔ።

ዓይሢንቲፆዋ ዒፃ፥ ዒኖዋ ፔኤኮ ፒዚሲባኣ

ዓያናኣ ፆኦሲ ጉሙርቁዋ ሾይንቲ ማዓዓኬ።

ሂኢዦ ዓርቄያ ማዔያታቴያ

ዖሎ ኬሎና ጊንሢም ዔያታ ማዔኔ።

ዒዛኮ ዎጎ ጎይፆ ዓኣዺፆዋ ዒፄኔ።

ዔያቶ ዒ ዻዌ ዲቃሣ ዓኮ ባኮዋ ዔያታ ዋሌኔ።

ጊብፄ ዓጫ ፆዓኔ ጌይንታ ቤዛ

ዋኣፆዋ ናቲጉዲ ዔቂሴኔ። ኬሲ. ማፃ 14፡21-22።

ዋንቶዋ ቢያ ታሚ ፆምፔ ዔያቶም ፖዔኔ። ኬሲ. ማፃ 13፡21-22።

ዬካፓ ባዚ ዋኣሢጉዴ ሚርጌ ዋኣሢ ዒ ዔያቶ ዑሼኔ። ኬሲ. ማፃ 17፡1-7፤ ፓይ. ማፃ 20፡2-13።

ዋኣፆ ዎርዚጉዲ ዎይሴኔ።

ዼኤፖ ፆኦዛሢም ዋይዞ ዒፂፆና ጎሜ ማዺሢዳፓ ማዒባኣሴ።

ዔያታ ዒኖና ዔሬያታዖ «ፆኦሲ ዎይታቴያ» ጌዒ ዛጌኔ። ኬሲ. ማፃ 16፡2-15፤ ፓይ. ማፃ 11፡4-23፤31-35።

«ፆኦሲ ዓሲ ናንጉዋ ዳውሎይዳ ሙኡዚ ጊኢጊሺ ዒንጋኒ ዳንዳዓ?

ሂዴቴያ ሙኡዚ ኑም ዒንጋኒና ዓሽኪ ጊኢጊሻኒ ዳንዳዓኔ ጌይሢዳ?» ጌዔኔ።

ያይቆኦቤ ዑፆይዳ ታሚ ዔኤቴኔ፤

ዻጋ ዒዛኮ ዒስራዔኤሌይዳ ዔቄኔ።

ዒዛኮ ዓውሲፆናኣ ጌኤቂንቲባኣሴ።

ጫሪንጮኮዋ ካሮ ቡሌኔ።

ጫሪንቺዳ ዓኣ ሙኡዚ ዔያቶም ዒንጌኔ። ዮሃ. 6፡31።

ሚሽኪ ዶምባ ዓይሳንዳያ ሄላንዳኣና

ዾኦሎ ባንፆ ዢባሮዋ ዔኪ ሙኬኔ።

ባራና ካፖዋ ባዞ ዓጮ ማኣሻሎጉዲ ዒ ኬይሴኔ።

ዓፒሎና ማዢንቴ ማኣሮ ኮራኣ ኬይሴኔ።

ዔያታ ሚርጌና ዓፃዼ ባኮ ዔያቶም ዒ ዒንጌኔ።

ሙዓ ዔያቶኮ ዻንጋ ዓኣ ጎይሣ ዓኣንቴ

ዔያቶ ባኣካፓ «ኑ ዶዲኬ» ጋዓ ዓሶ ዎዼኔ፤

ሃጋ ቡኖ ማዔ ዼጌሢያ ማንፄኔ።

ዒዚ ማዻ ዲቃሣ ባኮዋ ዔያታ ጉሙርቂባኣሴ።

ናንጎዋ ዲቃቲሢና ጋፒሴኔ።

ዒናፓ ኮዒሢና ዒዛ ባንሢ ማዔኔ።

ዼኤፖ ፆኦዛሢ ዔያቶ ዓውሳሢ ማዔሢያ ማሌኔ።

ዬያ ዻንጎና ዒዛም ዔያታ ሉኡቄኔ።

ዒዛኮ ጫኣቁሞማኣ ጉሙርቂንቲባኣሴ።

ዻቢንቶ ዔያቶሲ ዓቶም ጌዔኔ፤

ዔያቶ ዒዚ ባይዚባኣሴ፤

ዻጎዋ ሚርጌ ዎዴ ቲኢሬኔ፤

ዱማ ዱማ ዎዻ ባኮዋ ዔያቶይዳ ዒ ኬይሲባኣሴ።

ዔያታ ዓሲ ማዔሢያ ዒ ማሌኔ።

ዬያ ዳውሎይዳ ዎማዼ ዒዛ ዖዪሴይ!

ዒስራዔኤሌኮ ዱማዼሢያ ዔያታ ዻጋሴኔ።

ዬያ ዎልቆ ዒዛኮ ዔያታ ማሊ ጶቂሢባኣሴ።

ፆዓኔ ጌይንታ ዓሳ ናንጉዋ ዳውላ

ዒዚ ዻዌ ዲቃሢ ሄርሺሳ ማዾ ዔያታ ማሊባኣሴ።

ዛሮ ዋኣፆ ዑሽካኒ ዔያታ ዳንዳዒባኣሴ። ኬሲ. ማፃ 7፡17-21።

ዬይ ሶኦፆምባሢያ ዔያቶ ዻዔኔ፤

ፓንቆዋ ዔያቶም ዳኬኔ፤

ዬይያ ዓሶኮ ካራ ባይዜኔ። ኬሲ. ማፃ 8፡1-6፤ 20፡24።

ሃኣኮዋ ዔያቶኮ ዒ ዓቢሢም ዒንጌኔ። ኬሲ. ማፃ 10፡12-15።

ቤሌሶ ሚፆዋ ቃኣዮና ዒ ዎዺሺ ባይዜኔ።

ሃንጎ ቆልሞዋ ጉጉንሢና ዎዼኔ። ኬሲ. ማፃ 9፡22-25።

ዱማ ዱማ ዎዻ ባኮንታ ዒ ሌሊ ካኣሽኪንታኒ ኮዓ ዻጎዋ ኬይሴኔ፤

ዖሊ ባይዛ ኪኢታንቾዋ ዔያቶይዳ ዳኬኔ።

ዔያቶኮ ሼምፓሢ ሃይቢዳፓ ዓውሲባኣሴ፤

ሼምፓሢ ዔያቶኮ ዱማ ዱማ ዎዻ ባኮም ዓኣሢ ዒንጌኔ።

ካኣሜኮ ዓፒሎና ኮሾና ማኣራ

ቶይዶ ናኣቶዋ ዔያቶኮ ቢያ ጊብፄ ዓጫ ዒ ጋፒሲ ዎዼኔ። ኬሲ. ማፃ 12፡29።

ዓሲ ናንጉዋ ዳውሎይዳ ማራይ ጎይሢ ሄንቄኔ። ኬሲ. ማፃ 13፡17-22።

ሞርኮ ዔያቶኮ ጋዓንቴ ባዛ ሙዔኔ። ኬሲ. ማፃ 14፡26-28።

ዒዛም ዱማዼ ዓጬሎዋ ዔያቶ ዒ ጌልዜኔ። ኬሲ. ማፃ 15፡17፤ ዒያ. 3፡14-17።

ዬያ ዓሶኮ ዓጮ ዔያቶ ዴኔ ማሂ ዒዚ ጊሽኬኔ፤

ዒስራዔኤሌ ዓሶ ፃጶ ዔያቶ ሞርኮ ማኣራ ናንጊሼኔ። ዒያ. 11፡16-23።

ዋይዚያ ዒዛም ዔያታ ዒፄኔ፤

ዳምቦዋ ዒዛሲ ካፒባኣሴ። ሱኡጎ. ማፃ 2፡11-15።

ጉሙርሱዋ ዎቦ ሂኢሺጉዲ ዔያታ ማዔኔ።

ዔያታ ዒዛ ዻጋሴኔ፤

ዓርሲ ኮሾና ሜሌ ፆኦዞ ካኣሽኪፆና

ዻጎ ዒዛኮ ዔያታ ዔቂሴኔ።

ዒስራዔኤሌ ዓሶዋ ጋፒ ዒዚ ሃሼኔ።

ሴኤሎይዳ ፔኤኮ ዎርቆ ቤዞ ዒ ሃሼኔ። ዒያ. 18፡1፤ ዔር. 7፡12-14፤ 26፡6።

ዒዛኮ ቦንቾዋ ሞርኮም ዓኣሢ ዒንጌኔ። 1ሳሙ. 4፡4-22።

ፔ ዴሮይዳ ሚርጌና ዒ ዻጋዼኔ።

ዉዱሮ ናኣቶማኣ ዔፒ ጋኣዴ ጋኣዲንቲባኣሴ።

ዔያቶ ላኣላ ዬኤካኒ ዔያቶ ዳንዳዒባኣሴ።

ዳጋሢ ማሤ ዓሲ ማሢንታዖ ጫርቃሢጉዲ

ጫርሺ ዓሲ ማዒ ዔቄኔ።

ናንጊና ጋፑዋ ቦርሲንቲ ቦርሲንታንዳጉዲ ማሄኔ።

ዔፕሬኤሜ ፃጶዋ ዒዚ ዶኦሪባኣሴ።

ዒዚ ሚርጌና ናሽኬ ፂዮኔ ዹኮ ዶኦሬኔ።

ናንጊና ናንጋያ ማሂ ሳዖ ዒ ዶዲሺ ማዤ ጎይፆ ማዤኔ።

ማራቶ ሄንቆ ቤዛፓ ዒ ዔኬኔ። 1ሳሙ. 16፡11-12፤ 2ሳሙ. 7፡8፤ 1ፆኦሲ. ዓሃኬ 17፡7።

ዒዛ ዴኖ ማዔ ዒስራዔኤሌ ሄንቃንዳንጉዲ

ማራቶ ሄንቂፃፓ ዔኪ ሙኬኔ።

ዔራቶናኣ ዔኪ ዔያቶ ዓኣዼኔ።

<- ዓይኑሞ ማፃኣፖ 77ዓይኑሞ ማፃኣፖ 79 ->