ፂሉሞዋ ኔኤኮ ካኣቲ ናኣዚም ዒንጌ።

ሜታዼዞንሢማኣ ፒዙሞና ዎጋንዳኔ።

ጌሜራኣ ዴሮም ፂሉሞ ዓኣፒ ዔኪ ዬዓንዳኔ።

ማንቆ ዓሶዋ ዓውሳንዳኔ፤

ዓሶ ሄርቂ ዎይሣ ዓሶዋ ዒ ጋኣጫንዳኔ።

ዓጊናኣ ፖዓ ዎዶይዳ ቢያ

ሾይንቲፓ ሾይንቲ ሄላንዳኣና ዒዚ ናንጋንዳኔ።

ዒ ዋርቃንዳኔ፤

ዓዳ ፁቢ ዒርዚጉዲ ሳዓ ጌላንዳኔ።

ዓጊና ፖዖ ሃሻንዳያ ሄላንዳኣና

ዖርጎቹማ ዒዛኮ ሚርጊ ዴዓንዳኔ።

ዔፕራፂሴ ዎራፓ ዴንዲ ዓጮ ጋፖ ሄላንዳኣናኬ። ዛካ. 9፡10።

ሞርካ ዒዛኮ ዒዛ ቤርታ ሎኦሚ ዓጪ ኩኡላንዳኔ።

ጊኢራ ሚኢሼ ዒዛም ዔኪ ዬዓንዳኔ፤

ዓሬቤንታ ሳኣባ ዓጮ ካኣታኣ ዔኤቢ ዒንጋኒ ዒዛም ሺኢሻንዳኔ።

ዴራኣ ቢያ ዒዛም ዎርቃንዳኔ።

ማንቆ ዓሶንታ ማኣዳይ ባኣ ዓሶዋ ዒዚ ሄሊ ዓውሳንዳኔ።

ዬያቶ ሃይቢዳፓኣ ዒ ዓውሳንዳኔ።

ሱጉፃ ዔያቶሲ ዒዛ ቤርታ ቦንቺንቴያኬ።

ሳኣባ ዓጮይዳፓ ዎርቄ ዒዛም ሺኢኮም፤

ሺኢጲሢያ ቢያ ዎዴ ዒዛም ሺኢቂንቶም፤

ቢያ ዎዴ ፆኦሲኮ ዓንጃ ዒዛም ማዖም።

ዹካ ዒዛኮ ሃኣኮ ባቃልሶም፤

ሊባኖኦሴ ዹኮጉዲ ማሊ ማዖም፤

ዔርቲፃ ዒዛኮ ዓቢ ናንጋሢጉዲ ማዖም፤

ዴራ ቢያ፦ «ኔኤኒ ዓንጂንቴያኬ!» ዒዛ ጎዖም።

ናንጊና ናንጋ ጎዳ ማዔ ዒስራዔኤሌ ፆኦዛሢ ዓንጂንቶም!

ዓጫ ቢያ ዒዛኮ ቦንቾና ኩሞም!

ዓኣሜን! ዓኣሜን!

ሃይማ ሄሊ ጋፔኔ።

<- ዓይኑሞ ማፃኣፖ 71ዓይኑሞ ማፃኣፖ 73 ->