ኔኤኒ ታኣኮ ዓኣሺንቲ ቶሎ ካያሢኬ፤

ታና ዳውሳ ዓሶ ቢያሢፓ ማኣዲ ዓውሴ።

ዔያታ ታና ዓዳ ዞቢጉዲ ሾኦላንዳኔ፤

ዓውሳ ዓሲባኣ ቤስካ ዳርዚ ታና ዔያታ ላኣላንዳኔ።

ፔቴ ዓሲምታዎ ፑርታ ባኣዚ ታ ማዼቴ

ታ ላጋሢ ታኣም ማዼ ኮዦ ባኮ ዛሎ ፑርታ ማዺ ታ ማሄቴ

ታ ሞርካሢ ዚቲ ጋዓዖ ታኣኒ ቡሬያ ማዔቴ

ዬያ ባኮ ቢያይዳፓ ፔቴማታዎ ታ ማዼያታቴ፥

ሲላሎይዳ ኮላሲ ቦንቾ ታኣኮ ባይዞንጎ፤

ዒዚ ታና ዎዎዾንጎ።

ታ ሞርኮኮ ዻጎ ኔኤኒ ባይዜ፤

ዎጋ ፒዜ ማዓንዳጉዲ ኔኤኒ ዓይሤ ጎይፆና

ታና ማኣዳኒ ዔቄ።

ዑፃ ዔያቶኮ ካኣቲ ማዒ ዎይሤ።

ናንጊና ናንጋ ጎዳሢዮ! ታ ፂሉሞጉዴያ ታኣም ዎጌ፤

ዼኤፖ ፆኦዛሢዮ! ታ ፒዙሞጉዴያ ታኣም ዒንጌ።

ፑርቶ ዓሶኮ ዋይዞ ዒፂፆ ባይዜ፤

ፂሎ ዓሶ ጋዓንቴ ኔኤኒ ካፔ። ዮሃ. ፆፔዻ 2፡23።

ዒኖ ፒዜ ዓሶ ዒዚ ዓውሳኔ።

ዻጎዋ ፔኤሲ ኬላ ኬላ ፔጋሲ ዻዋያኬ።

ዒዚ ጬንቾ ዓፓሮ ፔኤሲ ዋርቃኔ፤

ሂኢዦዋ ፔኤኮ ዓኣሣኔ።

ታሚጉዲ ዔኤታ ሂኢዦዋ ጊኢጊሻኔ።

ጌኔ ማዾ ጎጳዺ፥ ሉኡዙሞ ሾዓኔ።

ዬያ ዒ ቦኦኬ ዔታ ፔኤሮ ጌላኔ።

ዒ ማዼ ፑርቶ ባካ ዒዛ ቶኦካ ኬዳኔ።

ዼኤፖ ፆኦዛሢ ሱንፆ ቦንቺ ጋላታ ዓይኑሞ ታ ዓይናዻንዳኔ።

<- ዓይኑሞ ማፃኣፖ 6ዓይኑሞ ማፃኣፖ 8 ->