30
ጌኤዦ ማኣሮ ዓንጂ ማዾም ጊኢጊሾ ኬሎ ዓይናዺንቴ ዳውቴ ዓይኑሞ
ጋላታ ሺኢጲሢ
1 ናንጊና ናንጋ ጎዳሢዮ! ሂርኬ ቤዛፓ ኔ ታና ዔቂሴሢሮ
ታ ሞርካ ታኣኮ ሜቶና ዎዛዻንዳጉዲ ኔ ማሂባኣሢሮ
ታ ኔና ዼግ ዼጊዳኔ።
2 ናንጊና ናንጋ ጎዳ ማዔ ፆኦዛሢዮ!
ኔ ታና ማኣዳንዳጉዲ ታ ኔና ዔኤሌም
ኔኤኒያ ታና ፓሤኔ።
3 ናንጊና ናንጋ ጎዳሢዮ! ሼምፓሢ ታኣኮ ሄሊንቱዋያ ማዔ
ዹሞ ዔታፓ ኔኤኒ ኬሴኔ፤
ሊካ ዱኡፖ ዔቶ ኬዲፆይዳፓ ኔ ታና ካፔኔ።
4 ዒንሢ ዒዛም ጉሙርቂንታያ ማዒ ማዻዛንሢ ቢያ
ናንጊና ናንጋ ጎዳ ዓይኑሞና ጋላቱዋቴ!
ዒዛኮ ዱማዼ ሱንፆማኣ ጋላታ ሺኢሹዋቴ።
5 ዒዚ ዻጋዻሢ ቃሚሢ ዎዴምኬ፤
ኮሹማ ዒዛኮ ጋዓንቴ ናንጊና ናንጋያኬ፤
ዋንቶ ዬኤኬ ጎይሣ ዎርቂንቴቴያ
ጉቶ ዎዎዛዺንታኔ።
6 ታና ጉሙርሳ ዓሢ ታኣኒ ዔራሢሮ
«ፔቴታዖ ታ ባሺንታዓኬ» ጌዔኔ።
7 ናንጊና ናንጋ ጎዳሢዮ! ኔ ዼኤፑሞና ዹካ ታኣሲ ዶዴኔ፤
ኔኤኮ ዓኣፖ ካሮ ታ ጊዳፓ ኔ ማሄ ዎዶና ዒና ታኣኮ ዲቃቴኔ፤
8 ናንጊና ናንጋ ጎዳሢዮ! ኔና ታ ዔኤላኔ፤
ኔ ባንሢ ሂዚ ጌዒያ ታ ሺኢቄኔ፦
9 ታኣኮ ዱኡኪንቲፆና ሃይቦና ዓይጎ ኔና ማኣዳንዳይ?
ዓጪ ኔና ጋላታ?
ኔኤኒ ጉሙርቂንታያ ማዔሢ ዓጫ ኬኤዛንዳ?
10 ናንጊና ናንጋ ጎዳሢዮ! ታኣም ዋይዜ፥ ታና ሚጪንቴ፤
ናንጊና ናንጋ ጎዳሢዮ! ታና ማኣዳሢ ኔና ማዔ።
11 ዖዪፆ ኔኤኒ ታኣኮ ዎዛና ላኣሜኔ፤
ሲዮ ፓቲሎ ኔኤኒ ታኣኮ ጉሲ
ፓልሞ ኔ ታና ማይሴኔ።
12 ዬያያሮ ታኣኒ ዚቲ ጋዓዓኬ፤
ጋላታ ዓይኑሞ ኔኤም ታ ዓይናዻንዳኔ፤
ናንጊና ናንጋ ጎዳሢዮ! ኔኤኒ ታ ፆኦዛሢኬ፤