ታኣኮ ዒኖ ማሊፆ ታ ኔኤም ሺኢሻኔ።

ታ ሞርካ ታና ባሻንዳጉዲ ማሂ ታና ቦርሲሲፖ።

ቦርሲንታዞንሢ

ኔኤም ዋይዞ ዒፆሮ ሩኡራዞንሢኬ።

ኔ ጎይፆዋ ኔኤኒ ታና ዻዌ።

ኔኤኮ ጎኑሞ ጊንፆ ሃንቲ ናንጋንዳጉዲ ታና ዔርዜ፤

ታኣኒ ቢያ ዎዴ ጉሙርቃሢ ኔናኬ።

ሚናፓ ዓርቃዖ ኔ ዻዋ

ሚጪንቲፆንታ ናንጊና ናንጋ ናሹሞዋ ማሌ።

ዻቢንቶዋ ታኣኮ ማሊፖ፤

ናንጊና ናንጋ ጎዳሢዮ! ኔኤኮ ኮሹማ

ሚርጌ ጎይፆ፥ ኔ ሚጪንቲፆጉዲያኣ ታኣም ማሌ።

ጎሞ ዓሳ ዓኣዻኒ ኮይሳ ጎይፆ

ዒዚ ዔዔርዛኔ።

ጎይፆዋ ዔያቶ ዒ ዔርዛኔ።

ጎይፃ ቢያ ናሹሞና ጉሙርቂንቲሢናኬ።

ኔኤኮ ሱንፆ ቦንቾሮ ጌዒጋፓ ዓቶንጎ ታኣም ጌዔ።

ዔያታ ሃንታኒ ኮይሳ ጎይፆ ዶኦራንዳጉዲ ዒዚ ዔያቶ ዔርዛኔ።

ዔያቶኮ ናኣታኣ ሳዖ ዔካንዳኔ።

ዔያቶም ዒዚ ጫኣቄ ጫኣቁሞዋ ዶዲሻኔ።

ቢያ ዎዴ ታ ዒዛ ባንሢ ዛጋኔ።

ታ ፆኦዛሢዮ! ኔ ሃንጋ ታ ባንሢ ማዔ፤

ታኣም ኮሺ ባኣዚያ ማዼ።

ዋኣዪፃፓኣ ታና ሃውሺሴ።

ጎሞዋ ቢያ ኔ ታኣም ዓቶም ጌዔ።

ዔያታ ታና ዎማይዲ ዒፃቴያ

ኔኤኒ ሂንዳ ዛጌ።

ኔና ታኣኒ ታኣኮ ፑኖ ካያሢ ማሄሢሮ

ታና ቦርሲሲፖ።

ፂሉሞንታ ፒዙሞንታ ታና ካፓንዳጉዲ ማሄ።

ሜቶ ቢያይዳፓ ዓውሴ!

<- ዓይኑሞ ማፃኣፖ 24ዓይኑሞ ማፃኣፖ 26 ->