19
ዓይኑሞ ሱኡጋሢ ዓይሣ ጎይፆና ዓይናዺንታ ዳውቴ ዓይኑሞ
ማዢንታ ቢያ ፆኦሲኮ ቦንቾ ፔጋሲ ዔርዛያ ማዒፆ
1 ጫሪንጫ ፆኦሲኮ ቦንቾ ኬኤዛኔ፤
ሳዓፓ ሌካ ዼጌ ቤዛኣ ዒዛኮ ማዾ ዒላቲ ዋይዚሳኔ።
2 ፔቴ ኬላ ሜሌ ኬሎም ዬያ ኬኤዛኔ፤
ዋንታኣ ሄላ ዋንቶም ዔራቶ ዒዛሲ ሃይሳታኔ።
3 ዔያታ ጌስታ ሃይሴንታ ሙኡቺያ ባኣሴ፤
ዔያቶኮ ዑኡሲያ ዋይዚንቱዋሴ።
4 ያኣዼ ማዔቴያ ዔያቶኮ ኪኢታ ዓጮ ቢያ ሄላኔ፤
ሳዓ ማዔ ካሮ ሄላንዳኣና ዋይዚንታኔ፤
ፆኦሲ ጫሪንጮይዳ ዓቢም ማኣሪ ማዤኔ። ሮሜ 10፡18።
5 ዑኡቱሞ ማርካፓ ዑኡታ ኬስካሢጉዲ
ዓቢያኣ ጌኤሺ ማዒ ፆርቃኔ፤
ጳሺ ጳሽካ ዓሲ ሄሌሎ ጳሽካኒ ዎዛዻሢጉዲ ዎዛዻኔ።
6 ዓባ ፆርቃሢ ጫሪንጮኮ ዓይፆ ካራፓኬ፤
ሺሪ ዴንዲ ጌላሢ ባጎ ዛሎ ጋፖይዳኬ፤
ዬያኮ ሩኡጶ ዖይዻፓ ቶሊ ዓታኒ ዳንዳዓይ ባኣሴ።
ናንጊና ናንጋ ጎዳኮ ዎጎ
7 ናንጊና ናንጋ ጎዳ ዎጎኮ
ሃይማ ፓጬኔ ጌይሳ ባኣዚ ባኣያኬ፤
ሼምፔ ማሂ ጊንሣ ዓካሳኔ፤
ዓይሢፃ ዒዛኮ ጉሙርቂንታያኬ፤
ዔኤዮ ዓሶ ዔሮ ማሃኔ።
8 ናንጊና ናንጋ ጎዳኮ ዎጋ ፒዜኬ፤
ዓሲኮ ዒና ዎዛሳኔ፤
ዓይሢፃ ዒዛኮ ጌኤሺኬ፤
ዓሲኮ ዓኣፒማኣ ፖዒ ማዓኔ።
9 ናንጊና ናንጋ ጎዳ ዒጊጪሢ
ናንጊና ናንጋ ጌኤሹሞኬ፤
ዒ ዎጋ ዎጊፃ ፔቴ ፔቴሢ ጎኔ፥ ሃሣ ፂሎኬ።
10 ዬይ ዒ ዎጋ ዎጋ ጌኤሺ ዎርቄፓ ባሼ ዋኣጌ ኬሳያኬ፤
ዔኤሲ ፆሎሊዳፓ ባሼ ዓኣፃያኬ።
11 ኔኤም ማዻሢ ዬይ ዎጋ ዞራኔ፤
ዬያ ካፒሢና ዼኤፒ ባኣዚ ዒዚ ዴንቃኔ።
12 ፔ ዻቢንቲ ዴንቃ ዓሲ ባኣሴ፤
ናንጊና ናንጋ ጎዳሢዮ!
ታኣኮ ዓኣሺንቴ ዺቢንቶፓ ታና ጌኤሼ።
13 ታኣኒ ኔኤኮ ዓይላሢ ጫርቂ ማዻ ጎሞይዳፓ ታና ካፔ፤
ዬይ ጎማ ታና ቆሉዋጉዲ ኔኤኒ ታና ማኣዴ።
ኔኤኒ ያዺዴያታቴ ታኣኒ ዻቢንቲ ባኣያ ማዓንዳኔ፤
ዼኤፖ ዻቢንቶይዳፓኣ ታኣኒ ጌኤሽካንዳኔ።
14 ታኣኮ ላላሢንታ ታና ዓውሳ ናንጊና ናንጋ ጎዳሢዮ!