ናንጊና ናንጋ ጎዳ ማዔ ታ ፆኦዛሢዮ! ኔኤኒ ኮሺ ዼኤፒኬ፤

ቦንቾና ዼኤፑሞና ኔ ማይንቴኔ።

ጫሪንጮ ኔኤኒ ዓፒላጉዲ ዳሬኔ።

ሻኣሮ ኔኤኮ ሳርጌሎ ዖይቶ ማሄኔ፤

ዢባራ ኔኤኮ ጋኣሲ ማዔም ኔ ባራናኔ።

ዓይሎ ኔኤሲ ታሚ ሎስቴ ኔኤኒ ማሄኔ። ዔብ. 1፡7።

ሳዖ ማዢንቴ ቤዛ ዶዲሺ ኔ ዴይሤኔ።

ዋኣፃ ዹኮኮ ቶኦኪና ማዔኔ።

ኔኤኮ ጉጉንፆ ዑኡዞ ዔያታ ዋይዛዖ

ጳሽኪ ፑኔኔ።

ኔኤኒ ዔያቶም ጊኢጊሼ፥ ዶኦጫዼ ጊንፆ ዎቴኔ።

ዑሣ ኬስኪያ ላኣሊንቱዋጉዲ

ጌዲ ኔ ጌሤኔ።

ዹኮኮዋ ባኣኮና ዔያታ ዎታኔ።

ኪርሞላ ዒኢካፓ ዼኤቦ ፔኤሲ ዛኣራኔ።

ሚፆ ካኣፖ ባኣካኣ ዱላኔ።

ሳዓኣ ኔ ማዾ ዓኣፖ ሙይ ሚሽካኔ።

ዓሲም ሙኡዚ ማኣዳንዳ ዱማ ዱማ ባኣዚ ኔ ኬሳኔ።

ዓኣፖ ካሮዋ ዓኣዒሳ ዛይቴ

ዎልቄ ዒንጊ ዶዲሻ ሃኣኮዋ ዒኢፓ ጴዻኔ።

ዒዚ ቱኬ ሊባኖኦሴ ሚፃ ዋኣፆ ዑሽኪ ሚሽካኔ።

ቦኦካሢ ዚቢቆ ባኣካ ዎርቆ ቤሲ ዴንቃኔ።

ላሎ ቆኦፓኣ ሾኦና ጌላ ቤሲኬ።

ዓባኣ ፔ ጌላ ዎዶ ዔዔራኔ።

ዒማና ካዮ ቦዓ ቢያ ኬስኪ ዲርጊ ሺራኔ።

ሙዖንዶ ባኮዋ ፆኦሲዳፓ ኮዓኔ።

ፔኤኮ ቡኡላ ቡኡላ ጌሊ ላሃኔ።

ሳዓ ዓማንዳያ ሄላንዳኣና ፔኤቃኔ።

ማዻ ኔኤኮ ዎዚ ሚርጋይ!

ዬያ ቢያ ኔኤኒ ኔ ቢታንቶና ኮሼኔ፤

ሳዓ ኔኤኒ ማዤ ማዢንቶና ኩሜኔ።

ዼኤፒንታ ዻካ ቦዖንታ ፓይዲባኣ ዓጊፃ ባኣዚ ዒኢካ ዓኣኔ።

ኔኤኒ ማዤ ሌዋታኔያ *ሌዋታኔ ሌዋታኔ ጌይንታ ቦዓሢ ጉርጉሮጉዴያ ዼኤፒ ቦዖ ዋኣሢዳ ናንጋያኬ። ዒኢካ ዴማ ዓማላኔ። ዒዮ. 41፡1፤ ዓይኑ. 74፡14፤ ዒሲ. 27፡1።

ዬይ ቢያ ዎዛና ኔና ካፓኔ።

ኔኤኮ ኩጮ ኔ ቡላ ዎዶና

ኮሺ ባኣዚ ሙዒ ዔያታ ሚሽካኔ።

ዲቃቲሢ ሌሊ ዔያታ ሚርጋኔ፤

ሼምፓሢ ኔ ዔያቶኮ ዔካዛ ሃሃይቃኔ፤

ኬስኬ ዓጮ ባንሢያ ማዓኔ።

ሳዖዋ ኔኤኒ ዓኪ ማሃኔ።

ዒዚ ፔኤኮ ማዼ ማዾና ዎዛዾንጎ።

ዹኮዋ ካኣማዛ ጩጩባኔ።

ዔቂ ታ ሃንታ ዎዳ ዒዛ ታ ዓኣሣንዳኔ።

ታ ማሊፃ ዒዛ ዎዛሶንጎ።

ዋይዞ ዒፃ ዓሳ ማይ ሃይፓ ሴካ ጴዾፓ!