ናንጊና ናንጋ ጎዳ ዒዛ ዎታ ዋኣሢጉዲ ኮዔ ቤሲ ባንሢ ዔኪ ዓኣዻኔ።

ናንጊና ናንጋ ጎዳ ጋዓንቴ ዓሲኮ ዒኖ ማሊፆ ዛጊ ዔራኔ።

ፒዜና ጎኔ ማዔ ባኣዚና ማዺሢ ናንጊና ናንጋ ጎዳ ዎዛሳኔ።

ዬይ ጎሜኬ።

ማሊሢ ባኣያ ሩኡሩሞና ማዾ ማዾ ጋዓንቴ ማማንቂሳኔ።

ጊንሣ ሃሣ ዎዻ ፒሮጉዴያኬ።

ዔያቶኮ ጌኖ ማዾና ዔያታ ባይቃኔ።

ዒኖ ጌኤዦ ዓሳ ጋዓንቴ ኮሺ ባኣዚ ማዻኔ።

ማኣሮኮ ኮጮ ዙላ ናንጊሢ ቃራኬ።

ዓይጎ ዓሲማኣ ዔያታ ሚጪንቱዋሴ።

ጪንጫ ዓሲ ዔርዞ ዎዶና ባሼ ዔራ ማዓኔ።

ፑርቶ ዓሶ ዒዚ ኬዲ ኬኤሪ ባይዛኔ።

ዒዚያ ሜታዺ ዒላታ ዎዶና ዒዛ ማኣዳንዳ ዓሲ ዴንቂንዱዋሴ።

ዻጋ ዒዛኮ ሺሺማኔ፤

ዴሚና ዓኣቺ ዒንጊንታ ዒንጊሢያ ዻጋ ጪኢሻኔ።

ኮዦ ዓሳ ዎዎዛዻኔ፤

ፑርቶ ዓሶ ጋዓንቴ ዲዲቃሣኔ።

ሃይቢ ካፓኔ።

ዎይኔ ዑሺንታ ዛይቶ ቲዦንታ ናሽካ ዓሲ ዎይቴቴያ ዖርጎጩዋሴ።

ፒዜ ዓሶ ሄላኒ ዓኣ ሜታሢያ ጉሙርቂሢባኣ ዓሶ ሄላኔ።

ዓሲ ናንጉዋ ዳውሎይዳ ናንጊሢ ቃራኬ።

ናንጊንታ ዖርጎቹሞንታ፥ ሃሣ ቦንቺንቲያኣ ዴንቃኔ።

ዶዲ ዖላ ዓሲና ካፒንታ ካታሞ ዖሊ ባሺ ዓዓርቃኔ፤

ጉሙርቂንታ ዋርዲዮ ቤዞዋ ዶይሳኔ።

ፑርታ ጌስቲሢ ሃሻኔ።

ማዻ ዒዛኮ ዖቶርሙሞ ሌሊኬ።

ፔና ዎዼ ዓሲ ማዒ ፓይዲንታኔ።

ኮሺ ዓሲ ጋዓንቴ ኮሹሞና ዒዒንጋኔ።

ዬያፓ ባሼ ፑርታ ማሊሢና ዔቂ ዒንጎ ዒንጊፃ ሚርጌና ዒዛ ዒሣያኬ።

ኮሺ ማሊ ጌስታ ዓሲኮ ጌኤዛ ጋዓንቴ ጎናዻኔ።

ፑርታ ዓሲ ጋዓንቴ ዻቤዖ «ታ ዻቢባኣሴ» ጌይ ማዖ ዒፂ ዶዳኔ።

ናንጊና ናንጋ ጎዳ ቃዛኒ ዳንዳዑዋሴ።

ባሺሢ ዒንጋሢ ጋዓንቴ ናንጊና ናንጋ ጎዳኬ።

<- ኮኦኪንሢ ማፃኣፔ 20ኮኦኪንሢ ማፃኣፔ 22 ->