20
1 ዎይኔ ዑሺ ዒኔ ዣኣሊሳኔ፥ ካፄ ዑሺያ ዑዑራሳኔ፤
ዬያ ዑዦ ሱኡኮና ዓዺንቴ ዓሳ ዔራ ዓሲ ማዓኒ ዳንዳዑዋሴ።
2 ካኣቲ ዻጋ ጉዻ ዞቢጉዲ ዒጊቻያኬ፤
ዒዛኮ ዻጎ ዒቂሳሢ
ፔና ዎዻኒ ዔቄያ ማዒ ፓይዲንታኔ።
3 ዔኤያ ዓሲ ጎሪንቲ ዑራ ማዣኒ ዳንዳዓኔ፤
ዓሲ ቦንቺሳይ ጋዓንቴ ማርሞይዳፓ ሃኪሢኬ።
4 ጎዦ ፔኤኮ ዎዶማና ጎሽኩዋ ቤልፃ ዓሲ
ማኣሎ ቡሮ ዎዶና ዒ ቡኩሳንዳ ሃኣኮ ባኣሴ።
5 ዓሲኮ ማሊሢ ኮሺ ዔታዻ ዔቴይዳ ዓኣ ዋኣሢጉዲኬ፤
ያዺ ማዔቴያ ማሊ ጶቂሥሢ ዓኣ ዓሲ ዬያ ዱዱዓኔ።
6 ዓሲ ቢያ ፔ ጉሙርቂንቲፆማ ኬኤዛኔ፤
ጋዓንቴ ጎኔና ጉሙርቂንታ ዓሲ
ዖኦኒ ዴንቃኒ ዳንዳዓይ!
7 ፂሎ ዓሲ ፒዙሞና ናንጋኔ፤
ናኣታ ዒዛሲያ ዓንጂንቴያኬ።
8 ፔኤኮ ዎጎ ዖይታ ዎጊፆሮ ዴዔ ካኣቲኮ
ፑርታ ማዔ ባኮ ቢያ ጌኤሺ ዔራ ዓኣፒ ዓኣኔ።
9 «ማሊፃ ታኣኮ ጌኤሺኬ፤
ጎሜ ታኣኮ ባኣሴ» ጋዓ ዓሲ ናንዳ?
10 ናንጊና ናንጋ ጎዳ ሉኡዚ ማዔ ዴኤሡሞ ዔሮ ባኮና
ፒዜ ማዒባኣ ማኮ ባኮና ማዺ ሃንታ ዓሶ ዒዒፃኔ።
11 ዓኣላ ናይታዖ ኮሺ፥ ሃሣ ፒዜ ዓሲ ማዒፃ
ማዻ ባኮና ፔጋዺ ዔዔርታኔ።
12 ዋይዛ ዋይዚና ዛጋ ዓኣፒና
ማዤሢ ናንጊና ናንጋ ጎዳኬ።
13 ዎዶ ኔኤኮ ኔኤኒ ጊንዖና ኩርሴቴ ኔ ማንቃንዳኔ፤
ዶዲ ኔ ማዼቴ ጋዓንቴ ጊዳ ሙኡዚ ኔኤኮ ዓኣያ ማዓኔ።
14 ዔኤቢ ሻንቃ ዓሲ ቢያ ዎዴ «ፑርታኬ» ጌይ ጌይ ሻንቆ ባኬሎ ዻኪሳኔ፤
ሻንቂ ዴንዴስካፓ ጋዓንቴ «ላኣፓና ታ ሻንቄያዋይ» ጌይ ሄሄርሻኔ።
15 ዔራቶና ጌስቶ ጌኤሲ
ዎርቄና ቦንቺንታ ሹጮናፓ ባሼ፥ ጴዹዋያኬ።
16 ዓይጎ ዓሲያኣ ዔርቱዋ ዓሲኮ ዋኣሴ ማዔቴ ማኣዓሢ ዒዛኮ ዔኬ፤
ዬይ ዔርቱዋ ዓሢ ዛሎ ዓይሢ ባኣዚ ማዓንዳጉዲ ኔ ኮይላ ጌሤ።
17 ሉኡቂ ጋኣዲሢና ኔ ዴንቃ ባካ
ዓኣሢ ሙኡዚጉዲ ኔና ዎዛሳኒ ዳንዳዓኔ፤
ዎርቂ ፔኤቃዖ ጋዓንቴ ዻንጋ ኔኤኮ ማኣሻላጉዲ ማዓንዳኔ።
18 ኮሺ ዞሮ ኔ ዋይዚ ዔኬቴ
ቢያ ባኣዚ ኔኤም ጊኢጋንዳኔ፤
ዬያሮ ኮሺ ዞሮ ዋይዚ ዔኩዋዖ ዖልዚ ዖላኒ ዓኣዺፖ።
19 ዾንኮ ዾንካ ዓሲ ዓኣቾንዶ ሃይሴ ዒና ዓርቁዋሴ፤
ዬያሮ ጉሪ ጌስቲ ሺራ ዓሶይዳፓ ሃኬ።
20 ፔኤኮ ዓዶ፥ ሃንጎ ዒንዶ ጫሽካያኮ
ናንጋ ሻኔ ዹሚዳ ባይቃ ፖዒጉዲ ማዓኔ።
21 ቤርታ ላቢንቲቦኦንቴ ሼሌዔና ዴንቆና ቆሎ
ጋፒንፆይዳ ዓንጂንቱዋሴ።
22 ኔኤም ፑርታ ማዼ ዓሲም
ኔኤኒያ ማሂ ፑርታ ዒዛም ማዺፖ፤
ናንጊና ናንጋ ጎዳ ጉሙርቄ፤ ዒዚ ኔና ዓውሳንዳኔ።
23 ናንጊና ናንጋ ጎዳ ጊኢጊባኣ ማኮ ባኮንታ
ሉኡዚ ማዔ ዴኤሡሞ ዔሮ ባኮዋ ሻሻኣኪንታኔ።
24 ናንጊና ናንጋ ጎዳ ኑኡኒ ሃንታንዳ ጎይፆ ማሊ ጌሤኔ፤
ዓካሪ ዓሲ ናንጎ ፔኤኮ ዎኖ ባንሢ ዔኪ ዓኣዻንዳቴ
ዎይቲ ዔራኒ ዳንዳዓይ?
25 ፆኦሲም ሩኡሪ ናኣቢ ናኣባዖ
ጊንሣ «ዓይጋ ታ ናኣቤይ» ጌይ ማሊሢ ዓሲኮ ፒሮኬ።
26 ጪንጫ ካኣቲ ዋይዞ ዒፃ ዓሶ ዱማሲ ዔራኔ፤
ዔያቶ ዒ ሚጪንቱዋዖ ሜታሳኔ።
27 ዓሲኮ ዒኔ ናንጊና ናንጋ ጎዳ ዓሲም ዒንጌ ፖዒታሢሮ
ዓሲኮ ጋሮ ዒኖ ቢያ ዔራኒ ዛጋኔ።
28 ኮሹሞና ጉሙርቂንቲሢና ፑርታ ባኣዚፓ ካኣቲ ካፓኔ፤
ዒዛኮ ካኣቱማ ጎኑሞና ዶዲ ናንጋኔ።
29 ዼጌ ዓሳ ሄርሺንታሢ ፔኤኮ ዎልቆናኬ፤
ጋርቾ ዓሳ ፔኤኮ ቡኡቆና ቦንቺንታኔ።
30 ኪፃሲ ጳርቆ ጳዺ ፑርታ ባኣዚ ባይዛኔ፤