12
1 ዔራቶ ናሽካ ዓሲ ዻቢንቲዳፓ ዔሪ ማዓኒ ኮዓኔ፤
ዞሮ ዒፃ ዓሲ ጋዓንቴ ዔኤያ ዓሲኬ።
2 ናንጊና ናንጋ ጎዳ ኮሺ ዓሲ ቦንቻኔ፤
ፑርታ ማሊሢ ዓኣ ዓሶ ጋዓንቴ ዒዚ ፑርታና ዎጋኔ።
3 ዓይጎ ዓሲ ማዔቴያ ፑርቱሞና ዶዲ ዔቃኒ ዳንዳዑዋሴ፤
ጎኔ ዓሲኮ ፃጳ ዓጊፁዋሴ።
4 ማሊ ጶቂሣ ላኣሌላ ዓኒኮ ቦንቾኬ፤
ፔኤኮ ዓኒ ቦርሲሳ ላኣሌላ ጋዓንቴ ሜጌፆ ቆፂሳ ሃርጌጉዲኬ፤
ሃሣ ጊንሣ ሜታሳ ዒሶ ዶርዖጉዴያኬ።
5 ጎኔ ዓሲኮ ማሊሢ ፒዜኬ፤
ፑርቶ ዓሶኮ ዞራ ጋዓንቴ ጌሺሢኬ።
6 ፑርቶ ዓሳ ዓሲ ባይዛኒ ፔ ጌኤዞና ፒራኔ፤
ፒዜ ዓሶኮ ጌኤዛ ጋዓንቴ ዻዻቂሻኔ።
7 ዋይዞ ዒፃ ዓሳ ሎኦሚ ቤሲ ባይቃኔ፤
ኮዦ ዓሶኮ ሾይንታ ጋዓንቴ ዶዲ ናንጋኔ።
8 ዓሲ ፔኤኮ ዔራቶና ጋላቲንታኔ፤
ማሊፃ ዎቦ ማዔ ዓሲ ጋዓንቴ ቶቶኦቺንታኔ።
9 ዖርጎቺ ማላዖ ሙዖ ባኣዚባኣ ዓሲዳፓ
ዔርቲባኣ ዓሲ ማሊ ማዾና ፔ ናንጎ ሂዓ ዓሲ ባሼኬ።
10 ኮሺ ዓሲ ፔ ማኣራ ዓኣ ቆልሞም ሚሚጪንታኔ፤
ፑርታ ዓሲኮ ሚጪንቲፃ ጋዓንቴ ጌኔ ማዺሢኬ።
11 ጎሺ ዶዲ ጎሽካ ዓሲኮ ሚርጌ ሙዖ ባኣዚ ዓኣያ ማዓኔ፤
ፓሡዋ ማሊሢና ናንጊሢ ዔኤያቶኬ።
12 ፑርታ ዓሲኮ ማሊፃ ቢያ ዎዴ ፑርታ ባኣዚ ማዻኒኬ፤
ኮሺ ዓሲ ጋዓንቴ ቱኮና ኮሺ ሚሢጉዲ ቃራ ዓኣፒ ዓኣፓኔ።
13 ፑርታ ዓሲ ዒዛኮ ፑርቶ ጌኤዛ ፒሮ ማዒ ዒዛ ዓርቃኔ፤
ኮሺ ዓሲ ጋዓንቴ ሜቶይዳፓ ቶላኔ።
14 ኔኤኒ ዴንቃ ዓንጃ ኔኤኮ ኮዦ ጌኤዞና ማዾናፓኬ፤
ዬያ ጎይፆና ኔኤም ኮይሳሢ ኔኤኒ ዴንቃኔ።
15 ማሊ ጶቂሥሢ ፓጬ ዓሳ ማዻ ባካ ቢያ ዎዴ ፒዜ ዔያቶም ማላኔ፤
ዔሮ ዓሲ ጋዓንቴ ኮሺ ዞሮ ዔካኔ።
16 ዔኤያ ዓሲኮ ዻጋ ቤዞና ዔርታኔ፤
ጪንጫ ዓሲ ጋዓንቴ ዒዛ ጫሽኮ ጫዦ ዔዔኤዻኔ።
17 ጎኑሞ ጌስታ ዓሲ ቢያ ጉሙርቂንታ ማርካቶ ማርካዻኔ፤
ሉኡዙሞ ማርካዻይ ጋዓንቴ ዓሲ ጌሻኔ።
18 ማሊባኣዖ ጌስቲንቴ ጌኤሲ ጬንቻ ዓራፖጉዲ ቲቃኔ፤
ዔራቶና ጌስቲንቴ ጌኤሲ ጋዓንቴ ፓፓሣኔ።
19 ጎኑሞ ናንጊና ዶዲ ናንጋኔ፤
ሉኡዙሞ ጋዓንቴ ዶዲ ናንጉዋሴ።
20 ፑርቱሞ ማላ ዓሶኮ ዒኖይዳ ጌኔ ማሊሢ ዓኣኔ፤
ኮሹሞ ዴንቃኒ ዞራ ዓሳ ጋዓንቴ ዎዛ ዴንቃኔ።
21 ኮሺ ዓሲ ፔቴታዖ ፑርታ ባኣዚ ሄሉዋሴ፤
ፑርታ ዓሲኮ ጋዓንቴ ሜታ ሚርጋኔ፤
ዔያታ ዴንቃ ባኣዚያ ባኣሴ።
22 ናንጊና ናንጋ ጎዳ ሉኡዙሞ ሉኡቃ ዒንዲርሲ ሻሻኣኪንታኔ፤
ጎኑሞ ዓኣ ዓሶና ጋዓንቴ ዎዎዛዻኔ።
23 ማሊ ጶቂሣ ዓሳ «ኑ ዔራኬ» ጌይ ጌይ ፔና ኬኤዙዋሴ፤
ዔኤዮ ዓሳ ጋዓንቴ «ኑ ዔራኬ» ጌይፆና ፔኤኮ ዔኤያቶ ፔጋሲ ዻዋኔ።
24 ማዾና ዶዲ ማዒሢ ዎይሣ ሱኡጌ ማሃኔ፤
ቤልፃ ማዒሢ ጋዓንቴ ዓሲ ዴንካ ዎርቃያ ማሃኔ።
25 ማሊሢና ሜታዺሢ ዖዪሢ ዔኪ ሙካኔ፤
ኮሺ ጌኤሲ ጋዓንቴ ዎዎዛሳኔ።
26 ጎኔ ዓሲ ፔ ላጋሢ ዞሪ ፒዜ ጎይሢ ዔኪ ዓኣዻኔ፤
ዋይዞ ዒፃ ዓሶ ጎይፃ ጋዓንቴ ጎኑሞፓ ሃኪሳያኬ።
27 ቤልፃ ዓሲ ሙዓኒ ካሣንዳ ባኣዚ ባኣሴ፤
ዶዲ ማዻ ዓሲ ጋዓንቴ ዖርጎጫኔ።
28 ፂሉሞ ጎይሢዳ ሼምፔና ናንጊሢ ዓኣኔ፤