ዴኤሡሞ ዔሮ ባኮና ፒዜ ማዻ ዓሶና ጋዓንቴ ዒዚ ዎዛዻኔ።

ሼሌዑሞ ጋዓንቴ ዔራቶ ዴንቂሳኔ።

ጉሙርቂንቱዋ ዓሶ ጋዓንቴ ዔያቶኮ ዎቡማ ባይዛኔ።

ፂሉሞ ጋዓንቴ ሃይቢዳፓ ዓውሳኔ።

ፑርታ ዓሲ ጋዓንቴ ፔ ፑርቱሞና ሎኦማኔ።

ጉሙርቂንቱዋ ዓሲ ጋዓንቴ ዒዛኮ ፑርቶ ማሊፃ ፒሮ ማዒ ዒዛ ዓርቃኔ።

ጊንሣ ዒዚ ፔ ዎልቆና ሄርሺንታ ሄርሺንታኣ ዒዛና ዎላ ባይቃኔ።

ዬይ ሜታ ጋዓንቴ ፑርቶ ዓሶ ሄላኔ።

ፂሎ ዓሳ ጋዓንቴ ዔራቶና ዻቃኔ።

ፑርቶ ዓሳ ሃይቃኣና ዒላሺሢ ሚርጋኔ።

ፑርቶ ዓሶኮ ፑርቶ ጌኤዛ ጋዓንቴ ባይሲንታይዳ ጌልዛኔ።

ማሊሢ ፓጬ ዓሲኬ፤

ማሊ ጶቂሣ ዓሲ ጋዓንቴ ዚቲ ጋዓኔ።

ጉሙርቂንታ ዓሲ ጋዓንቴ ዬያጉዴ ጌኤዞ ዒና ዓኣቺ ዓርቃኔ።

ሚርጌ ዞራ ዓሲ ዓኣ ካኣቶ ጋዓንቴ ሜታ ሄሉዋሴ።

ሜቶይዳ ኔኤኒ ኬዳንዳኔ፤

ጋዓንቴ ዋኣሶ ኔ ማዑዋ ዓቴቴ ኮሺ ኔኤም ማዓንዳኔ።

ዎልቄና ፑርታ ማዻ ዓሲ ቆሎ ሌሊ ዴንቃኔ።

ጌኔ ማዻ ዓሲ ኔኤኒ ማዔቴ ኔና ኔ ሜቶይዳ ዓጋኔ።

ፒዜ ማዔ ባኣዚ ኔ ማዼቴ

ኔኤኮ ኮዦ ማዾ ዛሎ ዒንጎ ባኮ ኔ ዴንቃንዳኔ።

ፑርቱሞ ማዺ ሺራ ዓሲ ጋዓንቴ ሃይቃኔ።

ቦሂሳ ባኣዚባኣ ጎይሢና ዴንዳ ዓሶና ዎዛዻኔ።

ኮዦ ዓሶ ዜርፃ ጋዓንቴ ሜቶፓ ዻቃኔ።

ዒዞኮ ሚዛጱማ ጉዱንሢኮ ሲኢዾይዳ ዎርቄ ዱንዶ ዓኣሥሢጉዲኬ።

ፑርቶ ዓሶ ማሊፃ ጋዓንቴ ባይሲንታ ዔኪ ሙካኔ።

ጋዓንቴ ቆላ ዔያቶኮ ሚርጊ ሚርጊ ዓኣዻኔ፤

ሃንጎ ዓሳ ሃሣ ፔኤኮ ሚኢሾ ዑሣ ዓኣዼ ዱኡዻዻኔ፤

ጋዓንቴ ማንቁማ ዔያቶኮ ሚርጊ ሚርጊ ዴንዳኔ።

ሜሌ ዓሶ ማኣዴ፤ ኔኤኒያ ማኣዲንታንዳኔ።

ዴራ ዒዛ ጋዳንቃያ ማዓኔ፤

ጋዓንቴ ሃኣኮ ቦኦኮ ኬሳ ዓሢ

ዴራ ጋላታያ ማዓኔ።

ፑርታ ባኣዚ ማዻሢ ጋዓንቴ ፑርታ ሄላንዳኔ።

ጎኑሞ ዓኣ ዓሳ ጋዓንቴ ቱኮና ኮሺ ሚሢጉዲ ዓኣዓኔ።

ዬይ ማኣዳንዳ ባኣዚ ባኣሴ፤

ዋይዚ ዒፂሢ ጋዓንቴ ሼምፖኮ ባይሲንታ ካራ ማዓኔ።

ፑርቶ ዓሶንታ ጎሞ ዓሶንታ ጋዓንቴ ሚርጌ ዶዲ ሜቶ ዔካኔ። 1ጴፂ. 4፡18።

<- ኮኦኪንሢ ማፃኣፔ 10ኮኦኪንሢ ማፃኣፔ 12 ->