1 ዮሴፔ ናኣዚ ሚናኣሴ ሾዔ፥ ማኪሬ ናኣዚ ጌሌዓዴ ቶኦኮኮ ማኣሮ ማኣሮ ሱኡጋ ሙሴና ሃንጎ ዒስራዔኤሌ ዴሮ ሱኡጎ ኮይላ ሙኪ፦ 2 «ዒፃ ዓጊ፥ ዓጬሎ ዒስራዔኤሌ ዴሮም ኔ ፓቃንዳጉዲ ናንጊና ናንጋ ጎዳ ኔና ዓይሤኔ፤ ዬያጉዲ ሃሣ ኑ ዒጊናሢ ፄሎፒሃዴ ሄላ ዛሎዋ ዒዛኮ ዉዱሮ ናኣቶም ዒንጋንዳጉዲ ኔና ዓይሤኔ፤ 3 ጋዓንቴ ዔያታ ሜሌ ፃጳፓ ማዔ ዓቲንቄም ሌዔቴ ዔያቶኮ ዓጫ ዬኖ ፃጶ ማኣሮ ዓሶም ማዓዛ፥ ኑም ማዓሢ ዻካንዳያታሢ ዔሬ፤ 4 ሻንቺንቴ ባካ ማዓ ሌዖና ዔያቶኮ ዓኣ ባካ ዔያቶኮ ዓኒንሢ ፃጶም ማዓኔ፤ ዬይ ኑ ፃጶኮ ዓኣ ሳዖይዳፓ ዔኪ ዻኪሳያ ማዓኔ» ጌዔኔ።

5 ሙሴ ዒማና ናንጊና ናንጋ ዒዛ ጎዳ ዓይሤ ጎይፆ ዒስራዔኤሌ ዴሮም፦ «ሚናኣሴ ማኣሮ ዓሳ ጌዔሢ ፒዜኬ፤ 6 ዬያሮ ናንጊና ናንጋ ጎዳ ‹ፄሎፒሃዴኮ ዉዱሮ ናኣታ ዔያቶ ፃጶ ማዔ ዓሲ ማዔቴ ዔያታ ናሽኬ ዓሲም ሌዓኒ ዳንዳዓኔ› ጋዓኔ፤ 7 ዬያይዳዛ ዓይጎ ዓሲኮዋ ማዖም ዒስራዔኤሌ ዓሶኮ ዓኣ ሳዓ ሜሌ ፃጶም ዒንጊንታዓኬ፤ ዬኖ ፃጶ ማኣሮሮ ማዓኔ፤ 8 ዒስራዔኤሌ ፃጶ ማኣሮይዳ ሳዓ ዔኬ ዉዱሮ ናይ (ላኣሊ) ዬኖ ፃጶ ማኣራፓ ማዔ ዓቲንቄም ሎዓንዳያ ኮይሳኔ፤ ዬያይዲ ፔቴ ፔቴ ዒስራዔኤሌ ዓሳ ቤርታ ዓዶንሢ ቤዞ ዔያቶሮ ማሂ ዓርቃኒ ዳንዳዓኔ» ጌዔኔ። 9 ዬይ ሳዓ ፔቴ ፃጶ ማኣራፓ ሜሌ ፃጶ ማኣሮም ዓኣዻኒ ዳንዳዓዑዋሴ፤ ፔቴ ፔቴ ፃጶ ማኣራ ማኣራ ፔኤኮ ዓኣ ሳዖ ዓርቂ ዴዓንዳኔ።

10-11 ዬያሮ ፄሎፒሃዴኮ ዉዱሮ ናኣታ፦ ማሂላ፥ ቲርፃ፥ ሆግላ፥ ሚልካንታ ኖዓንታ ናንጊና ናንጋ ጎዳ ሙሴም ዓይሤ ጎይፆና ዓዶኮ ጌርሲንሢ ናኣቶም ሌዔኔ፤ 12 ዔያታ ሌዔሢ ዮሴፔ ናኣዚ ሚናኣሴ ፃጶ ቶኦኮምኬ፤ ዬያይዲፆና ዔያቶኮ ሳዓ ዔያቶኮ ዓዶ ማኣሮ ፃጶም ማዒ ዓቴኔ።

13 ዒስራዔኤሌ ዓሳ ዒያርኮኮ ሆታ፥ ዮርዳኖሴኮ ሱካ፥ ሞዓኣቤ ቦኦሎይዳ ዓኣንቴ ናንጊና ናንጋ ጎዳ ሙሴ ዛሎና ዔያቶም ዒንጌ ዓይሢፆንታ ዳምባኣ ዬያኬ።

<- ፓይዲ ማፃኣፔ 35