1 ናንጊና ናንጋ ጎዳ ሙሴና ዓኣሮኔናም፦ 2 «ሃይ ታኣኒ ዓይሤ ዳምቤኬ፤ ቦሂሳ ባኣዚ ባኣያ፥ ባቃኖይዳ ቃምባራ ጌሢ ዛጊቦኦ ፔቴ ዞቄ ማሮ ዔኪ ዬዓንዳጉዲ ዒስራዔኤሌ ዓሶም ኬኤዙዋቴ። 3 ማሬሎ ዔኪ ሙካዖ ቄኤሳሢ ዓላዜሬም ዒንጉዋቴ፤ ዬና ማሬላ ጉርዳፓ ዙሎ ኬስኪ ዓላዜሬ ዓኣ ቤስካ ሹኪንቶንጎ። 4 ዓላዜሬ ዬያ ሱጉፆፓ ዻካ ዔኪ፥ ፔ ኬኤሎ ጊዳ ዳኪ ዳኪ ፆኦሲ ዴሮና ካኣማ ማኣሮኮ ቤርቶ ዛሎና ላንካይ ማይንቲ ዉፁርቆንጎ፤ 5 ማሬላ ጉቤ፤ ጌይፃ፦ ዜዻ፥ ዓሽካ፥ ሱጉፃ፥ ጎጶ ባካኣ ቢያ ቄኤሳሢ ዓኣ ቤዞይዳ ታሚና ሚቺንቶንጎ። 6 ዒማና ቄኤሳሢ ዴኤሊ ዚቢቂ ሜሌያንታ ሂሶጴ ጌይንታ ባኬሎኮ ካኣፒንታ ዞቄ ፓቲሌያኣ ዔኪ ማሬሎ ሚቾ ታሞይዳ ዓጎንጎ፤ 7 ዬካፓ ዒ ዓፒሎ ፔኤኮ ማስኪ፥ ዑፆዋ ማስቲ ጉርዶ ማዒ ጌሎንጎ፤ ጋዓንቴ ሳዓ ዓማንዳያ ሄላንዳኣና ዳምቦ ጎይፆና ዒዚ ዒኢቴያ ማዓኔ፤ 8 ማሬሎ ታሞና ሚቼ ዓሢ ፔኤኮ ዓፒሎንታ ዑፆንታ ዋኣሢና ማስኮንጎ፤ ዒዚያ ሳዓ ዓማንዳያ ሄላንዳኣና ዒኢቴያ ማዒ ዴዓንዳኔ። 9 ዬካፓ ዳምቦ ጎይፆና ጌኤሺ ማዔ፥ ሜሌ ዓሲ ማሬሎኮ ዲቢንፆ ቡኩሲ ዔኪ ጉርዶኮ ዙላ ካኣዦ ዳምቦ ጎይፆና ጌኤሺ ማዔ ቤዞይዳ ፔቴ ቤስካ ዋሆንጎ፤ ዬይ ዲቢንፃ ዒስራዔኤሌ ዴሮኮ ጎሜ ጌኤሻያ ማዔ፥ ዋኣፆ ጊኢጊሻኒ ዔኪንታያ ማዓንዳኔ፤ ዬይ ዳምባ ጎሞ ጌኤሻኒ ማዺንታያኬ። ዔብ. 9፡13። 10 ዬኖ ዲቢንፆ ቡኩሴ ዓሢ ዓፒሎ ፔኤኮ ማስኮንጎ፤ ጋዓንቴ ሳዓ ዓማንዳያ ሄላንዳኣና ዒ ዒኢቴያ ማዒ ዴዓንዳኔ፤ ዬይ ዳምባ ዒስራዔኤሌ ዓሶና ዔያቶ ባኣካ ሙኬያ ማዒ ናንጋ ዓሶም ሙካ ዎዶ ቢያይዳ ማዻያ ማዒ ናንጋንዳኔ» ጌዔኔ።

11 ናንጊና ናንጋ ጎዳ ኬኤዛዖ፦ «ዓይጎ ዓሲኮዋ ማዖም ሌሲ ካኣሜሢ ዳምቦ ጎይፆና ላንካይ ኬሊ ሄላንዳኣና ዒኢቴያ ማዒ ዴዓንዳኔ፤ 12 ሃይሣሳ ኬሎና ላንካሳ ኬሎናይዳ ጎሞ ጌኤሺፆሮ ጌሢንቴ ዋኣፆና ፔና ዒ ጌኤሾንጎ፤ ዬካፓ ዒ ጌኤሺ ማዓንዳኔ፤ ሃይሣሳ ኬሎና ላንካሳ ኬሎናይዳ ፔና ዒ ጌኤሺባኣያ ማዔቴ ጌኤሺ ማዓኒ ዒዚ ዳንዳዑዋሴ። 13 ጎሞ ጌኤሺፆ ዋኣፃ ዑፆይዳ ዋሂንቲባኣሢሮ ሌሲ ካኣሚ ዒኢቴ ዓሲ ዒኢቴያ ማዒ ዴዴዓንዳኔ፤ ዬያጉዴ ዓሲ ፆኦሲ ዴሮ ካኣማ ማኣሮ ዒኢሳኔ፤ ዬያሮ ዒስራዔኤሌ ዴሮ ባኣካ ማዒ ፓይዲንታኒ ዒዛም ኮይሱዋሴ።

14 «ፔቴ ዓሲ ፔኤኮ ናንጋ ማኣሮይዳ ሃይቄቴ ማዺንታንዳ ዳምባ ያዺኬ፦ ዬይ ዓሢ ሃይቃኣና ዬኖ ማኣሮይዳ ዓኣ ዓሲ፤ ሃሣ ዬኖ ማኣሮ ዒማና ጌሌ ዓሲ ላንካይ ኬሊ ሄላንዳኣና ዒኢቴያ ማዒ ዴዓንዳኔ። 15 ዬኖ ማኣሬሎይዳ ዓኣ፥ ካራ ዎዺንቲባኣ ሜሄ፤ ጌይፃ፦ ዖቲታቴያ ጉሲ ዒኢቴያ ማዓኔ። 16 ዓሲ ዎዼ ዓሲኮ ሌሲያኣ ማዖም ሃርጊ ሃይቄ ዓሲኮ ሌሲ ዞኦስካ ካኣማ ዓሲ፤ ጊንሣ ሃሣ ዓሲኮ ሜጌሢታቴያ ዱኡፒ ካኣሜ ዓሲ ላንካይ ኬሊ ሄላንዳኣና ዒኢቴያ ማዓንዳኔ።

17 «ዬያ ጎሞ ጌኤሻኒ ጎሞ ጌኤሺፆሮ ማዓንዳጉዲ ሚቺንቴ ማሬሎ ዲቢንፃፓ ዻካ ዔኪ ዖቲዳ ዋሂጋፓ ጊዳ ዓልቃ ቤሲዳፓ ዱይንቴ ጌኤሺ ዋኣሢ ዋሂንቶንጎ። 18 ዬካፓ ዳምቦ ጎይፆና ጌኤሺ ማዔ ዓሲ ሂሶጴኮ ካኣፒ ዔኪ ዋኣፆይዳ ዳኪ ዳኪ ፆኦሲ ዴሮና ካኣማ ማኣሮይዳ ዓኣ ሜሆ ዑፆይዳ ቢያ፤ ጊንሣ ሃሣ ዬያ ማኣሮይዳ ዓኣ ዓሶ ዑፃኣ ዉፁርቆንጎ፤ ዬይ ዓሢ ዓሲ ሜጌሢንታ ሌሲንታ ዱኡፒያኣ ካኣሚ ዒኢቴ ዓሶ ዑፃ ዉፁርቆንጎ፤ 19 ሃይሣሳ ኬሎና ላንካሳ ኬሎናይዳ ፔና ዳምቦ ጎይፆ ጌኤሼ ዓሢ ሜሌ ጌኤሽኪባኣሢ ዉፁርቆንጎ፤ ላንካሳ ኬሎና ዬያ ዓሢ ጌኤሾንጎ፤ ዬይ ጌኤሽካ ዓሢያ ፔኤኮ ዑፆንታ ማኣዓሢንታ ማስኬስካፓ ዓባ ጌላዛ ዒ ጌኤሽኬያ ማዓንዳኔ።

20 «ዳምቦ ጎይፆና ፔና ጌኤሺባኣ ዒኢቴ ዓሢ ጎሞ ጌኤሻ ዋኣፃ ዒዛኮ ዑፃ ዋሂንቲባኣሢሮ ዒኢቴያ ማዒ ዴዓንዳኔ፤ ዬያጉዴ ዓሲ ፆኦሲኮ ማኣሮ ዒኢሳያ ማዔሢሮ ዴሮ ባኣካፓ ዱማዾንጎ። 21 ሃያ ዎጎ ኬስካ ዎዶ ቢያይዳ ዒንሢ ካፓንዳያ ኮይሳኔ፤ ጎሞ ጌኤሺፆሮ ዋሆ ዋኣፆ ዓሶ ዑፆይዳ ዋሃሢ ፔኤኮ ማኣዓሢ ማስካንዳያ ኮይሳኔ፤ ዬያ ዋኣፆ ካኣማ ዓሲ ቢያ ሳዓ ዓማንዳያ ሄላንዳኣና ዒኢቴያ ማዒ ዴዓንዳኔ፤ 22 ዬይ ዒኢቴ ዓሢ ካኣማ ባኣዚ ቢያ ዒኢቴያ ማዓንዳኔ፤ ዬያ ባኮ ካኣሜ ዓሲያ ሳዓ ዓማንዳያ ሄላንዳኣና ዒኢቴያ ማዒ ዴዓንዳኔ» ጌዔኔ።

<- ፓይዲ ማፃኣፔ 18ፓይዲ ማፃኣፔ 20 ->