1 ዴራ ዬኖ ዋንቶ ቢያ ሜታዺ ዒላቴ ጎይሣ ዎርቄኔ፤ 2 ሙሴና ዓኣሮኔና ዑፃ ዔያታ፦ «ጊብፄ ዓጮይዳ፤ ሃሣ ሃያ ዓሲ ናንጉዋ ዳውሎይዳ ኑ ሃሃይቄቴ ዓይጌ ዓኣይ! 3 ናንጊና ናንጋ ጎዳ ኑና ዬኖ ዓጬሎ ዔኪ ዓኣዻሢ ዓይጎሮዳይ? ኑኡኒ ቢያሢ ዖልዚና ኩዳንዳኔ፤ ናኣቶና ላኣሎና ኑኡኮ ዲዒንቲ ዔውታንዳኔ፤ ጊብፄ ዓጮ ማዒ ኑ ዴንዴቴ ቃራ ማዓዓዳ?» ጌዒ ጌዒ ጉንዱሚ ጌስቴኔ። 4 ዬያሮ ዎሊ ኮይላ ዔያታ፦ «ሃኒ ሙኩዋቴ! ኑና ዔኪ ዓኣዻንዳ ዓሲ ኑ ዶኦሪ፥ ጊብፄ ዓጮ ማዒ ኑ ዴንዶም» ጌዔኔ።

5 ዒማና ሙሴና ዓኣሮኔና ዴሮኮ ቤርታ ጎጲና ላሄኔ፤ 6 ዓጮ ሙሪፆ ዓኣዼዞንሢፓ ላምዖንሢ፦ ኔዊ ናኣዚ ዒያሱና ዪፑኔ ናኣዚ ካኣሌቤና ዖዪ ፔኤኮ ዓፒሎ ዳርዛዖ፥ 7 ዴሮም፦ «ኑኡኒ ዛጊ ሙኬ ዓጬላ ሚርጌና ሚዛጳ ዓጪኬ፤ 8 ናንጊና ናንጋ ጎዳ ኑ ዛሎና ዎዛዼያ ማዔቴ ዬኖ ዓጮ ኑና ዔኪ ዓኣዺ ዔኤዞና ዲኢቆና ኩሜ፥ ማሎ ዓጬሎ ኑም ዒንጋንዳኔ፤ 9 ዬያሮ ናንጊና ናንጋ ጎዳም ዓይሢንቲፆ ዒፂፖቴ፤ ዒኢካ ናንጋ ዴሮዋ ዒጊጪፖቴ፤ ኑ ዔያቶ ሜታዹዋዖ ዖሊ ባሻንዳኔ፤ ናንጊና ናንጋ ጎዳ ኑኡና ዎላኬ፤ ዔያቶ ካፓኔ ጌይ ዔያታ ጉሙርቃ ፆኦዛ ዔያቶኮ ላቤኔ፤ ዬያሮ ዔያቶ ፔቴታዖ ዒጊጪፖቴ» ጌዔኔ። ዔብ. 3፡16። 10 ዒማና ዴራ ዔያቶ ሹቻ ዹይ ዎዻኒ ዞርቴኔ፤ ጋዓንቴ ዓፒሎና ማዢንቴ፥ ፆኦሲ ዴሮና ካኣማ ማኣሮ ዑፆይዳ ናንጊና ናንጋ ጎዳኮ ቦንቾ ፖዓ ፖዒ ዒስራዔኤሌ ዓሶም ጴዼኔ።

11 ናንጊና ናንጋ ጎዳ ሙሴም፦ «ሃይ ዴራ ታና ቦሃሢ ዓይዲ ሄላንዳኣናዳይ? ታ ዎልቄና ማዺንታ ሚርጌ ባኣዚ ማዺ ታ ዔያቶ ዻዌኔ፤ ሂዳዖ ታና ዔያታ ጉሙርቁዋኣሢ ዎማ ሄላንዳኣናዳይ? 12 ታ ዔያቶይዳ ሃርጌ ዔኪ ዬዒ ዔያቶ ባይዛንዳኔ፤ ኔና ጋዓንቴ ታ ዔያቶይዳፓ ባሼ ዺቢ፥ ሃሣ ዶዲ ማዔ ዴሬኮ ዓዶ ማሃንዳኔ» ጌዔኔ።

13 ሙሴ ናንጊና ናንጋ ጎዳ ኮይላ፦ «ሃያ ዴሮ ኔ ዎልቆና ጊብፄ ዓጫፓ ኔ ኬሴኔ፤ ኔ ዴሮ ዑፃ ኔ ማዼ ባኮ ጊብፄ ዓሳ ዋይዜቴ፦ ኬሲ. ማፃ 32፡11-14። 14 ዬያ ባኮ ቢያ ሃያ ዓጮይዳ ናንጋ ዓሶም ኬኤዛንዳኔ፤ ሃይ ዴራ ኔኤኒ፥ ናንጊና ናንጋ ጎዳ ኑኡና ዎላ ዓኣሢና ኔኤኮ ሻኣራ ኑ ዑፃ ላሃ ዎዶና ፔጋዺ ኔ ጴዻሢና፤ ዬያጉዲ ሃሣ ሮኦሪ ዡኡሎጉዲ ዔቄ ሻኣሮና፥ ዒባኒ ሃሣ ዡኡሎጉዲ ዔቄ ታሞና ዔኪ ኑና ኔ ዓኣዻሢ ዔያታ ዎዳ ዋይዜኔ። 15 ዓካሪ ሃሢ ኔኤኒ ዴሮ ኔኤኮ ፔቴና ዎዺ ኩርሴቴ፥ ኔ ማዼ ባኮ ቤርታ ዋይዜ ሜሌ ዓሳ፦ 16 ‹ናንጊና ናንጋ ጎዳ ሃያ ዴሮም ዒንጋንዳኔ ጌይ ጫኣቄ ዓጮ ጌልዛኒ ባሺንቴሢሮ ዓሲ ናንጉዋ ዳውሎይዳ ዔያቶ ዎዺ ባይዜኔ› ኔና ጋዓንዳኔ። 17 ዬያሮ ናንጊና ናንጋ ጎዳሢዮ! ኔ ኬኤዜ ጎይፆ ዎልቆ ኔኤሲ ዻዌ፤ 18 ኔኤኒ ኬኤዜሢ፦ ‹ታኣኒ፥ ናንጊና ናንጋ ጎዳሢ ዑኬ ዻጋዻያቱዋሴ፤ ታኣኮ ማኣሪፆና ናሹሞና ሚርጌኬ፤ ጎሜ ማዼያና ዓይሢንቲሢ ዒፄ ዓሲ ዻቢንቶ ዔሪ ማዔቴ ዓቶም ታ ጋዓንዳኔ፤ ዻቢንቴሢም ኮይሳ ሜቶ ዒንጉዋዖ ታ ሃሹዋያኬ፤ ዓዶንሢ ማዼ ጎሞሮ ናኣቶኮ ናኣቶ ሄላንዳኣና ሜቶ ታ ሄሊሱዋዖ ሃሹዋሴ› ጌዒኬ። ኬሲ. ማፃ 20፡5-6፤ 34፡6-7፤ ላሚ. ዎማ 5፡9-10፤ 7፡9-10። 19 ዬያሮ ሃሢያ፥ ናንጊና ናንጋ ጎዳሢዮ! ዔያታ ጊብፄ ዓጫፓ ኬስኬማፓ ዓርቃዖ ኔኤኮ ዼኤፖ ናሹሞና ኔ ዔያቶም ዓቶም ጌዒ ጌዒ ዓኣሢጉዲ ሃያ ዓሶኮ ጎሞ ዓቶም ኔ ጋዓንዳጉዲ ታ ኔና ሺኢቃኔ» ጌዔኔ።

20 ናንጊና ናንጋ ጎዳ ዒዛም ማሃዖ፦ «ኔኤኒ ታና ዖኦጬ ጎይፆና ታኣኒ ዔያቶም ዓቶንጎ ጌዔኔ፤ 21 ጋዓንቴ ታኣኒ ናንጊና ናንጋያ ማዔሢሮ፤ ሃሣ ቦንቻ ታኣኮ ዓጮ ቢያ ኩሜያ ማዔሢሮ፥ 22 ታኣኮ ቦንቾ፤ ሃሣ ጊብፄ ዓጮና ዓሲ ናንጉዋ ዳውሎናይዳ ታ ማዼ ታ ዎልቆና ማዺንቴ ዼኤፖ ማዾ ዛጌዖ ታኣም ዒፄዞንሢና ታጶ ማይንቲ ታ ዎይታቴያ ዛጋኒ ማዺ ሺሬ ዓሶይዳፓ ፔቴ ዓሲታዖ፥ 23 ዔያቶኮ ዓዶንሢም ‹ታ ዒንጋንዳኔ› ጌዒ ጫኣቄ ዓጮ ጌላዓኬ። ታና ቶኦቼ ዓሶይዳፓ ፔቴ ዓሲታዎ ዬኖ ዓጬሎ ዔያታ ጌላዓኬ። ዔብ. 3፡18። 24 ታ ዓይላሢ፥ ካኣሌቤ ጋዓንቴ ዱማ ማሊሢ ዒዛይዳ ዓኣሢሮ፤ ሃሣ ታና ዒ ዒናፓ ጉሙርቃያ ማዔሢሮ ዴንዲ ዒ ዛጊ ሙኬ ዓጬሎ ታ ዒዛ ጌልዛንዳኔ። ዜርፃኣ ዒዛኮ ዬኖ ዓጮ ዻካላንዳኔ። ዒያ. 14፡9-12። 25 ዬና ዓጬላ ሃሢ ዓማሌቄ ዓሶና ካኣናኔ ዓሶና ናንጋ ዓጮኬ፤ ዬያሮ ዚሮ ጊንሢም ማዒጋፓ ዞቄ ባዞ ባንሢ ዓኣዻ ጎይፆና ጌዒ ዓሲ ናንጉዋ ዳውሎ ዴንዱዋቴ» ጌዔኔ።

26 ናንጊና ናንጋ ጎዳ ሙሴና ዓኣሮኔናም፦ 27 «ሃይ ፑርቶ ዴራ ታጊዳ ጉንዱማሢ ዓይዲ ሄላንዳኣናዳይ? ዬያ ዔያቶኮ ዒሣ ጉንዱማሢ ታ ዋይዜኔ። 28 ዬያሮ ሃሢ ዔያቶም፦ ‹ናንጊና ናንጋ ጎዳ ሂዚ ጋዓኔ፤ ታኣኒ ናንጊና ናንጋያኬ፥ ዒንሢ ጋኣንቴ ታ ዋይዜ ባኮ ጎኔ ዒንሢዳ ታ ማዻንዳኔ፤ 29 ዒንሢ ቢያሢ ሃይቃንዳኔ፤ ሌዛ ዒንሢኮ ሃያ ዓሲ ናንጉዋ ዳውሎይዳ ኬኤሪንቲ ዓታንዳኔ፤ ዒንሢ ታጊዳ ጉንዱሜሢሮ ቤርታ ዒንሢ ፓይዶናኣና ሌዓ ላማታሚ ማዔሢና ዬካፓ ዑሣ ማዔ ዓሳ ቢያ ሃይካ ኩኩዳንዳኔ፤ ዔብ. 3፡17። 30 ዒንሢ ናንጋንዳጉዲ ዒናፓ ታ ዒንሢም ጫኣቂ ዒንጌ ዓጬሎ ዪፑኔ ናኣዚ ካኣሌቤና ኔዊ ናኣዚ ዒያሱናይዳፓ ዓታዛ ዒንሢዳፓ ፔቴ ዓሲታዖ ጌላዓኬ። 31 ዒንሢ ኑኡኮ ዲዒንቲ ዔውታንዳኔ ጌዔ ናኣቶ ዒንሢ ቦሄ ዓጬሎ ጌልዚ ዔያቶ ዓጪ ታ ማሃንዳኔ። 32 ዒንሢ ጋዓንቴ ሃያ ቦኦሎይዳ ሃይቂ ኬኤሪንቲ ዓታንዳኔ። 33 ዒንሢ ታና ጉሙርቆ ዒፄሢሮ ዒንሢዳፓ ጋፒንፃ ሃይቃንዳሢ ሃይቂ ሃያ ዓሲ ናንጉዋ ዳውሎይዳ ኬኤሪንታንዳያ ሄላንዳኣና ዒንሢኮ ናኣታ ሃያ ቦኦሎይዳ ዖይዲታሚ ሌዔ ሚርጌ ሜታዺ ሴካ ሃንጋ ሃንታንዳኔ። ዳኪ. ማዾ 7፡36። 34 ዒንሢ ማዼ ጎሞ ዛሎሮ ዖይዲታሚ ሌዔ ጉቤ ዒንሢ ዬያይዲ ሜታዻንዳኔ፤ ዬይያ ዓጬሎ ዒንሢ ሙሪፆሮ ዴንዳዖ ኔጌ ዖይዲታሞ ኬላ ፔቴ ፔቴ ሌዔ ዒንሢም ማዓንዳኔ ጌይሢኬ፤ ዬካፓ ዓካሪ ዒንሢ ታኣም ዋይዚ ዒፂሢ ዎዚጉዴ ሜቶ ሄሊሳቴያ ዔራንዳኔ። 35 ታጊዳ ፑርቱሞና ዞርቲ ዔቄ፥ ሃያ ዴሮይዳ ዬያ ባኮ ቢያ ታ ማዻንዳኔ፤ ሃያ ዓሲ ናንጉዋ ዳውሎይዳ ዒንሢ ቢያሢ ሃይቂ ኩዳንዳኔ፤ ዬያ ጌዔሢ ታና፥ ናንጊና ናንጋ ጎዳኬ› » ጌዔኔ።

36-37 ዓጬሎ ሙራንዳጉዲ ሙሴ ዳኬ ዓሶይዳፓ ዴራ ናንጊና ናንጋ ጎዳ ዑፃ ጉንዱማንዳጉዲ ሉኡዙሞ ሃይሶ ዴሮም ኬኤዜ ዓሶይዳ ናንጊና ናንጋ ጎዳ ፑርታ ዶርዖ ዓጌም ዔያታ ሃይቄኔ። 38 ዓጬሎ ሙሪ ማዒ ሙኬ ዓሶይዳፓ ሃይቁዋዖ ዓቴዞንሢ ኔዊ ናኣዚ ዒያሱና ዪፑኔ ናኣዚ ካኣሌቤና ሌሊኬ።