ሚልኪያሴ ማፃኣፖ

ዓይፆ ካሮ

ፆኦሲ ማሊፆ ኬኤዜ ሚልኪያሴ ማፃኣፓ ፃኣፒንቴሢ ኪሪስቶሴ ሾይንታንዳሢኮ ቤርታ ዶንጋሳ ፄኤቶ ሌዖና ዬሩሳላሜይዳ ጌኤዦ ማኣራ ጊንሣ ማዢንቴሢኮ ጊንፃኣኬ። ፆኦሲ ማሊፆ ኬኤዛ ሚልኪያሴ ዶዲሺ ላታሢ ቄኤሶ ማዔያታቴያ ዴራ ፆኦሲና ዎላ ጫኣቄ ጫኣቁሞ ጊንሣ ዓካሳንዳያ ኮይሳሢኬ፤ ፆኦሲኮ ዴራ ናንጋ ናንጎና ማዔቴያ ካኣሽካ ካኣዦና ሼኔ ጌዔ ጎይሢ ናንጋያና ፑርቴያ ማዔሢ ዔርቴያኬ፤ ዬያ ሌሊቱዋንቴ ቄኤሶንታ ዴሮንታ ኮይሳያ ማዔ ፆኦሲም ዒንጎ ዒንጊፆዋ ሺኢሹዋዖ ሃሺ ዔያቶም ዒንጊንቴ ዳምቦ ጎይፆ ናንጎ ሃሺሢና ፆኦሲ ዔያታ ጌሻኒ ማሌኔ። ዬያሮ ፆኦሲ ጎይፆ ፔኤኮ ጊኢጊሻኒና ዔያቶና ዎላ ጫኣቄ ጫኣቁሞ ዒላቲ ኬኤዛኒ ፔኤኮ ኪኢቶ ዓሢ ቤርታሲ ዳኬስካፓ ዴሮ ዎጋኒና ጌኤሻኒ ሙካንዳኔ።

ማፃኣፔላ ዱማ ዱማ ዓርቄ ባኮ

ናንጊና ናንጋ ጎዳ ዒስራዔኤሌ ዴሮ ናሽካ ናሹሞ (1፡1-5)

ፆኦሲ ቄኤሶ ዎጋንዳያ ማዒፆ (1፡6—2፡9)

ፆኦሲና ዎላ ጫኣቆና ጫኣቁማ ሃሺንቴሢ (2፡10-17)

ናንጊና ናንጋ ጎዳኮ ሙኮ (3፡1-5)

ፆኦሲ ጌሻኒ ኮይሱዋኣያ ማዒፆ (3፡6-15)

ጉሙርቂንታ ዓሶም ቦንቺ ዒንጎንዶ ባኮንታ ፑርቶ ዓሳኣ ዎጊንታንዳሢ ዛላ (3፡16—4፡6)

2 ናንጊና ናንጋ ጎዳ ፔኤኮ ዴሮ «ታ ዒንሢ ናሽኬኔ» ጋዓኔ። ዒንሢ ጋዓንቴ «ዎያይዲ ኔ ኑና ናሽኬይ?» ጋዓኔ።

ናንጊና ናንጋ ጎዳ ማሃዖ፦ «ዔኤሳዎና ያይቆኦቤና ዎሊኮ ጌርሲንሢኬ፤ ታኣኒ ያይቆኦቤ ናሽኬኔ፤ 3 ዔኤሳዎ ጋዓንቴ ታኣኒ ዒፄኔ፤ ዔኤሳዎኮ ጌሜራዻ ዓጮ ዓሲ ናንጉዋ ዳውሌ ታኣኒ ማሄኔ፤ ሳዔሎዋ ዉኡካ ኮኦሚ ሺራ ቤሲ ታኣኒ ማሄኔ» ጌዔኔ። ሮሜ 9፡13።

4 ዔዶኦሜ ዓሶ ጌይንታ ዔኤሳዎ ዜርፃ፦ «ካታማ ኑኡኮ ሻሂንቴኔ፤ ጋዓንቴ ማሂ ኑኡኒ ማዣንዳኔ» ጌዔቴ ቢያ ባኮ ዎይሣ ጎዳ ሂዚ ጋዓኔ፦ «ዔያታ ማዣንዳኔ፤ ታኣኒ ጋዓንቴ ዬያ ሻሃንዳኔ፤ ዓሲ ቢያ ዬኖ ዓጬሎ ‹ፑርታ ሳዓ› ዒኢካ ናንጋ ዓሶዋ ‹ናንጊና ናንጋ ጎዳ ጫሽኬ ዴሬ› ጌይ ዔኤላንዳኔ።»

5 ዒንሢ ዬያ ቢያ ዒንሢ ዓኣፒና ዛጊ፦ «ናንጊና ናንጋ ጎዳ ዒስራዔኤሌ ዓጮይዳ ሌሊቱዋንቴ ሜሌ ዓጮይዳኣ ዼኤፒኬ!» ጋዓንዳኔ። ዒሲ. 34፡5-17፤ 63፡1-6፤ ዔር. 49፡7-22፤ ሂዚ. 25፡12-14፤ 35፡1-15፤ ዓሞ. 1፡11-12፤ ዓብዲ. 1-14።

6 ቢያ ባኮ ዎይሣ ጎዳ ቄኤሶም ሂዚ ጋዓኔ፦ «ናይ ፔኤኮ ዓዶ፥ ዓይሌ ፔኤኮ ጎዳ ቦቦንቻኔ፤ ዓካሪ፥ ታኣኒ ዒንሢኮ ዓዶ ማዓያታቴ ዓይጎሮ ዒንሢ ታና ቦንቹዋይ? ታ ዒንሢኮ ጎዳ ማዔያታቴ ዓይጋ ዒንሢ ታና ዒጊጩዋይ? ዒንሢ ታኣኮ ሱንፆ ቶኦቼኔ፤ ጋዓንቴ ዒንሢ፦ ‹ሱንፆ ኔኤኮ ኑ ቶኦቼሢ ዎይቲዳይ?› ጌይ ዖኦጫኔ። 7 ዒኢቴ ሙኡዚ ታኣም ዒንጎ ባኮ ዒንጎ ቤዛ ሺኢሺ፦ ‹ኔኤም ዒንጎ ባኮ ዒንጎ ቤዞ ዎይቲ ኑ ዒኢሴይ?› ጌይ ዒንሢ ዖኦጫኔ፤ ዒንሢ ዬያ ዒኢሴሢ ታኣኮ ሙዖ ሙዎ ጋባዳ ቶኦቺንቴያኬ ጋዓሢሮኬ። 8 ዒንሢ ዓኣፒ ባይቄያ፥ ሃርጊንቴያና ዎቦ ማዔ ቆልሞ ታኣም ዒንጎ ዒንጊሢ ማሂ ሺኢሺፆና ዻቢንቲ ማዼያ ዒንሢም ማሉዋዓዳ? ዬያጉዴ ቆልሞ ዒንሢኮ ሱኡጋሢም ዒንጎ ባኣዚ ማሂ ዒንሢ ዒንጌቴ ዎዛና ዒንሢፓ ዔኪ፥ ዒዚ ዒንሢ ጋላታንዳያ ዒንሢም ማላ?» ጋዓኔ ቢያ ባኮ ዎይሣ ጎዳ። ላሚ. ዎማ 15፡21።

9 ዒንሢ ቄኤሳ! ዬያ ቢያ ማዺጋፓ ናንጊና ናንጋ ጎዳ ኮሺ ባኣዚ ዒንሢም ማዾም ሺኢቃዛ፥ ሺኢጲፆ ዒንሢኮ ዒዚ ዔካንዳያ ማላ? ዬያኮዋ ዻቢንታ ዒንሢዳኬ ጋዓኔ ቢያ ባኮ ዎይሣ ጎዳሢ። 10 ቢያ ባኮ ዎይሣ ጎዳ፦ «ታኣም ዒንጎ ባኮ ዒንጎ ቤዞይዳ ማዒባኣ ታሚ ዒንሢ ዔኤሢፆይዳፓ ጌኤዦ ማኣሮኮ ካሮ ዎዻ ዓሲ ዒንሢዳፓ ፔቴ ጴዼቴ ዓይጎ! ዒንሢና ታኣኒ ዎዛዹዋኣያ ማዔሢሮ ዒንሢ ታኣም ዒንጋ ዒንጊፆ ታኣኒ ዔካዓኬ፤ 11 ሃኣዛጉዋቴ፤ ዓጮ ዴራ ቢያ ካራፓ ካሮ ሄላንዳኣና ታና ቦንቻኔ፤ ዎኖ ቤዛ ማዓቴያ ታኣም ዑንጄ ጩቢሺ ጩቢሺ ዒንጎ ዒንጊሢ ጌኤሺ ዔያታ ታኣም ሺኢሻኔ፤ ዓሲ ቢያ ቦንቺያ ታና ቦንቻኔ። 12 ዒንሢ ጋዓንቴ፦ ‹ናንጊና ናንጋ ጎዳም ዒንጎ ባኮ ዒንጎ ቤዛ ዒኢቴያኬ› ‹ሙዓኣ ቶኦቺንቴያኬ› ጌይ ጌይ ዒንሢ ቦሃኔ። 13 ሃሣ ዒንሢ ዓማሊ ሚኢጪ ሚኢጪ ‹ሃይ ቢያ ዎዚ ዒሣ ባኣዚዳይ!› ጋዓኔ። ዉኡቂ ዔኮናያ፥ ዎቦ፤ ጊንሣ ሃሣ ሃርጊንቴ ቆልሞ ዒንጎ ዒንጊሢ ማሂ ዒንሢ ሺኢሻኔ፤ ታኣኒ ዬያ ዒንሢኮ ዔካያ ዒንሢም ማላ? 14 ታኣኒ ዼኤፒ ካኣቲኬ፤ ሱንፃ ታኣኮ ዴሮ ቤርታ ቦንቺንቴያ ማዔሢሮ ማራቶ ባኣኮይዳ ዓዴ ማራይ ዓኣንቴ ዒዚ ናኣቤ ናኣቦም ቦሂሳ ባኣዚ ዓኣ ማራይ ታኣም ዒንጎ ዒንጊሢ ማሂ ሺኢሻሢ ጋዳንቂንቴያ ማዖም!» ጋዓኔ፤ ቢያ ባኮ ዎይሣ ጎዳሢ።

ሚልኪያሴ ማፃኣፖ 2 ->