1 ናንጊና ናንጋ ጎዳ ሙሴም፦ 2 «ዓኣሮኔና ዒዛኮ ናኣቶናም ሂዚ ጌዔ፤ ታኣኮ ዱማዼ ሱንፆ ዒንሢ ጫሽኪሱዋጉዲ ዒስራዔኤሌ ዴራ ታኣም ዒንጋ ባኮ ቢያ ቦንቺ ዔኪጋፓ ታኣም ዱማዼያ ማሂ ካፑዋቴ፤ ታኣኒ ናንጊና ናንጋ ጎዳኬ። 3 ዒንሢ ፃጳፓታዖ ዒኢቴ ዓሲ ዒስራዔኤሌ ዴራ ታኣም ዱማሲ ዒንጌ ዒንጊፆ ባንሢ ጫርቂ ዑኬቴ፥ ታ ቤርታፓ ዬይ ባይቆንጎ፤ ዬይ ዳምባ ሙካ ዎዶ ቢያይዳ ካፒንቲ ናንጋያ ማዖንጎ፤ ታኣኒ ናንጊና ናንጋ ጎዳኬ።»

4 «ዓኣሮኔ ፃጳፓ ማዔ ዓይጎ ዓሲታቴያ ዑስካ ኬስካ ዶርዓ ዓኣያ ማዔቴ፤ ሃሣ ሃርጌ ዛላና ዑስካፓ ዓልቃ ባኣዚ ዓኣ ዓሲ ዳምቦ ጎይፆና ጌኤሽካንዳያ ሄላንዳኣና ታኣም ዱማዼ ሙዖ ሙዖፓ፤ ዬያጉዲ ሃሣ ሌሲ ካኣሚ ዒኢቴ ባኣዚታቴያ ሾይዣ ዜርፃ ሾኦቴ ዓሲ ካኣሜቴ፥ 5 ዒኢሳያ ማዔ፥ ሳዓና ጎቺንቲ ሃንታ ባኮታቴያ ዒኢቴያ ማዔ ዓሲ ካኣሜቴ፥ 6 ዬያጉዴ ባኮ ቢያ ካኣሜ ቄኤሳሢ ዴንዲ ዒባኒ ሄላንዳኣና ዒኢቴያ ማዓንዳኔ፤ ዑፆ ዋኣሢና ማስቲባኣቴ፥ ታኣም ዱማዼ ዒንጊፆ ዒ ሙዖፓ። 7 ዓባ ጌሌስካፓ ዒ ጌኤሺ ማዓንዳሢሮ ታኣም ዱማዼ፥ ሃኣኮ ዒንጊፆ ዒዛሲ ዒ ሙዓኒ ዳንዳዓኔ፤ 8 ሃይቄያ፥ ሃሣ ቦዖ ዎዼ ባኣዚኮ ዓሽኪ ሙዖፓ፤ ዬያ ሙዔቴ ዒዛ ዒኢሳንዳኔ፤ ታኣኒ ናንጊና ናንጋ ጎዳኬ።»

9 «ቄኤሳ ቢያ ታኣኒ ዔያቶም ዒንጌ ዳምቦ ካፖንጎ፤ ዬያ ዔያታ ካፒባኣቴ ጋዓንቴ ዓይሢንቲፆ ዒፂፃ ዻቢንቲ ዔያቶኮ ማዔም ዔያታ ሃይቃንዳኔ፤ ታኣኒ ዔያቶ ታኣም ዱማሳ፥ ናንጊና ናንጋ ጎዳኬ።

10 «ታኣም ዱማዼ፥ ዒንጊንቴ ባኮ ሙዓኒ ዳንዳዓሢ ቄኤሳሢ ማኣሮ ዓሶ ሌሊኬ፤ ቄኤሳሢኮ ሾኦቺ ማዔቴያ ሚኢሼ ጪጊንቴም ዒዛም ማዻ ዓሲያ ሙዖፓ። 11 ጋዓንቴ ቄኤሳሢ ፔኤኮ ሚኢሼና ሻንቂ ዔኬያና ዒዛኮ ማኣራ ሾይንቴያ ማዔ፥ ዒዛም ማዻ ዓሳ ቄኤሳሢሮ ማዔ ሙዖ ሙዖንጎ። 12 ቄኤሴ ማዒባኣ ዓሲም ሌዔ፥ ቄኤሳሢኮ ናይ ታኣም ዱማዼ ሙዖ ሙዎፓ። 13 ጋዓንቴ ዬና ናዔላ ናይ ሾዑዋንቴ ዓኒ ሃይቄያ ማዔም ዓኒ ማኣራፓ ዓንጂንቲ ኬስኪ ዓዶ ኮይላ ሙኪ ናንጋ ቄኤሴ ናይታቴ ቤርታ ናይ ዓኣዖ ዒዛ ማዻሢጉዲ ዓዶ ዛሎ ማዔ፥ ታኣም ዱማዼ ሙዖ ሙዎንጎ፤ ዬያ ጎይፆና ታኣም ዱማዼ ባኮ ሙዓኒ ዳንዳዓ ዓሳ ቄኤሳሢ ማኣሮ ዓሶ ሌሊኬ።

14 «ቄኤሴ ማኣሪ ዓሲ ማዒባኣ ዓይጎ ዓሲያ ማዖም ዔሩዋዖ ታኣም ዱማዼ ሙዖ ሙይ ጴዼቴ ዒንጊንቴ ባኮኮ ዶንጎ ኩቺፓ ፔቴ ማዓያ ጊዳ ቃሲ ቄኤሳሢም ማሆንጎ። 15 ዒስራዔኤሌ ዴራ ታኣም ዒንጋ፥ ዱማዼ ዒንጊፆ ቄኤሳ ዒኢሳንዳያ ኮይሱዋሴ፤ 16 ጌይፃ፦ ታኣም ዱማዼ ዒንጊፆ ሙዓኒ ኮይሱዋ ዓሲም ዒንጊ ዓሢ ሜቶይዳ ጌልዙዋጉዲኬ፤ ዒንጊፆ ቢያ ታኣም ዱማሳሢ ታና፥ ናንጊና ናንጋ ጎዳሢኬ» ጌዔኔ።

17 ናንጊና ናንጋ ጎዳ ሙሴም፦ 18 «ዓኣሮኔና ዒዛኮ ናኣቶና፤ ሃሣ ዒስራዔኤሌ ዴሮም ቢያ ሃይፓ ዴማ ዓኣ ዳምቦ ኬኤዜ፤ ዒስራዔኤሌ ዓሲ ማዔቴያ ዔያቶ ባኣካ ናንጋ ሜሌ ዓጪ ዓሲ ፆኦሲም ናኣቤ ናኣቢ ኩሜም፥ ሃሣ ፔ ሼኔና ታኣም ሚቺ ዒንጎንዶ ባኣዚ ዔኪ ሺኢሻያ ማዔቴ ዒንጊንታ ባካ ዓይጌያ ቦሂሳ ባኣዚ ባኣያ ማዖንጎ። 19 ዒዛኮ ዒንጊፆ ታ ዔካያ ማዓንዳጉዲ ዔኤቢ ቦሂሳ ባኣዚባኣያ ባይ፥ ማራይ፥ ዋኣሪ ማዔቴ ጌማይ ሃንጎ ዓዴ ዔኪ ሺኢሾንጎ፤ 20 ዔኤቢ ቦሂሳ ባኣዚ ዓኣ፥ ዓይጎ ቆልሞዋ ዒንሢ ታኣም ዒንጌቴ ዬያ ታ ዔካዓኬ። ላሚ. ዎማ 17፡1። 21 ዓይጎ ዓሲኮዋ ናኣቤ ናኣባ ኩሜም፤ ሃሣ ፔ ሼኔና ዒንጎ ባኣዚ ፔቱሞና ዒንጎ ዒንጊሢ ማሂ ዒንጋቴ ታኣኒ ዬያ ዔካያ ማዓንዳጉዲ ቦሂሳ ባኣዚባኣያ ማዖንጎ። 22 ዓኣፒ ባይቄያ፥ ሜቄያ፥ ቶኪ ዱጴያ፤ ዬያጉዲ ሃሣ ጊኢሽካ ኪሢ ዓኣያ፥ ቃፃ ዓርቄያንታ ዑፃ ሜሌ ኪሢ ዓኣ ቆልሞ ታኣም ዒንጎ ዒንጊሢ ማሂ ዔኪ ሺኢሾፓ፤ ዬንሢጉዴ ቆልሞ ሚቺ ዒንጎ ቤዞይዳ ሙኡዚ ዒንጊሢ ማሂ ዒንጊፖ። 23 ባይታቴያ ማራይ ዎቦ ማዔ ቆልሞ ዓሲ ፔ ሼኔና ዒንጋ ዒንጊሢ ማሂ ዒንጋኒ ዳንዳዓኔ፤ ጋዓንቴ ናኣቢ ኩንሥሢ ማሂ ዬይ ዒንጊንታኒ ዳንዳዑዋሴ። 24 ፂኢቄ ዹይንቴ ቆልሞንታ ጌኒንቴ ቆልሞ ማዔቴያ ታኣም ዒንጎ ባኣዚ ማሂ ዔኪ ሺኢሺፖቴ፤ ዬያጉዴ ባኣዚ ዒንሢ ዓጫ ታኣም ሺኢሺ ዒንጊፖቴ።

25 «ዬያጉዴ ቆልሞ ሜሌ ዓጪ ዓሲዳፓ ዔኪ ታኣም ሙኡዚ ዒንጊሢ ማሂ ዒንጊፖቴ፤ ዬያ ቆልሞኮ ቦሂሳ ባኣዚ ዓኣያታሢሮ ታኣኒ ዬያ ዒንጊፆ ዔካያቱዋሴ» ጌዔኔ።

26 ናንጊና ናንጋ ጎዳ ሙሴም፦ 27 «ናኣሪታቴያ ማራናይ፤ ሃሣ ዋናናይ ሾይንቴ ዎዶና ላንካይ ኬሊ ሄላንዳኣና ዒንዶና ዎላ ዴዖንጎ፤ ጋዓንቴ ሳላሳ ኬላፓ ዓርቃዖ ሙኡዚ ዒንጊሢ ማዒ ታኣም ዒንጊንታኒ ዳንዳዓኔ።

28 «ሾዔ ባይ ናኣሮማና ዎላ፥ ማራይታቴያ ዋኣሪ ናዖና ዎላ ሚቺ ዒንጎ ዒንጊሢ ማሂ ፔቴ ኬሊዳ ሹኪፖ። 29 ጋላታ ዒንጊሢ ታኣም ዒንሢ ዒንጋ ዎዶና ዒንጊፆ ታ ዔካያ ማዓንዳ ጎይሢ ማሂ ሺኢሹዋቴ። 30 ዚሮ ሄላንዳኣና ዓይሱዋዖ ዒንጊንቴ ኬሎና ዓሽኮ ጋፒሲ ሙዑዋቴ፤ ታኣኒ ናንጊና ናንጋ ጎዳኬ።

31 «ታኣኮ ዓይሢፆ ካፒ ማዻያ ማዑዋቴ፤ ታኣኒ ናንጊና ናንጋ ጎዳኬ። 32 ታኣኮ ዱማዼ ሱንፆ ጫሽኪሲፖቴ፤ ዒስራዔኤሌ ዴራ ቢያ ታኣኒ ዱማዼያታሢ ዔሪ ታና ቦንቾንጎ፤ ዒንሢ ታኣም ዱማሳሢ፥ ታና ናንጊና ናንጋ ጎዳኬ። 33 ታ ዒንሢኮ ፆኦሲ ማዓኒ ጊብፄ ዓጫፓ ዒንሢ ዔኪ ኬሴኔ፤ ታኣኒ ናንጊና ናንጋ ጎዳኬ» ጌዔኔ።

<- ሌዊ ዓሶ ማፃኣፖ 21ሌዊ ዓሶ ማፃኣፖ 23 ->