5
ፆኦሲ ሚጪንታንዳጉዲ ሺኢቂንቴ ሺኢጲሢ
1 ናንጊና ናንጋ ጎዳሢዮ! ኑና ሄሌ ባኮ ዛሎሮ ኑም ማሌ፤
ኑኡኮ ዻውሲንቶ ዛጌ!
2 ኑኡኮ ዴና ዔውቲ ሜሌ ዓሲም ዒንጊንቴኔ፤
ኑኡኮ ኬኤፃ ቢያ ሜሌ ፃንጎ ዓሲ ናንጋ ኬኤሢ ማዔኔ።
3 ኑኡኒ ዓዴ ሃይቄ ዜኤሪ ማዔም
ኑኡኮ ዒንዶንሢያ ዜኤሪ ዒንዶ ማዔኔ።
4 ኑኡኒ ዑሽካ ዋኣፆንታ
ካያፓ ሃኣኮ ሃንፂሎንታ ሻሻንቃኔ።
5 ኑና ዳውሳ ዓሳ ኑኡኮ ባቃና ዴዒ ዓኣኔ፤
ኑኡኒ ላቤኔ፥ ሃውሾዋ ኑኡኮ ባኣሴ።
6 ኑም ጊዳ ሙኡዚ ዴንቃኒ ጊብፄ ዓጮና
ዓሶኦሬ ዓጮናም ኩቺ ኑ ዒንጌኔ።
7 ኑ ዓዶንሢ ጎሜ ማዺ ኑም ሃሼኔ፤
ኑኡኒ ዔያቶም ዓጎና ሜቶ ዔኪሢዳኬ።
8 ሃያኮ ቤርታ ዓይሌ ማዔ ዓሳ ሃሢ ኑና ዎይሣያ ማዔኔ፤
ዔያቶ ኩጫፓ ኑና ዓውሳኒ ዳንዳዓ ዓሲያኣ ባኣሴ።
9 ዳውሎ ቦኦሎይዳ ዎዻ ዓሲ ዓኣሢሮ
ኑኡኒ ሙዖ ባኣዚ ዴንቃኒ ዳንዳዓሢ
«ዎዼቴ ዎዼ፥ ዻቂሼቴ ዻቂሼ» ጌይኬ።
10 ናያ ኑና ባሼሢሮ
ዑፃ ኑኡኮ ናኣቦጉዲ ጪላንቄኔ።
11 ኑኡኮ ላኣላ ፂዮኔይዳ
ኑኡኮ ዉዱሮ ናኣታኣ ዪሁዳ ካታሞይዳ
ዎልቄና ዓርቂንቴኔ።
12 ኑ ሱኡጎኮ ኩጮ ቱኪ ሱፂ ዎዾናኔ፤
ኑኡኮ ጋርቾዋ ቦንቺቦኦሴ።
13 ዓቲንቆ ዼጌሢ ዎልቃዺ ዎንሢ ዎዺሾናኔ፤
ዓቲንቆ ናኣቶ ዻካኣ ዴኤሢ ሃንፂሌ ኬዲና ሜታዼኔ።
14 ዓጮ ጋርቻ ዴይ ዎጎ ዎጋ ቤዞ ሃሺ ዴንዴኔ፤
ዼጌሢያ ኮርጋ ኮፆ ሃሼኔ።
15 ዎዛ ኑኡኮ ዒናፓ ባይቄኔ፤
ኑ ዎንዴ ዎዛዺ ኮርጋ ኮፆ ባይዚ ዖዪሢ ዓርቄኔ።
16 ቦንቻ ኑኡኮ ዔውቲ ባይቄኔ፤
ኑኡኒ ጎሜ ማዼሢሮ ኑና ባዴዔ!
17 ያዺ ማዔሢሮ ኑኡኒ ሃርጌ ዓሲ ማዔኔ፤
ዓኣፓኣ ኑኡኮ ፒዜ ዛጎ ባሺንቲ ላቤኔ።
18 ፂዮኔ ዹካ ዓሲባኣያ ጉሪ ቤሲ ማዒ ዓቴሢሮ
ዉኡካ ዒኢካ ዓማሊ ሺራ ቤሲ ማዔኔ።
19 ኔኤኒ ጋዓንቴ ናንጊና ናንጋ ጎዳሢዮ! ናኣናና ካኣቲኬ፤
ኔኤኮ ካኣቱሞ ዖይታ ሙካ ዎዶ ቢያይዳ ባይቃዓኬ።
20 ኔ ኑና ዎይታዛ ጋፒ ዋሊ ሃሼዖ?
ሚርጌ ዎዴ ኔ ኑና ኬንኬሊዲ ሃሼንቴሞ?
21 ናንጊና ናንጋ ጎዳሢዮ! ኔ ባንሢ ኑና ማሄ፥ ኑኡኒ ማዓንዳኔ፤
ኑኡኒ ናንጋ ናንጎ ቤርታኣ ዎዶጉዲ ማሂ ጊንሣ ኮሼ።
22 ኔኤኒ ዬያይዲባኣቴ ጋፒ ኑና ኔ ሃሺ