2
ናንጊና ናንጋ ጎዳ ዬሩሳላሜይዳ ዓጌ ሜቶ
1 ናንጊና ናንጋ ጎዳ ፔ ዻጎና ፂዮኔ ዻውሲሴኔ፤
ጫሪንጮ ሌካ ኬስኪ ዼጊ ጌይ ዴዔዞ
ዒስራዔኤሌኮ ሄርሺንቶዞ ዒዚ ሳዓ ጎቺ ዔኪ ኬኤሬኔ፤
ዒዚ ዻጋዼ ዓቦና ዒዛኮ ቶካ ሄርቃ ቤዜሎ
ዔኤቢኬያ ጌይ ሺሪ ዛጊባኣሴ።
2 ናንጊና ናንጋ ጎዳ ዒስራዔኤሌኮ ናንጎ ቤዞ ቢያ ሚጪንቱዋዖ ባይዜኔ፤
ዒዚ ዻጋዺ ዪሁዳ ዴሮኮ ዋርዲዮ ሻሄኔ፤
ዒኢካ ዓኣ ካኣቶና ቢታንታ ዓኣ ዓሶና ሳዓ ዔኪ ዢቢ ዻውሲሴኔ።
3 ዒዛኮ ዼኤፖ ዻጎና ዒስራዔኤሌኮ ዎልቆ ቢያ ላቢሴኔ፤
ሞርካ ዒስራዔኤሌይዳ ሙካኣና ዒዚ ዔያቶ ማኣዶ ሃሺ
ያይቆኦቤ ዜርፆይዳ ፔኤኮ ዻጎ ታሞ ዔኤሤኔ፤
ኮይላ ዓኣ ባኮ ቢያ ሙዓ ታሚጉዲ ሙዔኔ።
4 ዒዚ ሞርኬጉዲ ሂኢዦና ፔኤኮ ኑና ዱካኒ ዓኣሤኔ፤
ዒዛኮ ሚዛቆ ኩጫ ኑና ማኣሳንሣኒ ጊኢጌኔ፤
ዬሩሳላሜይዳ ዓኣ፥ ኑኡኒ ናሽካ ዓሶ ቢያ ዒ ዎዼኔ፤
ፔኤኮ ዻጎ ታሚጉዲ ዒዚ ዔኤሤኔ።
5 ናንጊና ናንጋ ጎዳ ሞርኬጉዲ ማዒ ዒስራዔኤሌ ባይዜኔ፤
ካኣቱሞ ማኣሮዋ ዶይሲ ኩርሴኔ።
ዋርዲዮ ሻሄኔ፤
ዪሁዳ ዴሮይዳ ዬኤፒና ዒላቲና ዺቢሼኔ።
6 ናንጊና ናንጋ ጎዳ ፔኤኮ ጌኤዦ ማኣሮ ጎሺዳ ዓኣ ዉልሻጉዲ ሻሄኔ፤
ፂዮኔይዳ ቦንቾ ቦንቾንታ ሃውሾ ኬሎዋ ዓይሴኔ፤
ፔኤኮ ዼኤፖ ዻጎና ካኣቲንታ ቄኤሶዋ ዻውሲሴኔ።
7 ናንጊና ናንጋ ጎዳ ዒዛም ዒንጎ ባኮ ዒንጎ ቤዞ ቦሄኔ፤
ፔኤኮ ጌኤዦ ማኣሮዋ ሃሼኔ።
ካኣቱሞ ማኣሮኮ ኬኤሎ ዲፆ ሞርካ ዶይሳንዳጉዲ
ዒዚ ዓኣሢ ሞርኮም ዒንጌኔ፤
ዬያሮ ሞርካ ቦንቾ ኬሊና ማዺንታ ጎይሢ
ጌኤዦ ማኣሮይዳ ዎዛና ኮርጌኔ።
8 ናንጊና ናንጋ ጎዳ ዬሩሳላሜ ካታሞኮ ኬኤሎ ዲፆ ሻሃኒ ጊኢጊ
ሚፆ ሱዞ ሊካ ኬይሴኔ፤
ካታሜሎ ባይዚፃፓ ጊንሢም ጌይባኣሴ፤
ካታሞ ካፖ ዼጌ ኬኤሎ ዲፃኣ ዹኡቂ ሻሂንቴኔ፤
ዬይ ቢያ ፔቴና ዶዔኔ።
9 ካታሞ ጌሎ ካሮ ዎዾ ካራ ሳዖ ዴማ ዱኡኪንቴኔ፤
ኮምባልቂ ዎዾ ጋጋርዛኣ ሜቂ ሜቂ ጋፔኔ፤
ካኣቲንታ ዒዚ ቢታንቶ ዒንጌ ሱኡጎንታ
ሜሌ ዴሮ ባኣኮይዳ ዳውሲንቲ ዴንዲ ዓኣኔ፤
ሙሴ ዔርዜ ዎጎ ሃካፓ ሴካ ኬኤዚ ዔርዛ ዓሲ ባኣያ ማዓንዳኔ፤
ፆኦሲ ማሊፆ ኬኤዛ ዓሶም ሃካፓ ሴካ ናንጊና ናንጋ ጎዳ ፔጋሲ ዻዋንዳ ባኣዚ ባኣሴ።
10 ዬሩሳላሜ ካታሞይዳ ዓኣ ጋርቻ ሳዓ ዚቲ ጌይ ዴዔኔ፤
ዔያታ ፔኤኮ ቶኦኮይዳ ሲላሊ ዋሂ፥ ሲዬ ፓቲሌያ ማኣዔኔ፤
ዒኢካ ካታሞይዳ ዓኣ ዉዱሮ ናኣታ ካራ ባይዚ ሳኣ ዛጌኔ።
11 ዴሮ ታኣኮ ዎዺ ኩርሶናሢሮ
ናኣታ ካታሞ ሳዞ ጎይፆይዳ ላቢ ሎኦማሢሮ
ዬኤኬ ጎይሣ ዓኣፓ ታኣኮ ዶጬኔ፤
ጎጳኣ ታኣኮ ዋኣፄኔ፥ ሃጊ ማዓ ዎዛኣ ታኣኮ ባኣያ ማዔኔ።
12 ዖልዚ ቦኦሊዳ ዱኡቴ ፖኦሊሴጉዲ
ካታሞ ሳዞ ጎይፆይዳ ላቢ ሎኦሚ ላሂ ላሂ
ዒንዶንሢኮ ቃሶይዳ ጌኤቂንቲ ዴዒ
«ዒንዴ! ሙኡዚ፥ ዋኣሢ ዒንጌ» ጌይ ዬኤኪ ዬኤኪ
ሼምፓሢ ዔያቶኮ ዬያይዲ ዱጲ ጋፓኔ።
13 ታ ዎዚ ጎዖንዶይ? ዓይጎና ታ ዒንሢ ሄካሳኒ ዳንዳዓይ?
ታኣኒ ናሽካ፥ ዬሩሳላሜ ካታሞ ዴራ!
ታ ዒንሢ ዶዲሻኒ ዓይጎና ታ ዒንሢ ቤቂሶንዶይ?
ዒንሢ፥ ዬሩሳላሜ ካታሞ ዴራ!
ዒንሢዳ ሄላንዳ ባይሲንታ ዳልጎ ባዞጉዲ ዼኤፒታሢሮ
ዖኦኒ ዒንሢ ዓውሳኒ ዳንዳዓይ?
14 ዒንሢም ሎንሦ ኬኤዛ ዓሳ ዒንሢም ሉኡቂ፥ ሃሣ ዒንሢ ጌጌሼኔ፤
ዔያታ ሉኡዚ፥ ሃሣ ዻዻቢሻ ሎንሦ ዒንሢም ኬኤዜኔ፤
ዒንሢም ጊኢጊ ዓኣ ፑርቶ ባካፓ ዒንሢ ማሃኒ
ዒንሢኮ ዻቢንቶ ዒንሢም ፔጋሲ ኬኤዚባኣሴ።
15 « ‹ኮሺ ሚዛጲኬ› ጎዖዛ፥ ዓጮ ዴራ ቢያ
ዒኢካ ሙኪ ዎዛዻዛ፥ ሃኖ ካታሜሎዳ?»
ጌይ ጌይ ጎይፆና ዴንዳ ዓሳ ቢያ
ዬሩሳላሜ ዛጋ ዓሳ ቦሂሢና ኩቺ ባዒ ባዒ
ቶኦኮዋ ፔኤኮ ዓጊሢ ዓጊሢ ሚኢጫንዳኔ።
16 ዒንሢኮ ሞርካ ቢያ ዒንሢ ጫሽኪ ጫሽኪ ሚኢጪ ዓማላኔ፤
ዒንሢ ቶኦቺ፥ ዓጮ ፔኤኮ ዻዓኔ፤
ሂዚ ጌይያኣ ዒላታኔ፦ «ኑ ዔያቶ ኩርሲናኣኮኬ!
ሂዮ! ሃይማ ኑ ማሊ ሃይቃ ኬሎማዋይ!
ጋፒንሢ ዑስካ ኑ ዓካሪ ዴንቄያኣዋይ።»
17 ናንጊና ናንጋ ጎዳ ማሌ ባኮ ማዺ ኩንሤኔ፤
ቤርታ ዒዚ ኬኤዜ ቃኣሎ ማዾይዳ ፔኤሼኔ፤
ሚርጌ ዎዴኮ ቤርታ ዒ ማሊ ቱኬ ጎይፆ ማኣሚቃይዶ ሻሄኔ፤
ሞርካ ዒንሢኮ ካሮ ባይዚፆና ዎዛዻንዳጉዲ ዒ ማሄኔ፤
ዒንሢ ሞርኮኮ ዎልቆ ዒዚ ዶዲሼኔ።
18 ዬሩሳላሜ ዴሬዮቴ! ዒንሢኮ ዒላታ
ኬኤሎ ዲፆይዳ ማኣሞንጎ!
ናንጊና ናንጋ ጎዳ ዋይዛንዳጉዲ ዒላቱዋቴ!
ዓቢፃ ዒንሢኮ ዋንቶንታ ሮኦሮንታ ቢያ ዲጲጉዲ ዎቶንጎ፤
ፔቴታዖ ሃውሺፖቴ፤ ዓኣፓ ዬኤፖ ሃሻንዳጉዲ ዚቲ ጌይፖቴ።
19 ዹሞና ዎዶ ካፒ ዔቂ ዔቂ ዒላቲ ዒላቱዋቴ፤
ዒንሢም ማሊንታ ባኮ ቢያ ናንጊና ናንጋ ጎዳም ኬኤዙዋቴ፤
ካታሞ ሳዛ ዎላ ካኣማ ጎይፆይዳ ናይዺ ላቢንቲ ሎኦማ ናኣቶ ሼምፓሢም
ናንጊና ናንጋ ጎዳ ሺኢቂ፥ ኩጮ ዒንሢኮ ሌካ ዔቂሱዋቴ።
20 ናንጊና ናንጋ ጎዳሢዮ! ሃዳራ ኑና ዛጌ!
ሃያኮ ቤርታ ሃያይዲ ኔኤኒ ዙሌ ዻዌ ዴሬ ዓኣኖ?
ላኣላ ፔኤኮ ሾይ ዲቼ ናኣቶ ሙዔንቴሞ!
ፆኦሲኮ ጌኤዦ ማኣሮይዳ ቄኤሶንታ
ፆኦሲ ማሊፆ ኬኤዛ ዓሶንታ ዎዺንቴንቴሞ!
21 ዼጌሢንታ ጋርቾንታ ዒማ ጎይፆ ዎዺንቲ ጎይፃ ኬኤሪንቴኔ፤
ዼጌ ዓቲንቆንታ ዉዱራሢንታ ሞርኮኮ ጬንቾ ዓራፓ ዎዺ ኩርሴኔ፤
ኔኤኒ ዻጋዼ ዓቦና ማኣሚቃይዶ ኔ ዔያቶ ሹኪሲሴኔ።
22 ቦንቾ ኬሊና ሙኡዚሮ ዔኤሎጉዲ ሞርኮ ቢያ ቤዛፓ ኔኤኒ ዔኤሌኔ፤
ኔኤኒ ዻጋዼ ዓቦና ፔቴታዖ ሼምፔና ቶሊ ዓቴ ዓሲ ባኣሴ፤