ሃሣ ዓይዲ ሄላንዳኣና ጌኤዞና ዒኖ ታኣኮ ዒንሢ ዱኡዛይ?

ቦርሲንቱዋዖ ታና ዒንሢ ቶኦቻኔ።

ዻቢንታ ሜታሳንዳሢ ታና ሌሊኬ።

ታኣኮ ሜቶይዳ ጌሊፃ፦

ታኣኒ ዻቤም ፆኦሲ ታጊዳ ዓጌያኬ ጌይ

ዬያ ባኮ ማርካ ማሂ ዔኪ ታና ዒንሢ ሞኦታኔ።

ቡኡዳሢ ሱዞይዳ ታና ኬኤሬሢ

ፆኦሲታሢ ዒንሢ ዔራንዳጉዲ ታ ኮዓኔ።

ታኣሲ ዋይዛ ዓሲ ታ ዴንቂባኣሴ፤

ዑኡዞ ታ ዼጊዲ ዒላቴቶዋ

ፒዜ ዎጌ ታ ዴንቂባኣሴ።

ታ ኬስካንዳ ጎይሢ ባኣሴ፤

ታ ዓኣዻ ጎይፆዋ ዹሚና ዒ ካንቄኔ።

ጋፒሲ ሾኦሌኔ፤

ታኣኮ ሃጊ ማዓ ዎዞ ፃጳፓ ቱጊንቲ ዶዓ

ሚሢጉዲ ዒ ማሄኔ።

ዓዳ ሞርኬጉዲ ታና ዒ ፓይዴኔ።

ዔያታ ታ ማኣሮኮ ዙሎ

ዋርዲ ዴዒ ታና ማንጌኔ።»

ታና ዔራ ዓሳ ቢያ ፃንጎ ማሂ ታና ዛጌኔ።

ታኣኮ ላጋኣ ታና ዋሌኔ።

ቢያ ታና ዋሌኔ፤

ታኣኮ ማዾ ማዻ ላኣላ ቢያ ሙፒ ዓሲ ማሂ ታና ፓይዴኔ፤

ሜሌ ፃንጎ ዓሲ ማሂ ታና ዛጌኔ።

‹ሃዳራ ታና ማኣዴቴራ› ጌይ ታ ዒዛ ሺኢቃዛታዖ

ዒ ታኣም ዔኤዑዋሴ።

ታኣኮ ጌርሲንሢያ ታና ሻኣኪንቴኔ።

ታና ዔያታ ዛጋ ዎዶናኣ ቦቦሃኔ።

ሚርጌና ታ ናሽካ ዓሳኣ

ታኣኮ ሞርኬ ማዒ ዔቄኔ።

ታኣኒ ጉቤና ጋፔዖ ዻካሮ ዓቴኔ።»

ዒንሢ ታኣም ዖዪ፥ ሚጪንቱዋቴ!

ዒንሢያ ሃሣ ታና ዓይጋ ዳውሳይ?

ሃያ ሄላንዳኣና ዒንሢ ታና ሜታሴሢ ጊዳኑዋይ?»

ማፃኣፔይዳኣ ፃኣፓ ዓሲ ጴዼቴ

ዎዚ ታና ዎዛሳንዳዖ ዓቴይ!

ዬያጉዲ ሹቺዳ ቆኦቂንቲ

ናንጊና ናንጋንዳጉዲ ጌሦናቴ ዎዚ ታና ዎዛሳንዳይ!

ጋፒንፆ ዎዶና ታና ዓውሳኒ

ሳዖይዳ ዒ ዔቃንዳሢ ታ ዔራኔ።

ዓሽካፓ ታ ዱማዺ

ፆኦሲ ዛጋንዳሢ ታ ዔራኔ።

ታ ዓኣፓ ዒዛ ዛጋንዳኔ፥ ሜሌቱዋሴ፤

ታኣኮ ዒና ዬኖ ኬሌሎ ሚርጌና ጶቂሣኔ።»

‹ኑ ዒዛ ዳውሶም› ዓይጎሮ ዒንሢ ጋዓይ?

ጬንቾ ዓፓራ ዒንሢ ዎዹዋጉዲ ዔሩዋቴ።

ፆኦሲ ዎጋ ዎጌ ዓኣሢያ ዔሩዋቴ።»

<- ዒዮቤ ማፃኣፖ 18ዒዮቤ ማፃኣፖ 20 ->