14
ቂኢጮ ሉማ
1 ናንጊና ናንጋ ጎዳ ሃጊ ሙካንዳ ሉማ ዛላ ሂዚ ታኣም ጌዔኔ፦
2 «ዪሁዳ ዖዪሢዳኬ፤
ካታማ ዒዞኮ ቢያ ሃይቢሮ ሳዛ ጋሽኪሢዳኬ፤
ዴራ ዒዞኮ ዖዬሢሮ ሳዖ ሲላላ ዴዒ ዬኤካኔ፤
ዬሩሳላሜያ ናንጊና ናንጋ ጎዳ ባንሢ ዒላቲሢዳኬ።
3 ዖርጎጮ ዓሳ ዋኣሢ ዴንቃኒ ፔኤኮ ማዻ ዓሶ ኮይሲሢ ዳካንዳኔ፤
ዬያሮ ዬይ ማዻ ዓሳ ዋኣፆ ዔቶ ዔቶ ቤዞ ዴንዳንዳኔ፤
ጋዓንቴ ፔቴታዖ ዔያታ ዋኣሢ ዴንቂንዱዋኣሢሮ ጉዞ ጉሪ ኬዲ ማኣሪ ሙካንዳኔ፤
ዎዛ ቲቂ፥ ካራ ዔያታ ባይዛንዳሢሮ
ዖዪ ፔኤኮ ቶኦኮ ዔያታ ዔኤቢና ካንቂ ዓኣቻንዳኔ።
4 ዒርዚ ባይቃንዳሢሮ ሳዓ ፃኣዺ፥ ፃሃንዳኔ፤
ጎሽኪ ዎርቃ ዓሳኣ ዎዛ ባይዚ
ዖዪሢና ፔኤኮ ቶኦኮ ዔኤቢና ካንቂ ዓኣቻንዳኔ።
5 ማኣቲ ጋዓባኣዚኮ ዜርሢ ባይቃንዳሢሮ
ሮኦቶ ሾሾዓዖ ናዖ ቦኦላ ሃሺ ፔ ጎጲ ባኣዚ ኮይሢ ዓኣዻንዳኔ።
6 ኪርሞሎ ዺባ ዋኣፆ ዼኤቦና ሜታዻንዳሢሮ
ጌሜሮ ቶኦኮ ቶኦኮ ኬስኪ ዉኡኮጉዲ ሆጊንቲ ሃንታንዳኔ፤
ሙዖንዶ ባኣዚ ዔያታ ዴንቂንዱዋኣሢሮ ዛጎ ባሺንታንዳኔ።
7 ታ ዴራ ታ ባንሢ ሂዚ ጌይ ዒላታንዳኔ፦
‹ዎዚ ኑኡኮ ዻቢንቶ ሚርጉማ ኑጊዳ ማርካዼያ ማዔቴያ
ናንጊና ናንጋ ጎዳሢዮ! ኔና ኑ ቦንቻንዳጉዲ ኑና ማኣዴ፤
ኔጊዳፓ ኑ ሃኬኔ፤ ኔና ኑ ዖዪሴኔ።
8 ዒስራዔኤሌ ዓሳ ዓውሳንዳኔ ጌይ ጉሙርቃሢ ኔና ሌሊኬ፤
ካራ ኑም ባይቃኣና ካሮ ጌሣሢ ኔናኬ፤
ሂዳዖ ኔኤኒ ኑኡኮ ሳዖይዳ ሾኦቺ፤
ጊንሣ ሃሣ ፔቴ ኬሊ ዎርቃዖ ዴዴንዳያ
ጎይሢ ዓሲ ማዔሢ ዓይጎሮዳዖ?
9 ዶዲ ፖኦሊሴታዖ ካራ ባይዜያ፥ ሃሣ ሜሌ ዓሲ ማኣዳኒ
ዳንዳዒባኣ ፖኦሊሴጉዲ ኔ ዓይጋ ማዓይ?
ናንጊና ናንጋ ጎዳሢዮ! ኔኤኒ ኑ ባኣካ ዓኣኔ፤
ኔ ሱንፆና ኔና ኑ ዔኤላኔ፤
ሃዳራ ኑና ኬኤሪፖ።› »
10 ናንጊና ናንጋ ጎዳ ሃያ ዴሮ ዛሎ ሂዚ ጋዓኔ፦ «ታጊዳፓ ዔያታ ሃኪ ዓኣዻኒ ናሽካኔ፤ ፔና ዔያታ ቃዚ ቆላያቱዋሴ፤ ዬያሮ ታና ዔያቶ ባካ ዎዛሱዋሴ፤ ዔያታ ማዼ ዻቢንቶ ቢያ ማሊ ጶቂሢ ጶቂሢ ዔያቶ ጎሞ ዛሎሮ ታ ዔያቶይዳ ሜቶ ዓጋንዳኔ።»
11 ናንጊና ናንጋ ጎዳ ታኣም፦ «ሃያ ዴሮም ኮሺ ባኣዚ ማዺንታንዳጉዲ ሺኢቂፖ፤ 12 ዔያታ ሙኡዚ ሃሺ ሺኢቄቴያ ታ ዔያቶም ዋይዛዓኬ፤ ሚቺ ዒንጎ ዒንጊሢታቴያ ሃኣኮ ዒንጊፆዋ ዔያታ ታኣም ዒንጌቴታዖ ዔያቶ ባካ ታና ዎዛሳዓኬ፤ ታ ዔያቶ ዖልዚና ናይዚና፤ ሃሣ ፑርታ ዶርዖና ኩርሲሳንዳኔ» ጌይ ኬኤዜኔ።
13 ታኣኒ ዒማና፦ «ናንጊና ናንጋ ጎዳ ማዔ ቢያ ባኮ ማዤ ጎዳሢዮ! ኔ ማሊፆ ኬኤዛኔ ጋዓ ሜሌ ዓሳ ‹ዖልዚንታ ናይዚንታ ሙካዓኬ› ጌይ ጌይ ዴሮም ኬኤዛኔ፤ ዔያታ ‹ኑኡኮ ሳዖይዳ ባይቁዋዖ ዴዴዓ ኮሹሞ ሌሊ ማዓንዳሢ ኔኤኒ ኬኤዜኔ› ጋዓኔ» ጌኤኔ።
14 ናንጊና ናንጋ ጎዳ ሂዚ ጌይ ማሄኔ፦ «ዬያታ ታ ማሊፆ ኬኤዛኔ ጋዓ ዓሳ ታ ሱንፆና ሉኡዙሞ ባኣዚ ኬኤዚሢ ዓርቄኔ፤ ታ ዔያቶ ዳኪባኣሴ፤ ታ ዔያቶ ዓይሤ ባኣዚያ ባኣሴ፤ ፔቴ ባኣዚታዎ ታ ዔያቶም ኬኤዚባኣሴ፤ ፆኦሲ ፔጋሲ ዻዌም ኑ ዴንቄኔ ዔያታ ጋዓ ባካ ቢያ ታጊዳፓ ታ ዻዌያቱዋሴ፤ ዔያታ ሎንሣ ሎንሣ ቢያ ሉኡዙሞ ባኣዚ፥ ፔ ዦዋቶ፥ ሜሌ ካኣሽኮ ካኣዦፓ ዔያታ ዔኬያና ፔ ማሊሢፓ ኬሲ ኬኤዛያ ጉሪ ባኣዚኬ። 15 ታኣኒ ዔያቶ ዳኩዋንቴ ፔኤሮ፦ ‹ኑ ሳዖይዳ ናይዚታቴያ ዖልዚ ሙካዓኬ› ጌይ ጌይ ታ ሱንፆና ሎንሦ ኬኤዛ ዬኖ ዓሶ ታኣኒ፥ ናንጊና ናንጋ ጎዳ ዖልዚና፤ ሃሣ ናይዚና ዎዺ ኩርሲሳንዳኔ። 16 ዬይ ሎንሣ ኬኤዚንቴ ዴራኣ ቢያ ናይዚና፥ ሃሣ ዖልዚና ኩዳንዳኔ፤ ዔያቶኮ ሌዛ ቢያ ዬሩሳላሜ ካታሞይዳ ጎይፃ ጎይፃ ኬኤሪንቲ ዓታንዳኔ፤ ዔያቶ ዱኡካንዳ ዓሲ ጴዻዓኬ፤ ዬይ ዔያቶኮ ላኣሎይዳ፥ ዓቲንቆ ናኣቶይዳ፤ ሃሣ ዉዱሮ ናኣቶይዳኣ ዓቱዋዖ ቢያሢዳ ማዺንቲ ኩማንዳኔ። ዔያታ ማዼ ዻቢንቶጉዴያ ኮይሳ ሜቶ ታ ዔያቶይዳ ዓጋንዳኔ።»
17 ዬኖ ዛሎ ዴሮም ታኣኒ ሂዚ ጌይ ኬኤዛንዳጉዲ
ናንጊና ናንጋ ጎዳ ታና ዓይሤኔ፦
«ዴራ ታኣኮ ፑርታ ጎይሢ ሜቂ ኪፃዼኔ፤ ጋፒ ማኣሳኔኔ፤
ዬያሮ ዓኣፓፓ ታኣኮ ሮኦሮንታ ዋንቶንታ ቢያ ዓቢሢ ዎታኔ፤
ሃሺሢባኣያ ታኣኒ ዬኤካኔ።
18 ካታማፓ ታኣኒ ኬስካዖ ዖልዚና ሃይቄ ዓሲ ሌሲ ዴንቃኔ፤
ካታሞ ጊንሣ ታ ጌላኣና ናይዚና ሃይቃኒ ሳዛ ጋሽካ ዓሲ ታኣም ጴዻኔ፤
ታ ማሊፆ ኬኤዛ ዓሶንታ ቄኤሶንታ ፔ ሜቶሮ ሌሊ ጳሽካኔ፤
ዔያታ ዎካ ዓኣዻቴያ ዔሩዋሴ።»
ዴራ ፆኦሲ ቃይሼ ቃይዦ
19 ናንጊና ናንጋ ጎዳሢዮ! ዪሁዳ ጋፒ ኔኤኒ ኬኤራኒዳ?
ፂዮኔ ዴሮዋ ዒፃዖ ኔ ጋጋፒያ?
ዻቃኒ ኑ ዳንዳዑዋ ጎይሢ
ሃያይዲ ኑና ኔ ማኣሳንሤሢ ዓይጎሮዳዖ?
ኮሹሞ ኑ ዴንቃንዳኔ ጌይ ኑ ሃጋኣ ዎዛ ጌሤኔ፥
ጋዓንቴ ፔቴታዖ ኮሺ ባኣዚ ኑም ጴዺባኣሴ፤
ኑና ፓሣንዳ ባኣዚ ኑ ዴንቃንዳኔ ጌይ ሃጋኣ ዎዛ ኑ ጌሤኔ፥
ጋዓንቴ ሂርጊሻ ሜታ ኑጊዳ ዺቢ ዺቢ ዓኣዼኔ።
20 ናንጊና ናንጋ ጎዳሢዮ! ኑኡኮ ዻቢንቶ ኑ ዔሬኔ፤
ኑ ዓዶንሢ ማዼ ጎማኣ ኑኡም ዔርቴኔ፤
ጎኔና ኔ ቤርታ ጎሜ ኑ ማዼኔ።
21 ኔ ኑና ጉሙርሴ ቃኣሎ ኔኤኮ ቢያ ማሊ ጶቂሢጋፓ ኑና ቦሂ ሃሺፖ፤
ኔኤኮ ዼኤፑማ ፔጋዺ ዔርታ፥ ኔኤኒ ቦንቺንቲ ዴዓ ካኣቱሞ ዖይታ ጌሢንታ ዬሩሳላሜ ሞኦሪሲፖ፤
ኑኡና ዎላ ኔ ሳላዺ ጫኣቄ ጫኣቁሞ ማሊ ጶቂሤ።
22 ሜሌ ዴሮ ፆኦዞ ባኣካፓ
ፔቴ ፆኦሲታዖ ዒርዚ ዋርቂሳኒ ዳንዳዑዋሴ፤
ጫሪንጫኣ ፔ ሼኔና ዒርዚ ፆዺሡዋሴ፤
ናንጊና ናንጋ ጎዳ ማዔ ኑ ፆኦዛሢዮ!
ዬያ ቢያ ማዻሢ ኔናታሢሮ
