1 ናንጊና ናንጋ ጎዳኮ ኪኢታንቻሢ ጌልጌላይዳፓ ቦኪሜ ዴንዲ ዒስራዔኤሌ ዓሶም፦ «ታ ዒንሢ ጊብፄ ዓጮይዳፓ ኬሲ ዒንሢኮ ቤርታኣ ዓዶንሢም ዒንጋኒ ጫኣቄ ዓጬሎ ዔኪ ሙኬኔ፤ ዒማና ታ ዒንሢም፦ ‹ዒንሢና ዎላ ታ ጫኣቄ ጫኣቁሞ ሃሻዓኬ፤ 2 ዒንሢ ሃኖ ዓጮይዳ ናንጋ ዴሮና ዎላ ዓይጎ ባኣዚያ ማዖም ጫኣቂፖቴ፤ ዔያቶ ፆኦዞም ዔያታ ዒንጎ ባኮ ዒንጋ ቤዞ ዶይሲ ባባይዙዋቴ› ጌዔኔ፤ ዒንሢ ጋዓንቴ ታኣም ዓይሢንቲባኣሴ፤ ዬያ ዒንሢ ዓይጋ ማዼይ? ኬሲ. ማፃ 34፡12-13፤ ላሚ. ዎማ 7፡2-5። 3 ዬያሮ ሃሢ ዒንሢኮ ቤርታ ዓኣ ዴሮ ዳውሲ ታኣኒ ኬሲንዱዋሢ ታ ዒንሢም ኬኤዛኣኬ፤ ዔያታ ዒንሢኮ ሜቶ ማዓንዳኔ፤ ሃሣ ዔያታ ካኣሽካ፥ ሜሌ ፆኦዛ ዒንሢኮ ፒሮ ማዓንዳኔ» ጌዔኔ። 4 ናንጊና ናንጋ ጎዳኮ ኪኢታንቻሢ ዬያ ኬኤዛዛ ዒስራዔኤሌ ዴራ ፔኤኮ ዑኡዞ ዼጊዲ ዬኤኬኔ፤ 5 ዬያሮ ዬኖ ቤዜሎኮ ሱንፃ «ዬኤካ ዓሶ» ጌይንቴኔ፤ ዒኢካ ዔያታ ናንጊና ናንጋ ጎዳም ዒንጎ ባኣዚ ዒንጌኔ።

6 ዒስራዔኤሌ ዓሳ ፔ ቤዞ ቤዞ ዴንዳንዳጉዲ ዒያሱ ዓሶ ሳራሢ ዳካዛ ዓሳ ፔኤም ዒንጎና ዴኖ ዴኖ ዔካኒ ዴንዴኔ። 7 ዒያሱ ናንጌ ዎዶይዳ ቢያ፤ ሃሣ ዒዚ ሃይቄስካፓ ናንጌ ጋርቻ፤ ጌይፃ፦ ናንጊና ናንጋ ጎዳ ዒስራዔኤሌ ዓሶም ፔ ዎልቆና ማዼ ዲቃሣ ባኮ ቢያ ፔ ዓኣፖና ዛጌ፥ ዬና ዓሳ ናንጌ ዎዶይዳ ቢያ ዒስራዔኤሌ ዓሳ ናንጊና ናንጋ ጎዳ ካኣሽኪፆ ሃሺባኣሴ። 8 ናንጊና ናንጋ ጎዳኮ ዓይላሢ፥ ኔዊ ናኣዚ፥ ዒያሱ ፄኤታና ታጶ ሌዔናይዳ ሃይቄኔ፤ 9 ዒዛ ዴኔ ማዔ ቤዞይዳ ዱኡቴኔ፤ ዬና ዒዚ ዱኡኪንቴ ቤዛ ጌሜራዻ ዔፕሬኤሜ ዓጮይዳ፥ ጋዓሼ ዹኮኮ ኬዶ ዛሎይዳ ዓኣ «ቲምናት ሴራሄ» ጌይንታያኬ። ዒያ. 19፡49-50። 10 ዬኖ ዎዶና ዓኣ ዓሳ ጉቤ ሃይቄኔ፤ ናንጊና ናንጋ ጎዳንታ ዒዚ ዒስራዔኤሌ ዓሶም ማዼ ኮዦ ባኮዋ ዔሩዋ ሜሌ ዓሲ ዬካፓ ኬስኬኔ።

11 ዬካፓ ዒስራዔኤሌ ዓሳ ናንጊና ናንጋ ጎዳ ቤርታ ፑርታ ማዾ ማዼኔ፤ ባዓኣሌ ጌይንታ ሜሌ ፆኦሲያ ዔያታ ካኣሽኬኔ፤ 12 ጊብፄ ዓጫፓ ዔያቶ ኬሴ፥ ዔያቶኮ ቤርታኣ ዓዶንሢኮ ፆኦዛሢ፥ ናንጊና ናንጋ ጎዳም ማዺፆ ዔያታ ሃሺ ዔያቶ ኮይላ ዓኣ ዴራ ካኣሽካ ጎኔቱዋ ፆኦዞ ካኣሽኪ ዬያም ማዺሢ ዓርቄኔ፤ ዬያ ፆኦዞም ዚጊፆና ናንጊና ናንጋ ጎዳ ዔያታ ዻጋሴኔ። 13 ናንጊና ናንጋ ጎዳ ካኣሽኪፆ ሃሺ፦ «ባዓኣሌና ዓስታሮቴና» ጌይንታ ሜሌ ፆኦዞ ዔያታ ካኣሽኬኔ፤ 14 ዬያሮ ናንጊና ናንጋ ጎዳ ዒስራዔኤሌ ዓሶ ዑፃ ሚርጌና ዻጋዺ ዔያቶ ቡራንዳ ሱላም ዓኣሢ ዒንጌኔ፤ ሃሣ ዔያቶ ኮይላ ዓኣ ሞርካ ዔያቶ ባሻንዳጉዲ ዒ ማሄኔ፤ ያዺ ማዔሢሮ ዒስራዔኤሌ ዓሳ ፔ ሞርኮ ቃዛኒ ዳንዳዒባኣሴ። 15 ዔያታ ዖሎሮ ኬስካኣና ናንጊና ናንጋ ጎዳ ቤርታ ጫኣቂ ኬኤዜ ጎይፆና ዔያቶ ዒ ዖላያ ማዔኔ፤ ዬያሮ ዔያታ ሚርጌ ሜቶይዳ ኬዴኔ።

16 ያዺ ማዔሢኮ ጊንፃ ዬያ ዖሊ ሜታሳ ዓሶይዳፓ ዔያቶ ዓውሳንዳ ሱኡጌ ናንጊና ናንጋ ጎዳ ዔያቶም ኬሴኔ። 17 ጋዓንቴ ዒስራዔኤሌ ዓሳ ዔያቶኮ ሱኡጎም ዓይሢንቱዋያ ማዔኔ፤ ናንጊና ናንጋ ጎዳም ዔያታ ጉሙርቂንቲ ናንጋ ናንጎ ሃሺ ሜሌ ፆኦዞ ካኣሽኬኔ፤ ዔያቶኮ ዓዶንሢ ናንጊና ናንጋ ጎዳኮ ዓይሢፆ ቦንቺ ናንጌኔ፤ ዔያታ ጋዓንቴ ዬያይዲባኣሴ። 18 ናንጊና ናንጋ ጎዳ ሱኡጌ ኬሳ ዎዶና ዎዶና ዬያ ዓሢና ዎላ ማዓኔ፤ ዔያቶኮ ሞርካ ዔያቶ ዳውሳኣና ሃሣ ዔያቶ ሜታሳ ዎዶና ዔያታ ናንጊና ናንጋ ጎዳ ባንሢ ዒላታዛ ዒዚ ዔያቶ ሚጪንታሢሮ ዬይ ሱኡጋሢ ናንጋ ዎዶ ቢያይዳ ዔያቶኮ ሞርኮ ኩጫፓ ናንጊና ናንጋ ጎዳ ዔያቶ ዓውሳኔ። 19 ጋዓንቴ ዬይ ሱኡጋሢ ሃይቃዛ ዓሳ ጊንሣ ሜሌ ፆኦዞ ካኣሽኪ፥ ዬያም ዚጊ ዔያቶኮ ዓዶንሢፓ ባሼ ጎሜ ማዻያ ማዓኔ፤ ዔያታ ማዻ ፑርቶ ማዾንታ ዋይዚ ዒፂ ጌኤታዾ ባኮዋ ሃሹዋያ ማዔኔ። 20 ዬያሮ ናንጊና ናንጋ ጎዳ ዒስራዔኤሌ ዓሶ ዑፆይዳ ዻጋዺ፦ «ሃይ ዴራ ዔያቶኮ ዓዶንሢና ዎላ ታ ጫኣቄ ጫኣቁሞ ሃሼኔ፤ ታ ዓይሤ ባኮዋ ካፒ ኩንሢባኣሴ። 21 ዬያሮ ዒያሱ ሃይቃኣና ዓጬሎይዳ ዓኣ፥ ዔያቶኮ ሞርኮ ማዔ ዴሮፓ ፔቴታዖ ዔያቶ ቤርታፓ ታ ዳውሲ ኬሳዓኬ። 22 ሃኣታ ዒስራዔኤሌ ዓሳ ዔያቶኮ ቤርታኣ ዓዶንሢጉዲ ታና ካኣሽኪ ታኣም ዓይሢንታቴያ ዓይሢንቱዋቴያ ታ ዔራንዳሢ ዬያ ዴሮ ታኣኮ ዓንጋሞ ማሂሢናኬ» ጌዔኔ። 23 ዬያሮ ዬያ ዴሮ ናንጊና ናንጋ ጎዳ ዒኢካ ዴዴይሤኔ፤ ዒያሱም ዔያቶ ዓኣሢ ዒንጊ ኔጉዋዖ ኬሲ ዳኪ ባይዚባኣሴ።

<- ሱኡጎ ማፃኣፖ 1ሱኡጎ ማፃኣፖ 3 ->