ፖዓ ኔኤኮ ሙኬሢሮ ዔቂጋፓ ፖዒሤ፤

ናንጊና ናንጋ ጎዳኮ ቦንቻ ኔ ጊዳ ፖዓኔ።

ጋዓንቴ ናንጊና ናንጋ ጎዳ ኔ ጊዳ ፖዓንዳኔ፤

ዒዛኮ ቦንቻ ኔኤም ፔጋዺ ጴዻንዳኔ።

ካኣታኣ ኔኤኮ ፆርቂ ኬስኬ ዓቦ ባንሢ ሙካንዳኔ።

ቢያሢ ቡኪንቲ ኔ ባንሢ ሙካንዳኔ፤

ዓቲንቆ ናኣታ ኔኤኮ ሃኬ ዓጪዳፓ ዬዓንዳኔ፤

ዉዱሮ ናኣታኣ ኔኤኮ ሾኦጴይዳ ቃልሲንቲ ሙካንዳኔ።

ዼኤፖ ባዞይዳፓ ጴዻ ዓንጆና

ዴሮይዳፓ ጴዻንዳ ቆላኣ ኔኤሮ ማዓንዳሢሮ

ዒናፓ ማዔ ሚርጌ ዎዛ ኔኤኒ ዎዛዻንዳኔ።

ሙካ ጋኣላሢ ሳዖ ኔኤኮ ኩማንዳኔ፤

ዎርቄንታ ዑንጆንታ ዔኪ ሳኣባ ዓጮይዳፓ

ናንጊና ናንጋ ጎዳ ዼጊ ጌዔ ዑኡሲና ጋላታንዳኔ።

ኔባዮቴ ዓጮይዳ ዓኣ ዓዶ ማራታ ሚቺ ዒንጎ ዒንጊፆም ማዓንዳኔ፤

ዒንጊፆ ታኣም ሺኢሾ ቤዞይዳ ታና ዎዛሳ ዒንጊሢ ማዓንዳኔ፤

ቦንቺንቴያ ማዔ ታኣም ዱማዼ ማኣሮ ታኣኒ ሚዛጲሳንዳኔ።

ሻኣሬያ ሴካ ሃንጋ ሃንታሢጉዲ

ዬንሢ ሃንታዞንሢ ዖናንሢዳይ?

ናንጊና ናንጋ ጎዳ ማዔ ኔ ፆኦዛሢ ሱንፆና

ዒስራዔኤሌኮ ዱማዼሢ ቦንቻኒ

ኔኤኮ ናኣቶ ሃኬ ዓጮይዳፓ

ዔያቶኮ ቢሮና ዎርቆና ዎላ ዔኪ ሙካኒ

ዋኣፆ ሳዞ ዓጮንታ ቴርሴሴኮ ዋኣፆ ካኣሚሎንታ

ቤርታዺ ጊኢጊ ካፓኔ።

ሃሢ ጋዓንቴ ታኣኒ ኔኤም ሚጪንታንዳኔ፤

ሜሌ ዓጮ ዴራ ኬኤሎ ዲፆ ኔኤኮ ጊንሣ ኮሻንዳኔ፤

ዔያቶኮ ካኣታኣ ኔኤም ማዻንዳኔ።

ሮኦሮታቴያ ዋኣንቶ ፔቴታዖ ዎዺንታዓኬ፤

ዬይ ያዺ ማዓንዳሢ ዴሮኮ ቆሎንታ

ዲዒንቴ ካኣቶንታ ዔኪ ዬዒ ጌልዛኒኬ። ዮሃ. ፆፔዻ 21፡25-26።

ሊባኖኦሴ ዓጮኮ ቦንቾ ማዔ ዚቢቆንታ

ዴኤሎይዳ ዓኣ ዓስታ ጌይንታ ሚፆንታ ዚቢቆንታ

ዔያታ ኔኤም ዔኪ ሙካንዳኔ፤

ታኣኒያ ታኣኮ ቶካ ሄርቃ ቤዞ ቦንቻንዳኔ።

ቦንቾ ዔኤሊሢያ ኔና ዔኤላንዳኔ፤

ኔና ቶኦቼ ዓሳ ቢያ ኔኤኮ ቶኮ ዴማ ጉምዓታንዳኔ፤

ዔያታ ኔና፦ «ዒስራዔኤሌኮ ዱማዼ፥ ናንጊና ናንጋ ጎዳ ካታሞ ፂዮኔ!» ጋዓንዳኔ። ዮሃ. ፆፔዻ 3፡9።

ዓይጎ ዓሲያ ኔጊዴና ዓኣዹዋያ ኔ ማዔያታቴያ

ናንጊና ሄርሺንቶያና ሙካ ሾይንቶኮ ቢያ

ዎዛ ቤሲ ታ ኔና ማሃንዳኔ።

ኔ ናኣታ ዴሮንታ ካኣቶንታኮ ቆሎ ዔኪ

ዔያቶሮ ማሃንዳኔ፤

ኔኤኒያ ታኣኒ ናንጊና ናንጋ ጎዳ፥ ኔና ዓውሳሢታሢ

ያይቆኦቤኮዋ ዼኤፖ ፆኦዛሢ ማዔሢ ዔራንዳኔ።»

ዓንጎ ቤዞ ቢራ ዓንጊ

ሚፆ ቤዞ ሞኦና ዓንጊ

ሹጮ ቤዞ ዓንጊ ዔኪ ሙካንዳኔ።

ኮሹሞ ዓዳ ኔና ዎይሣ ቢቲ ማሂ

ፂሉሞ ዓዳ ኔኤኮ ሱኡጌ ማሂ ታ ጌሣንዳኔ።

ኔኤኮ ዛጶይዳ ባይሲንታ ሃንጎ ሻሂንቲሢ ዋይዚንታዓኬ፤

ጋዓንቴ ኬኤሎ ዲሮ ኔኤኮ ኔ ‹ዻቂንታ›

ኬኤሎ ዲሮ ካሮዋ ‹ጋላታ› ጌይ ኔ ሱንሢ ጌሣንዳኔ።»

ዋኣንቶ ዓጊኒ ኔኤም ፖዓዓኬ፤

ጋዓንቴ ናንጊና ናንጋ ጎዳ ኔኤኮ ፖዓሢ

ፆኦዛሢያ ኔኤኮ ቦንቾ ማዓንዳኔ። ዮሃ. ፆፔዻ 21፡23፤ 22፡5።

ዓባ ኔኤኮ ፔቴታዖ ጌላዓኬ፥ ዓጊናኣ ፖዒፆ ሃሻዓኬ፤

ኔኤኮ ሜታሢ ዎዳ ጋፓንዳኔ።

ዓጬሎዋ ናኣናና ዔያቶሮ ማሂ ዻካላንዳኔ፤

ታና ዔያታ ጋላታንዳጉዲ ታኣኒ ዔያቶ ማዤኔ፤

ታኣኒ ዔያቶ ባቃልሲ ቱኬያኬ።

ቢያፓ ጋፒንሢ ላኣፓ ማዔዞንሢ ዎልቄና ዓኣ ካኣቶ ማዓንዳኔ፤

ታኣኒ ናንጊና ናንጋ ጎዳ ዬይ ዎዳ ሄላዛ

ዬያ ሩኡሪና ማዺ ኩንሣንዳኔ» ጌዔኔ።

<- ዒሲያሴ ማፃኣፖ 59ዒሲያሴ ማፃኣፖ 61 ->