46
ባብሎኔ ዓጮይዳ ካኣሽኪንታ ሜሌ ፆኦዞ
1 «ቤኤሌና ኔኤቦ ጌይንታ ፆኦዛ ዻውሲንቴኔ፤
ዬይ ፆኦዛ ቆልሞና ጫኣኒንቴኔ፤
ዒንሢ ኬዲ ሃንታ ማላታ ላቤ ቆልሞም ዴኤፃያኬ።
2 ጫኣኖ ጫኣና ቆልማ ዴኤሡማፓ ዔቄያና ጉኡሺና ጉምዓቴኔ፤
ዬያ ጫኣኒንቴ ባኮ ዓውሳኒ ዳንዳዒባኣሴ፤
ዬይ ፆኦዛ ጋዓንቴ ፔናታዖ ዓውሳኒ ዳንዳዒባኣሢሮ ዲዒንቲ ዔውቴኔ።»
3 «ዒንዶ ጎጳፓ ዓርቂ ታኣኒ ካፔ፥ ሾይንቶይዳፓ ዓርቃዖ ታ ማኣዴ ያይቆኦቤ ናኣቶ ማዔ ዒስራዔኤሌኮ ፒኢጫዺ ዓቴዞንሦ! ዋይዙዋቴ።
4 ዒንሢ ጋርቺ ቡኡቃንዳያ ሄላንዳኣና ካፓሢ ታናኬ፤
ታኣኒ ዒንሢ ማዤኔ፥ ታ ዒንሢ ኬዳንዳኔ፤
ታ ማኣዳንዳኔ፥ ፑርታ ባኣዚዳፓኣ ታ ካፓንዳኔ።»
5 «ዒንሢ ታና ዖኦና ዎላ ቤኤዛንዳይ?
ዖኦና ዎላ ዒንሢ ታና ሄካሳንዳይ?
ዖና ማሊሲ ዖኦና ዎላ ታና ዒንሢ ቤኤዛንዳይ?
6 ፔቴ ፔቴ ዓሳ ቡራሾ ፔኤሲ ቡሊ
ዔያቶኮ ዒና ጌዔሢጉዴያ ዎርቄ ኬሳኔ፤
ፔኤኮ ቢሮዋ ዴኤሡሞ ዔሮ ባኮና ዛጋኔ፤
ፆኦዞ ማሂ ዔያቶም ኮሻንዳጉዲ ዓንጎ ሼኤሻሢም ጪጋኒ ጌስታኔ፤
ዬይ ኮሺንቴሢዳፓ ዚጊ ዚጊ ዔያታ ካኣሽካኔ።
7 ዬያ ዔያታ ዔኪ ፔኤኮ ጌኤታ ኬዳኔ፤
ፔቴ ቤስካ ጌሦዛ ዒማካ ዔቂ ዓታኔ፤
ዬይ ዓኣ ቤዛፓ ዓጊፃኒ ዳንዳዑዋሴ፤
ዓይጎ ዓሲ ዬያ ሺኢቄታቴያ ማሂ ኬኤዙዋሴ፤
ዓይጎ ዓሲያ ባይሲንታፓ ዓውሳኒ ዬይ ዳንዳዑዋሴ።»
8 «ዒንሢ ዻቢንታ ዓሳ! ዬያ ማሊ ዒና ዓርቁዋቴ፤
ዒንሢኮ ዒናፓ ባይዚፖቴ።
9 ታኣኒ ሌሊ ፆኦሲ ማዔሢ
ታጊዳፓ ዓቴም ሜሌ ፆኦሲ ባኣሢ
ዒንሢ ዔሩዋቴ፤
ሚናኣ ዎዶና ማዺንቴ ቤርታኣ ባኮ ማሊ ጶቂሡዋቴ፤
ታኣኒ ፆኦሲኬ፤ ታጉዴያ ሜሌ ባኣሴ።
10 ጋፒንፃ ማዓንዳ ባኮ ቤርታሲ ታኣኒ ኬኤዜያኬ፤
ሴካ ቤርቲም ዓይጌ ማዓንዳቴያ ዓይፃ ታኣኒ ዔርዜያኬ፤
ማሊፃ ታኣኮ ዶዴያ ማዓንዳኔ፤ ታ ሼኔ ጌዔ ባኣዚያ ማዻንዳኔ።
11 ዓባ ኬስካ ባንፃፓ ኪላንቄጉዲ
ዓርቂ ዔካያ ማዔ ዓሲ
ታኣኒ ዔኤላንዳኔ፤
ዒዚያ ታኣኮ ማሊፆ ኩንሣኒ ሃኬ ዓጪዳፓ ሙካያኬ፤
ታኣኒ ኬኤዜ ባኮ ማዻንዳኔ፤ ማሊ ቱኬ ባኮዋ ማዺ ኩንሣንዳኔ።»
12 «ዒንሢ ፂሉሞፓ ሃኬ
ባቃኖ ዴይሤ ዓሳ ዋይዙዋቴ።
13 ታኣኮ ፂሉሞ ታ ዔኪ ሙኪ ሙኪኬ፤
ዬይ ሃካያቱዋሴ፤
ዓውሲፃ ታኣኮ ኔጋዓኬ፤