45
ናንጊና ናንጋ ጎዳ ቂኢሮሴ ካኣቱሞም ዶኦሜሢ
1 ዴራ ዒዛ ቢታንቶ ዴማ ማዒ ዎርቃንዳጉዲ
ካኣቶ ቢታንታፓ ኬይሳንዳጉዲ
ካታሞኮዋ ጌሎ ዲሮ ካሮ ዒዛም ቡላኒ
ሚዛቆ ኩጮ ዓርቂ ዶኦሚ ዒ ካኣታሤ ካኣቲ ቂኢሮሴም
ናንጊና ናንጋ ጎዳ ሂዚ ጋዓኔ፦
2 «ታኣኒ ኔኤኮ ቤርታ ዓኣዻንዳኔ፤
ዹኮ ታኣኒ ኔኤም ሂርኪዲ ባኣሳንዳኔ፤
ሞኦኖ ዓንጎና ኮሾና ካሮንታ ዓንጎ ጋጋርዞዋ ታኣኒ ሜንሣንዳኔ።
3 ጴዹዋ ዓኣሺንቴ ቤዛ ቡኪንቴ ቆሎ ታ ኔኤም ዒንጋንዳኔ፤
ዬያሮ ኔኤኮ ሱንፆና ኔና ዔኤላ ዒስራዔኤሌ ፆኦዛሢ
ናንጊና ናንጋ ጎዳ ታናታሢ ኔኤኒ ዔራንዳኔ።
4 ታ ዓይላሢ ያይቆኦቤሮ ጌዒ
ታኣኒ ዶኦሬ ዒስራዔኤሌሮ ጌዒ
ኔኤኒ ታና ዔሩዋያታቴያ ኔ ሱንፆና ታ ኔና ዔኤሌኔ፤
ቦንቺንቲ ሱንሢያ ታ ኔኤም ጌሤኔ።
5 ታኣኒ ናንጊና ናንጋ ጎዳኬ፤ ታ ጊዳፓ ዓታዛ ሜሌ ፆኦሲ ባኣሴ፤
ኔኤኒ ታና ዔሩዋያ ማዔያታቴያ ዶዱሞ ታ ኔኤም ዒንጋንዳኔ።
6 ዬያ ታኣኒ ማዻሢ ዓጫ ጉቤ
ታኣኒ ሌሊ ናንጊና ናንጋ ጎዳ ማዔሢ
ታ ጊዳፓዓቴም ሜሌ ፆኦሲያ ባኣሢ ዔራንዳጉዲኬ።
7 ፖዖ ታኣኒ ማዤኔ፥ ዹሞዋ ታ ማዤኔ፤
ዓንጆንታ ባይሲንታንታ ታ ዔኪ ሙካኔ፤
ታኣኒ ናንጊና ናንጋ ጎዳ ዬያ ቢያ ማዻኔ።
8 ዒንሢ ሎ ዓኣ ጫሪንጫ! ፂሉሞ ዒርዚጉዲ ሎኦፓ ዋርቁዋቴ፤
ዒንሢ ሻኣራ ሊካ ፆዺሡዋቴ፤
ሳዔላ ቡሊንቶንጎ፥ ኮሹሞዋ ኬስኮንጎ፤
ታኣኒ ናንጊና ናንጋ ጎዳ ዬያ ማዤያታሢሮ
ፂሉሞዋ ዬያና ዎላ ዲጮንጎ።»
ናንጊና ናንጋ ጎዳኮ ዼኤፖ ዎልቆ
9 ማዤሢና ዎላ ማርማሢም ባዴዔ!
ዒዚ ዓጪና ማዢንቴ ሜሆይዳፓ ፔቴሢኬ፤
ፔቴ ዓጪና ማዦና ሜሄ ማዤሢ ኮራ፦
«ሃይ ኔኤኒ ዎዎዳይ?
ኩጫ ዓርቃ ኬሌጫ ዎካዳይ?» ጌይ ዖኦጫኒ ዳንዳዓ? ሮሜ 9፡20።
10 ናይ ሾዔ ዓዶ ኮራ፦
«ኔኤኒ ታና ዓይጋ ሾዔይ?»
ፔኤኮ ዒንዶ ኮራኣ «ዓይጋ ኔ ታና ሃያይዲ ሾዔይ?» ጋዓሢም ባዴዔ!
11 ቢያ ባኮ ማዤ ናንጊና ናንጋ ጎዳሢ
ዒስራዔኤሌኮ ዱማዼ ፆኦዛሢ
ሃጊ ማዓንዳ ባኮ ዛሎ ሂዚ ጋዓኔ፦
«ታኣኮ ናኣቶ ዛሎ ዒንሢ ታና ዖኦጫኒና
ታ ኩጫ ማዻሢኮ ታኣኒ ዓይጎ ማዻንዳያ ኮይሳያታቴያ
ዒንሢ ታና ዓይሣኒ ኮዓ?
12 ሳዖ ማዤሢንታ
ዓሲያ ማዢ ዒዞይዳ ናንጋንዳጉዲ ማሄሢ ታናኬ፤
ጫሪንጮ ታኣኮ ዎልቆና ዳሬሢ
ዒኢካ ዓኣ ማዢንቶዋ ዛጊ ዎይሣሢ ታናኬ።»
13 ቢያ ባኮ ዎይሣ ጎዳሢ ሂዚ ጋዓኔ፦
«ቂኢሮሴ ፂሉሞ ማዾ ማዻንዳጉዲ ታ ዔቂሴኔ፤
ጎይፆዋ ታ ዒዛም ጊኢጊሻንዳኔ፤
ታ ካታሜሎ ዬሩሳላሜ ጊንሣ ዒዚ ኮሻንዳኔ፤
ዳኪንቴ ቤዛ ዓኣ ታኣኮ ዴሮ ዓይላታፓ ዒዚ ኬሳንዳኔ፤
ዬያ ዒዚ ማዻንዳሢ ዖኦኒያ ሚኢሼ ጪጋንዳጉዲና
ማዼ ባኮ ዛሎዋ ዔኤቢ ዒዛም ማሃንዳጉዲቱዋሴ።»
14 ናንጊና ናንጋ ጎዳ ሂዚ ጋዓኔ፦
«ጊብፄ ዓጮ ቆሎና ዒቶጲያ ዓጮኮ ኮርሞ ባካ
ኔኤም ዓኣሢንቲ ዒንጊንታንዳኔ፤
ዔጳ ዖዶሲ ማዔ ሳኣባ ዓሳ
ካኒ ቢራታና ቱኡቲ ኔ ጊንፆ ሙካንዳኔ፤
ዔያታ ሂርኪ ጌዒ ዚጊያ፦ ‹ፆኦሲ ዓኣሢ ኔ ኮራ ሌሊኬ፤
ሜሌ ዓንካኣ ባኣሴ፥ ዒዛይዳፓ ዓታዛ ሜሌ ፆኦሲ ባኣሴ› ጋዓንዳኔ።»
15 ዓውሳ ዒስራዔኤሌ ፆኦዛሢዮ!
ኔ ማዻ ዓሲም ዔርቱዋያ ዓኣሺንቴያኬ።
16 ሜሌ ፆኦዞ ካኣሽካ ዓሳ ቢያ ቦርሲንታንዳኔ፤
ዻውሲንታንዳኔ፥ ቢያሢ ቶኦኪ ባይቃንዳኔ።
17 ዒንሢ ዒስራዔኤሌ ዴራ ጋዓንቴ
ናንጊና ናንጋ ጎዳፓ ጴዻ ናኣናና ናንጋ ዻቂንቶና ዻቃንዳኔ፤
ናንጊና ቦርሲንቲንታ ዻውሲንቲያ ፔቴታዖ ዒንሢ ሄላዓኬ።
18 ጫሪንጮ ማዤ፥ ናንጊና ናንጋ ጎዳሢ
ሳዖ ማዤሢንታ ዶዲሼሢ
ዓሲ ናንጋ ቤሲ ማዓንዳኣፓዓቴም
ኮሽኩዋያና ጉሪ ማዓንዳጉዲ ማዢባኣሢ
ናንጊና ናንጋ ጎዳ ሂዚ ጋዓኔ፦
«ታኣኒ ናንጊና ናንጋ ጎዳኬ፤ ታ ጊዳፓ ዓታዛ ሜሌ ባኣሴ።»
19 ዹሚ ማዔ ዓጪዳ ዓኣቺ ታኣኒ ኬኤዚባኣሴ፤
ያይቆኦቤ ናኣቶም «ጉሪ ታና ኮዑዋቴ» ታ ጌዒባኣሴ፤
ታኣኒ ናንጊና ናንጋ ጎዳ ፂሎ ማዔ ባኣዚና
ፒዜ ማዔ ባኣዚ ኬኤዛኔ።
20 «ዒንሢ ሜሌ ዓጮ ዳኪንቴ ቤዛፓ ፒኢጫዺ ዓቴ ዓሳ
ፔቱሞና ቡኪንቲ ሺኢኩዋቴ!
ኩቻ ማዢንቴ ሜሌ ፆኦዞ ኬዲ ሃንታዞንሢና
ዓውሳኒ ዳንዳዑዋ ፆኦዞ ሺኢቃዞንሢኮ ዔራቶ ባኣያኬ።
21 ሂንዳ ሃኒ ሺኢኪ ኬኤዞንጎ፤
ፔቴይዳ ቡኪ ዞርቶንጎ፤
ሚርጌ ዎዶኮ ቤርታ ሃያ ፔጋሲ ዻዌያና ኬኤዜይ ዖናዳይ?
ዬያ ፔጋሲ ዻዌሢንታ ኬኤዜሢ ታናቱዋዓዳ?
ታ ጊዳፓ ዓታዛ ሜሌ ዖኦኒያ ባኣሴ፤
ታ ጊዳፓ ዓታዛ ሜሌ ፆኦሲ ባኣሴ፤
ታኣኒ ፂሎ፥ ሃሣ ዓውሳ ፆኦሲኬ። »
22 «ታ ጊዳፓ ዓታዛ ሜሌ ፆኦሲ ባኣሢሮ
ዴንዲ ሳዖኮ ጋፖ ሄላንዳኣና ዓኣ ዓሳ ቢያ
ታ ባንሢ ማዒጋፓ ዻቁዋቴ።
23 ‹ጉኡሺ ቢያ ታ ቤርታ ጉምዓታንዳኔ፤
ዒንዲርሲ ቢያ ታ ሱንፆና ጫኣቃንዳኔ›
ጌዒ ታ ሱንፆ ጌፒ ታ ጫኣቄኔ፤
ጊንሢም ማዑዋ ቃኣላ ታ ዻንጋፓ ፂሉሞና ኬስኬኔ።» ሮሜ 14፡11፤ ፒልጲ. 2፡10-11።
24 «ፂሉሞና ዎልቄ ጴዻሢ ፆኦሲዳፓ ሌሊኬ
ጌዒ ታ ዛሎ ዔያታ ኬኤዛንዳኔ፤
ታና ዒፃ ዓሳ ቢያ ቦርሲንታንዳኔ፤
ታ ባንሢያ ዔያታ ሙካንዳኔ።
25 ጋዓንቴ ዒስራዔኤሌ ናኣታ ቢያ