ዒንሢ ማዤ ናንጊና ናንጋ ጎዳ ሂዚ ጋዓኔ፤

«ታኣኒ ዓውሴያ ማዔሢሮ ዒጊጪፖቴ፤

ዒንሢ ታኣሮኬ፤

ዒንሢኮ ሱንፆና ታኣኒ ዒንሢ ዔኤሌኔ።

ታኣኒ ዒንሢና ዎላ ማዓንዳኔ፤

ዬይ ዋኣፃ ዒንሢ ዔኤዻዓኬ፤

ታሞ ጊዴና ዒንሢ ዓኣዻ ዎዶና

ዒንሢ ሚቻዓኬ፥ ሌኤባኣ ዒንሢ ሼኤላዓኬ።

ዒስራዔኤሌኮ ዱማዼያ ማዔ፥ ዒንሢ ዼኤሻሢኬ፤

ዒንሢ ዓውሳኒ ጊብፄንታ ዒቶጲያንታ ሳኣባ ዓጮዋ ታ ዒንሢም ዒንጌኔ።

ታኣኒ ዒንሢ ናሽካሢሮ ዒንሢ ሼምፓሢ ዓውሳኒ

ሜሌ ዴሮንታ ካኣቶንታ ሼምፓሢ

ዖኦካ ማሂ ዒንሢ ቤዛ ታኣኒ ዎዼኔ።

ዓባ ኬስካ ባንፆና ጌላ ባንፆናፓ ዒንሢንታ ዒንሢኮ ናኣቶንታ

ኬዶ ባንፆና ዓኣ ዓጮ፦ ‹ዒንሢ ዔያቶ ሃሹዋቴ›

ዾኦሎ ባንፆ ዓጮዋ ‹ዒንሢ ዔያቶ ዓርቂፖቴ› ጌዒ ታ ዓይሣንዳኔ።

ታ ኩጮና ታኣኒ ኮሼዞንሢና ማዤ ዴሮ ‹ታኣም ሃኒ ባዑዋቴ› » ጋዓንዳኔ።

«ዓኣፒ ዓኣንቴ ዛጉዋ

ዋይዚ ዓኣንቴ ዋይዙዋ

ታ ዴሮ ዔኪ ኬሱዋቴ።

ዔያቶ ባኣካፓ ሃኖ ዎዶንታ ሚና ቤርታኣ ባኮ

ቤርታዺ ኬኤዜያና ፔጋሲ ዔርዜያ ዖናዳይ?

ፂላኒ ማርካ ዔያታ ዔኪ ሙኮንጎ፤

ዓሳኣ ዬያ ዋይዚ ጎኔኬ ጎዖንጎ።»

ታና ዒንሢ ጉሙርቃንዳጉዲ

ታኣኒ ዶኦሬ፥ ማርኮ ማዔ ዓይላ ዒንሢኬ፤

ጎኔና ታ ጊዳፓ ዓታዛ ሜሌ ፆኦሲ ባኣሴ፤

ሃያኮ ቤርታኣ ባኣሴ፤ ሴካ ቤርቲማኣ ናንጋዓኬ።»

ታ ጊዳፓ ሜሌ ዒንሢ ዓውሳንዳይ ባኣሴ።

ዒንሢ ዓውሴሢ ታናኬ፤

ሜሌ ፆኦዛፓ ፔቴይታዖ ዬያ ማዺባኣሴ፤

ዬያ ቢያ ዛሎ ዒንሢ ታኣኮ ማርኮኬ።

ታ ኩጫፓ ቶላኒ ዳንዳዓይ ዖኦኒያ ባኣሴ፤

ታኣኒ ማዻ ባኮ ዖኦኒ ታና ላኣጋኒ ዳንዳዓይ።»

«ዒንሢሮ ጌዒ ታኣኒ ባብሎኔ ዓሶ ዖላንዳ ዓሲ ዳካንዳኔ፤

ዔያታ ሄርሺንታ ዋኣፆ ካኣሚሎ ታ ዔያቶኮ ሜንሣንዳኔ፤

ዒስራዔኤሌ ዓሲዮቴ! ታኣኒ ዒንሢ ማዤኔ፤

ዒንሢኮ ካኣታሢያ ታናኬ።»

ዋኣፆ ጉዳሢዳ ሃንቶንዶ ጎይሢ ኮሼኔ።

ባይሲንታ ባንሢ ዒ ዔኪ ዓኣዼኔ፤

ዔያታ ሎኦሜኔ፥ ላሚ ዔቃዓኬ፤

ዑኡዞዛ ሃሃይቃ ፆምፔጉዲ ዔያታ ማዔኔ።

«ማዺንቲ ዓኣዼ ባኮ ጶቂሢፖቴ፤

ሃያኮ ቤርታ ማዔ ባኮዋ ማሊፖቴ።

ዬይ ሃሢ ማዺንቲ ኩማንዳያ ማዔሢሮ ዒንሢ ዛጋንዳኔ፤

ዳውሎይዳ ጎይሢ ታ ኬሳንዳኔ፤

ዓሲ ናንጉዋ ዳውላኣ ዋኣሢ ታ ዑራንዳኔ።

ዳውሎይዳ ታኣኒ ዎርዚ

ካዮ ቦዓኣ ዓቱዋዖ ታና ቦንቻንዳኔ፤

ዉኡካሢንታ ሙኡታላኣ ታና ጋላታንዳኔ።

ዔያታ ታና ጋላታንዳኔ።»

«ዒንሢ ያይቆኦቤ ናኣታ ዒስራዔኤሌ ዓሳ!

ዒንሢ ታና ካኣሽኪፆ ሃሼኔ፤

ታኣም ማዺፆዋ ዒንሢ ላቤኔ።

ዒንጎ ባኮ ሺኢሺፆና ታና ዒንሢ ቦንቺባኣሴ፤

ባሲ ታኣኒ ዒንሢኮ ማዒባኣሴ፤

‹ዑንጆ ታኣም ጩቢሹዋቴ› ጌዒ ታ ዒንሢና ሜታሲባኣሴ።

ሃኣቦ ማሎ ሚቺ ዒንጊፆና ዒንሢ ታና ዎዛሲባኣሴ፤

ጋዓንቴ ዒንሢኮ ጎሞ ሚርጉሞና ታኣኮ ዒንሢ ባሲ ማዔኔ፤

ዒንሢኮ ዻቢንቶ ሚርጉሞና ታና ዒንሢ ሼናሴኔ።

ጎሞ ዒንሢኮ ዓቶም ጋዓ ፆኦሲ ታናኬ፤

ዬያ ታኣኒ ማዻሢ ዒንሢሮቱዋንቴ ታኣኒ ታና ማዔሢሮኬ፤

ጎሞ ታ ዒንሢኮ ዓርቃዓኬ።»

ጌኤዞ ዒንሢኮ ታና ዋይዚሲ ዒንሢ ፂሎ ማዒፆ ማርካሡዋቴ።

ዒንሢኮ ዔርዛዞንሢያ ዻቢንቲ ማዺ ታና ዖዪሴኔ።

ያይቆኦቤ ባይቃንዳጉዲ፥ ዒስራዔኤሌያ ጋዳንቂንታንዳጉዲ ታ ማሃንዳኔ።»

<- ዒሲያሴ ማፃኣፖ 42ዒሲያሴ ማፃኣፖ 44 ->