1 ዮሴፔ ዒዛኮ ማዾ ዓሶ ዓይሢ ማዺሻ ሱኡጋሢ ሂዚ ጌዒ ዓይሤኔ፦ «ዔያቶኮ ሱርባ ዓርቃሢ ጉዴያ ኩንሤ፤ ፔቴ ፔቴ ዓሶኮ ሚኢሾዋ ሱርቦ ካራ ማሂ ጊንሣ ዓጌ። 2 ታኣኮ ዑዦ ዑሽኮ ቢሮ ዓንጎና ኮሺንቴ ዓንጌሎ ዔኪጋፓ ዻኮ ጌኤዛሢኮ ሱርቦ ካራ ዓጌ።» ዮሴፔ ማኣራ ማዻ ዓሶኮ ሱኡጋሢ ዮሴፔ ጌዔማጉዲ ማዼኔ።

3 ጉቴ ዓሚ ዹማ ዓሳ ዮሴፔኮ ጌርሲንሢ ሃሮ ጫኣኒሲ ዳኬኔ። 4 ካታማፓ ኬስኪ ዻካ ሃጊ ዔያታ ዓኣዻኣና ዮሴፔ፥ ማዾ ዓሶኮ ሱኡጋሢም፦ «ዬንሢ ዓሶንሢ ጊንፆ ዑኬና ዓኣዺ ዔያቶ ዓርቄ፤ ዔያቶ ዴንዲ ሄላዖ፦ ‹ዒንሢም ኮሺ ማዺንቴሢ ዛሎ ፑርታ ዒንሢ ማሄሢ ዓይጎሮዳይ? 5 ታ ጎዳኮ ዑዦ ዑሽኮ ዓንጎ ዒንሢ ዓይጎሮ ዉኡቄይ? ዬና ዓንጌላ ታ ጎዳሢ ዑሺ ዑሽካያና ዓኣሺንቴ ባኣዚ ቢያ ዒዞና ዛጊ ዔራያ ማዔሢ ዒንሢ ዔሩዋዓዳ? ሃይ ዒንሢ ፑርቲሴ ባካ ሚርጌ ዴኤሢ ባኣዚኬ› ዔያቶም ጌዔ» ጌኤኔ።

6 ዬያ ማኣሮይዳ ማዻ ዓሶኮ ሱኡጋሢ ዴንዲ ዮሴፔኮ ጌርሲንሢ ሄላዖ፥ ጌይንቴሢ ጎይፆ ዔያቶም ኬኤዜኔ፤ 7 ዔያታ ዒዛ ኮይላ፦ «ኑ ጎዳሢዮ! ዎይቲ ኔ ሂዚ ጋዓይ? ኑኡኒ ዬያጉዴ ባኣዚ ማዺባኣሢ ኑ ጫኣቃንዳኔ፤ 8 ሃያኮ ቤርታ ኑኡኮ ሱርቦ ጋራ ጴዼ ሚኢሾታዖ ኑ ኑኡኮ ዓጮ ካኣናኔይዳፓ ማሂ ዔኪ ሙኬሢ ኔ ዔራኔ፤ ሂዳዖ ሃሢ ኔ ጎዳ ማኣራፓ ሚኢሼ ማዔቶ ዎርቄ ኑ ዉኡቃንዳሢ ዓይጌንዴሮዳይ? 9 ኑጊዳፓ ፔቴ ዬኖ ባኬሎ ዔኪ ጴዼቶ ሃይቆንጎ፤ ዓቴዞንሢ ኑኡኒ ኔኤኮ ካራሚ ማዓንዳኔ» ጌዔኔ።

10 ዒዚ ዒማና፦ «ኮሺኬ፤ ዒንሢ ጌዔማ ጎይፆ ማዖንጎ፤ ጋዓንቴ ዬኖ ዓንጌሎ ዔኬ ዓሢ ሌሊ ታኣኮ ካራሚ ማዓንዳኔ፤ ዒንሢ፥ ሃንጎዋታ ጋዓንቴ ሜታ ባኣያ ዓኣዻንዳኔ» ጌዔኔ። 11 ዬያሮ ዑኬና ጫኣኖ ቡሊ ኬሣዖ ፔቴ ፔቴሢ ፔኤኮ ሱርቦ ቡሌኔ። 12 ዮሴፔኮ ማዻሢ ቶይዲስካፓ ዓርቃዖ ዴንዲ ጌኤዚሲ ሄላንዳኣና ቢያሢ ሱርቦ ጋሮ ካኣሺ ካኣሺ ዑዦ ዑሽኮ ዓንጌሎ ኮዓዖ፥ ጋፒፆይዳ ዓንጌሎ ቢኢኒያሜ ሱርቦ ጋራፓ ዴንቄኔ። 13 ዮሴፔኮ ጌርሲንሢ ዬያ ዛጌ ዎዶና ፔኤኮ ዓፒሎ ዳርዚ ዬኤካዖ ሱርቦ ቢያ ጫኣኒ፥ ጊንሣ ካታሞ ማዔኔ።

14 ዪሁዳና ጌርሲንሢና ዮሴፔ ባንሢ ሙኪቤቃ ዒዚ ሃጊ ማኣራ ዓኣንቴ ዴንቂ ካኣማዖ፥ ዒዛ ቤርታ ሎኦሜኔ። 15 ዮሴፔ ዔያቶ ኮይላ፦ «ሃይ ዒንሢ ማዼ ባካ ዓይጌንዴዳይ? ታጉዴ ቦንቺንቴ ዓሲ ዱማ ዔራቶና ዓኣሺንቴ ባኣዚ ቢያ ማሊ ዛጊ ዔሪንዱዋያ ዒንሢም ማሊያ?» ጋዓዛ፥ 16 ዪሁዳ ማሃዖ፦ «ዓካሪ ኑ ጎዳሢም ኑ ዓይጎ ኬኤዛንዳይ? ኑና ጌኤሻንዳ ባኣዚ ኑ ኬኤዛኒ ፔቴታዖ ዳንዳዑዋሴ፤ ዓይጎሮ ጌዔቶ ፆኦሲ ኑ ማዼ ፑርቱሞ ኔኤም ፔጋሴኔ፤ ዓካሪ ዑዦ ዑሽኮ ዓንጌላ ጴዼሢ ሌሊቱዋንቴ ቢያሢ ኑኡኒ ኔኤኮ ካራሚ ማዓንዳኔ» ጌዔኔ።

17 ዮሴፔ ዒማና፦ «ዬያ ታ ፔቴታዖ ማዻዓኬ፤ ዑሽኮ ዓንጌላ ጴዼ ዓሢ ሌሊ ታኣኮ ካራሚ ማዓንዳያ ኮይሳኔ፤ ዓቴዞንሢ ኮሺና ዒንሢኮ ዓዳሢ ባንሢ ዴንዳኒ ዳንዳዓኔ» ጌዔኔ።

18 ዪሁዳ ዮሴፔ ባንሢ ዑኪጋፓ ሂዚ ጌዔኔ፦ «ታ ጎዳሢዮ! ሃዳራ ፔቴ ባኣዚ ኔ ዋይዛንዳጉዲ ታ ኔና ሺኢቃኔ፤ ዎዚ ኔ ካኣቲጉዲ ቦንቺንታያ ማዔቴያ ሃዳራ ታና ጎሪፖ። 19 ታ ጎዳሢዮ! ሃያኮ ቤርታ ‹ዒንሢኮ ዓዴ ዓኣ? ሜሌ ጌኤዛቲያ ዒንሢኮ ዓኣ?› ጌዒ ኔ ኑና ዖኦጬኔ፤ 20 ኑኡኒያ ‹ጋርቼ ኑኡኮ ዓዶስኬያ ዓኣኔ፤ ሃሣ ዒዚ ጋርቻቶና ሾዔ ጌኤዛቲያ ኑኡኮ ዓኣኔ፤ ዬያ ናዓሢኮ ዒሻሢ ሃይቄኔ፤ ዒዛ ዒንዶ ናኣቶኮ ዓቴሢ ዒዛ ሌሊታሢሮ ዓዴ ዒዛ ሚርጌና ናሽካኔ› ኔኤም ኑ ጌዔኔ፤ 21 ዬካፓ ኔኤኒ፦ ‹ታ ዛጋንዳጉዲ ዔኪ ሙኩዋቴ› ኑ ኮራ ጌዔኔ፤ 22 ኑኡኒያ፦ ‹ናዓሢ ዓዶ ሃሺ ሙካኒ ዳንዳዑዋሴ፤ ሃሺ ሙኬያ ማዔቴ ዓዴ ሃይቁዋዖ ዓታዓኬ› ሂዚ ኔኤም ኑ ጌዔኔ። 23 ኔኤኒ፦ ‹ዒንሢኮ ጌኤዛሢ ዒንሢ ዔኪ ሙኪባኣቴ ላሚ ታ ቤርታ ዒንሢ ጴዻዓኬ› ጌዒ ኑኡም ኮሺ ላቴኔ።

24 «ዬያሮ ኑኡኒያ ኑ ዓዳሢ ባንሢ ዴንዲ ሄላዖ ኔ ኑኡም ጌዔ ባኮ ቢያ ዒዛም ኬኤዜኔ፤ 25 ዬካፓ ዒዚ፦ ‹ሃሣ ጊብፄ ዓጮ ዴንዲ ዻካ ሃኣኮ ኑኡም ሻንቁዋቴ› ጌዔኔ። 26 ኑኡኒያ ዒማና፦ ‹ዬካ ኑ ዓኣዻኒ ዳንዳዑዋሴ፤ ዓይጎሮ ጌዔቶ ኑ ጌኤዛሢ ኑኡና ዎላ ዓኣዺባኣቶ ዓሢ ቤርቶ ኑ ሺኢካኒ ዳንዳዑዋሴ፤ ዬካ ኑ ዓኣዻኒ ዳንዳዓሢ ኔኤኒ ኑ ጌኤዛሢ ኑኡና ዎላ ዓኣዻንዳጉዲ ዳኬቴ ሌሊኬ› ጌዔኔ። 27 ኑ ዓዴ ጊንሣ ኑኡም ሂዚ ጌዔኔ፦ ‹ታኣኮ ላኣሌላ፥ ራኣሄላ ላምዖ ዓቲንቄ ናይ ሾዔሢ ዒንሢ ዔራኔ። 28 ዔያቶይዳፓ ፔቴሢ ሃያኮ ቤርታ ታጊዳፓ ዱማዺ ባይቄኔ፤ ዒ ባይቄሢዳፓ ሃኖ ሄላንዳኣና ታ ዒዛ ዴንቂባኣሢሮ ፑርታ ቦዖ ሙዔያ ናንዳኔ፤ 29 ሃሣ ዒንሢ ሃያ ዔኪ ዓኣዻዛ ፑርታ ባኣዚ ሄሌቶ፥ ታኣኮ ጋርቻቶ ዎዶይዳ ዒንሢ ታና ኑኡናሲ ዎዺሻንዳኔ።›»

30-31 ሃሣ ዪሁዳ ኬኤዛዖ፦ «ዬያሮ ጎዳሢዮ! ናዓሢ ኑ ዔኩዋዖ ዓዶ ባንሢ ዓኣዼቶ ናዓሢ ኑ ኮራ ባኣሢ ዒ ዴንቃዖ ቤዞና ሃይቃንዳኔ፤ ዓይጎሮ ጌዔቶ ዒዛኮ ሼምፓሢ ናዖ ሼምፓሢና ዎላ ፔቴ ማዔሢሮኬ፤ ሃሣ ሚርጌ ጋርቻታፓ ዔቄያና ዒዛ ኑ ዲቃሢ ዎዺሺሳንዳኔ። 32 ሃሣ ጊንሣ ናዓሢ ዛሎ ታኣም ሃሼ፥ ታ ዔኪ ዒዛ ሙካንዳኔ፤ ታ ዒዛ ዔኪ ሙኪባኣቶ ታና ዖኦጬ፥ ጌዒ ታ ሙኬኔ፤ ሃሣ ‹ናዓሢ ኮሺና ታ ዔኪ ሙኪባኣቶ ታ ናንጎ ቢያይዳ ዻቢንታ ታ ዑፃ ማዖም› ጌዒ ታ ዒዛም ጫኣቄኔ።

33 «ዬያሮ ታኣኒ ናዓሢ ዛሎ ኔና፥ ታ ጎዳሢኮ ካራሚ ማዒ ሃይካ ዓታንዳኔ፤ ናዓሢ ጋዓንቴ ጌርሲንሢና ዎላ ዓኣዾንጎ፥ 34 ናዓሢ ታ ዔኩዋዖ ዎይቲ ዓዶ ባንሢ ማዓንዳይ? ዬያጉዴ ዴኤሢ ሜታ ታ ዓዶ ዑፃ ሄላንቴ ታ ዛጋኒ ኮዑዋሴ» ጌዔኔ።

<- ማዢንቲ ማፃኣፔ 43ማዢንቲ ማፃኣፔ 45 ->